प्रधानमन्त्री रोजगार कार्यक्रम

कान्तिपुर संवाददाता

‘एक महिनामै फेरि बेरोजगार’ शीर्षक समाचारले प्रधानमन्त्री रोजगार कार्यक्रमको औचित्य र सरकारको प्राथमिकतामै संशय उब्जाएको छ  ।

अर्बौं खर्चेर लाखौंलाई रोजगारी उद्घोष गर्दैगर्दा के यस्ता परिणामले कार्यक्रमको उपयोगिता झल्काउलान् त ? अधिकांश रकम क्षणिक अवसर र मनोरञ्जनात्मक तवरले खर्चिएको यथेष्ट प्रमाण सूचीकृत गराइँदा पनि सरकारले कुनै मूल्यांकनबिना अधिकतम दक्ष जनशक्ति उत्पादनमा अपुग भन्दै अर्बौं वैदेशिक ऋण लिएर तिनैको पक्षपोषण गर्नु सस्तो लोकप्रियता सिवाय केही होइन । ‘समृद्ध नेपाल सुखी नेपाली सरकारको मूल अभिभारा तथा हरेक नेपालीको शुभेच्छा’ भन्दै गर्दा यसरी अनुत्पादक क्षेत्रमा बारम्बार रजाइँ गर्ने हो भने सरकारबाट आम नागरिकले अपेक्षा गर्ने कि उपेक्षा ? वास्तविक श्रमिकको भावना र आवश्यकता के हो, कसले सुन्ने ? सधैं एउटै प्रवृत्ति दोहोर्‍याउने मानसिकताले गर्दा आम नागरिकले आधारभूत आवश्यकताको प्रत्याभूति गर्न नसकेको कुरा नेतृत्व तहले कहिले बुझ्छ होला ?
– सुभाष अर्याल, भीरकोट–५, स्याङजा

प्रकाशित : श्रावण २७, २०७६ ११:२९
प्रतिक्रिया
पठाउनुहोस्

बाँदरको सामूहिक मरण

कान्तिपुर संवाददाता

सिन्धुपाल्चोकमा १६ बाँदर एउटै पोखरीमा डुबेर मरेको खबरले स्तब्ध तुल्यायो  ।

यसलाई कसैले आत्महत्या भनिरहेका छन् भने कसैले वातावरणीय कारण देखाइरहेका छन् । केहीको आशंका भने केमिकल या करेन्टका कारण पनि बाँदर मरेको हुनसक्ने छ । यस्तो चर्चाले जनावरप्रति संवेदनशीलता बढेको देखाउँछ, जुन राम्रो परिपाटी हो ।


अध्ययनहरू अनुसार, मानिसमा जस्तै जनावरमा पनि मानसिक समस्या हुने पाइएको छ । लगातार तनावपूर्ण वातावरणमा बस्नुपर्दा विभिन्न जनावरले असामान्य व्यवहार देखाउने गर्छन् । ह्वेल र डल्फिनहरू समुद्रतटमा समूहमा मृत फेला परेका घटना सार्वजनिक भइरहन्छन् । कुनै ह्वेल कमजोर भएर तटमा आउँदा अरू ह्वेल पनि पछ्याउँदै आउने र सामूहिक मृत्यु हुने जस्ता सिद्धान्त पनि अनुसन्धानमा आएका छन् । तर मुख्यतः जीवजन्तुको प्राकृतिक जीवनशैलीलाई मानव क्रियाकलापले झमेला गर्दा तिनले असामान्य व्यवहार गर्ने पाइएको छ । एउटा चिनियाँ फार्ममा भालुले आफ्नो बच्चासहित आफूलाई मारेको पाइएको थियो । केही यस्ता जीवाण पनि हुन्छन्, जसले कुनै जीवलाई संक्रमण गरी व्यवहारै बदलिदिन्छन् । जस्तो— टोक्जोप्लाजम गोन्डी नामक जीवाणुले संक्रमित मुसा बिरालोसँग डराउन छाड्छ । जे भए पनि सिन्धुपाल्चोकको सन्दर्भमा अनुसन्धान हुनु आवश्यक छ ।
– सौगात बोलखे, कुशादेवी, काभ्रे

प्रकाशित : श्रावण २७, २०७६ ११:२८
पूरा पढ्नुहोस्
प्रतिक्रिया
पठाउनुहोस्