उपप्रमुखको अनुकरणीय काम

कान्तिपुर संवाददाता

गण्डकी प्रदेश सरकारले स्थानीय तहका उपप्रमुखलाई सवारी खरिदका लागि छुट्याएको रकमबाट गोरखाको पालुङटार नगरपालिकाले शववाहन किन्न लागेको थाहा पाउँदा खुसी लाग्यो  । विगतको अनुभवले भने यो हर्ष धेरै दिन टिक्न नदिने हो कि भन्ने संशय उब्जाएको छ  ।

नगरपालिकाले एस्काभेटर र टिपर एकएक थान किनको वर्षौं भइसक्दा पनि चालक नियुक्ति गर्न सकेको छैन । नगरपालिका परिसरमै थन्केका ती महँगा साधन खियाले सड्ने सम्भावना बढ्दै गएको छ । स्थानीय ढुवानी एवं निर्माण व्यवसायीको मनपरी भाडादर खेप्दै आएका नगरवासी नगरकै सम्पत्ति उपयोग गर्न नपाउँदा निराश छन् । शववाहनले पनि यस्तै नियति भोग्नुपर्ने हो कि ? सवारीसधानको सञ्चालनसम्बन्धी उचित कार्यविधि बनाउनु अत्यावश्यक भइसक्यो । राज्यको बजेट खर्च गरी ल्याइने यस्ता सवारी साधनलाई बेकामे तुल्याउनु कदापि क्षम्य हुन सक्दैन । यसतर्फ नगरपालिका प्रशासन र कार्यपालिकाको ध्यान पुगोस् ।
किरण गिरी, पालुङटार–३, गोरखा

प्रकाशित : श्रावण १९, २०७६ १०:३१
प्रतिक्रिया
पठाउनुहोस्

तरकारी बजारले असुविधा

कान्तिपुर संवाददाता

काठमाडौं–१६ अन्तर्गत बाइपासदेखि माछापोखरीसम्म फलफूल र तरकारी होलसेल बजार खुलेको पन्ध्र वर्षजति भयो  । यसका कारण प्रत्येक बिहान मानिसहरूको भीडभाडले गर्दा सवारी साधनलाई पर्नु समस्या परिरहेको पनि झन्डै त्यति नै समय भयो  ।

नयाँ बसपार्कबाट प्रत्येक बिहान छुट्ने लामो दूरीका यात्रुबसलाई त्यो बाटो काट्न हरबिहान हम्मे पर्ने गरेको छ । अर्कातिर, यही विषयलाई लिएर भित्री भागमा राखिएको तरकारी होलसेल बजार व्यवस्थापन समिति र बाहिर बस्ने कृषक व्यापारीबीच कैयौं पटक झगडा भइसकेको छ । नगर प्रहरी तथा ट्राफिक प्रहरीले तिनलाई पटक पटक चेतावनी दिँदै आइरहे पनि राजनीतिक आड देखाएर अटेर गर्ने गरेका छन् । सर्वसाधारणको यस्तो सास्तीबारे कसले ध्यान दिने ? दोषीलाई तुरुन्त कारबाहीको दायरामा ल्याई आवागमनमा सहजीकरण गरिनुपर्छ ।
– खिमराज गिरी, मध्य नेपाल–२, लमजुङ

प्रकाशित : श्रावण १९, २०७६ १०:३०
पूरा पढ्नुहोस्
प्रतिक्रिया
पठाउनुहोस्