शिक्षाको गुणस्तर घट्दो

कान्तिपुर संवाददाता

कक्षा १२ को नतिजा गत वर्षभन्दा चाँडो निकालेर माध्यमिक शिक्षा परिषदले सराहनीय काम गरेको छ  । परिषदको कार्यशैलीमा सुधार देखिए पनि पढाइको गुणस्तरचाहिँ खस्किँदै गएको भान हुन्छ  ।

यसपालि आंशिक र पूरक गरी ४ लाख २८ हजार ६७ विद्यार्थी परीक्षामा सामेल भएका थिए । तर ३.६१ भन्दा माथि जीपीए कसैको आएको छैन । यसले पढाइको स्तरमा कमी आएको संकेत गर्छ । गतवर्ष एकजना विद्यार्थीले ४ जीपीए ल्याएका थिए । जीपीए पद्धतिबारे शिक्षक–विद्यार्थीमा राम्रो ज्ञान छैन जस्तो छ । कोही फेल हुँदैनन् भन्ने गलत सोचका कारण विद्यार्थीले मिहेनत गर्न छाड्दै गएका छन् । सरकारले शिक्षामा करोडौं खर्च गरेको छ, प्रतिफलचाहिँ खासै उत्साहजनक छैन । सरकारी स्कुल–कलेजको अवस्था झन् कमजोर बन्दैछ । सरकारी स्कुल–कलेजका शिक्षक पढाउनभन्दा बढी राजनीतिक क्रियाकलापमा ब्यस्त हुन्छन् । काम नगरी तलब खाएका छन् । यस्तो भएपछि पढाइको स्तर कसरी बढ्छ ?
– पुरुषोत्तम घिमिरे, कुटुम्ब कलेज, जोरपाटी

प्रकाशित : श्रावण २१, २०७६ १२:४२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

शिक्षक नियुक्तिको गाईजात्रा

कान्तिपुर संवाददाता

शिक्षक सेवा आयोगले गतवर्ष असोजमा लिएको परीक्षाबाट यस वर्षको जेठमा माध्यमिक तहका लागि शिक्षक सिफारिस गरेको दुई महिना बितिसकेको छ  । केन्द्रले निकै समय लगाएर शिक्षक नियुक्तिका लागि जसोतसो जिल्लासम्म पुर्‍याए पनि नियुक्तिको टुङ्गो छैन  ।

नियुक्ति गर्न नसकिने भनी इकाइहरूले शिक्षकलाई पुनः केन्द्रमै फर्काइरहेका छन् भने केन्द्रले कहिले यो जिल्ला त कहिले त्यो जिल्ला कुदाएर गाईजात्रा गरिरहेको छ । जम्मा ५०३ संख्या माग भएकोमा आयोगले १,०९७ जना सिफारिस गर्दा नियुक्तिमा समस्या भएको भन्नु झुट हो । अस्थायी शिक्षकको ७५ प्रतिशत दरबन्दीबाट बाँकी २५ प्रतिशत खोइ ? अस्थायी विज्ञापन अन्तर्गत १ नं. र २ नं. विज्ञापनबाट धेरै अनुत्तीर्ण अस्थायी शिक्षकको दरबन्दी खोइ ? परीक्षा अघिनै ‘गोल्डेन ह्यान्डसेक’ लिने अस्थायी शिक्षकको दरबन्दी कता गए ? दुई वर्षसम्ममा अवकाश भएका शिक्षकको दरबन्दी खोइ ? देशभरि सयौं दरबन्दी खाली छन्, तर आयोगले सबैलाई भ्रममा राखिरहेको छ । खास कुरा के देखिन्छ भने सुगम जिल्लाहरूमा थोरै दरबन्दीमा शिक्षक सिफारिस भए भने दुर्गममा धेरै गरिएको छ । धेरै शिक्षक तराईका जिल्लामा सरुवा भए वा पछि सरुवा गराउन दरबन्दी लुकाइएको छ । पछि ती सुगम जिल्लामा सरुवा गर्दा द्रव्यको चलखेल गर्न पाइन्छ, आफ्ना मान्छेलाई सुगममा ल्याउन पनि पाइन्छ । शिक्षा मन्त्रालय कडा रूपमा प्रस्तुत हुने हो भने समस्या तत्काल समाधान हुनसक्छ ।
– डिल्लीप्रसाद दाहाल, दमक–१०, झापा

प्रकाशित : श्रावण २१, २०७६ १२:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT