एमालेले राष्ट्रिय सभामा भन्यो : संसद् महासचिव नियुक्तिमा राष्ट्रपतिको चलखेल किन ?
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — प्रमुख प्रतिपक्षी एमालेले संघीय संसद्को महासचिव नियुक्तिमा राष्ट्रपति रामचन्द्र पौडेलले ढिलाइ गरेको भन्दै आक्रोश व्यक्त गरेको छ । महासचिवमा सभामुख देवराज घिमिरे र राष्ट्रिय सभा अध्यक्ष गणेशप्रसाद तिमिल्सिनाले सिफारिस गरेका व्यक्तिलाई तत्काल नियुक्त नगरे राष्ट्रपतिविरुद्ध संसद्मा कडा शब्द प्रयोग गर्ने पनि एमालेले चेतावनी दिएको छ ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![एमालेले राष्ट्रिय सभामा भन्यो : संसद् महासचिव नियुक्तिमा राष्ट्रपतिको चलखेल किन ?](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/devendra-dahal-0522024123155-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
राष्ट्रिय सभामा एमाले संसदीय दलका नेता देवेन्द्र दाहालले राष्ट्रिय सभाको सोमबारको बैठकमा संसद्को महासचिव नियुक्त गर्न राष्ट्रपतिलाई चेतावनी दिएका हुन् । घिमिरे र तिमिल्सिनाले महासचिवमा प्रतिनिधिसभा सचिव पद्मप्रसाद पाण्डेयलाई सिफारिस गरेका छन् । सुरुमा कानुनी प्रक्रिया पूरा नगरेको र रीत नपुगेको भन्दै राष्ट्रपतिले पाण्डेयको नियुक्ति अध्ययनका क्रममा रहेको भन्ने जानकारी गरिएको थियो ।
मंसिर २५ मा भएको सिफारिसअनुसार राष्ट्रपतिले महासचिव नियुक्त नगरेको भन्दै एमालेले नै संसद्मा उठाएको हो । 'आज हाम्रो संघीय संसद्को महासचिवको पद खाली छ । अध्यक्षले पद खाली भएको सुनाउनुभयो । तर, यो अधिवेशनको सुरु भइसक्दा पनि कार्यवाहकबाट काम चलाउनुपर्ने परिस्थिति किन भयो ? हामीले कस्तो राष्ट्रपति पायौं ? निकै लामो अध्ययन, चिन्तन गर्ने राष्ट्रपतिज्यू तपाईंको अध्ययन चिन्तन बढी भएन र ?,' राष्ट्रपतिलाई प्रश्न र चेतावनी दिँदै दाहालले भने, 'एउटा संसद्को महासिचवमा तपाईंको चलखेल किन ? आज विनम्रतापूर्वक यस सभाको बैठकमा आग्रह गर्दछु हामीलाई कानुनअनुसार सिफारिस गरिएको महासचिव अविलम्ब दिनुहोस् । मलाई विश्वास छ, आगामी बैठकहरूमा हामीले सम्मानित राष्ट्रपतिको विरुद्धमा अलि कडा शब्द प्रयोग गर्नुपर्ने छैन ।'
दाहालले राष्ट्रपति सम्मानित पद भएको र त्यो गरिमा कायम राख्न पनि आग्रह गरेका थिए । महासचिवमा सिफारिस पाण्डेयलाई सभामुख देवराज घिमिरेले कार्यवाहक महासचिवको जिम्मेवारी दिएका छन् ।
पाण्डेयले उमेर घटाएर नागरिकता लिएको र सोही नागरिकताका आधारमा राहदानी लिएको सार्वजनिक भएको थियो । यस विषयमा प्रतिनिधिसभाको राज्यव्यवस्था तथा सुशासन समितिले छानबिन गरिरहेको छ । तत्कालीन महासचिव भरतराज गौतमलाई राजीनामा गराएर पाण्डेयलाई सिफारिस गरिएको थियो ।
![](https://assets-cdn.ekantipur.com/uploads/source/ads/900-x-100-1-0282024055738.gif)