नक्कली छोरा प्रकरण : सतराजविरुद्ध नागरिकता किर्ते कसूरमा अनुसन्धान सुरु

पुस २९, २०८०विद्या राई

काठमाडौँ — छोरा बनेर सम्पत्ति हत्याउन खोजेको अभियोगमा मुद्धा खेपिरहेका सतराज गुरुङविरुद्ध प्रहरीले नागरिकता किर्ते गरेको कसूरमा समेत अनुसन्धान थालेको छ । गुरुङविरुद्ध संगठित रुपमा सम्पत्तिको आपराधिक उपयोग र लिखत सम्बन्धी कसुरमा मुद्धा चलिरहेको छ ।उनलाई उच्च अदालत पाटनले १० लाख रुपैयाँ धरौटीमा थुनामुक्त गर्न आदेश दिएको थियो । तर प्रहरीले गुरुङलाई फेरि नियन्त्रणमा लिएर नागरिकता किर्ते कसूरमा अनुसन्धान थालेको हो ।

नक्कली छोरा प्रकरण : सतराजविरुद्ध नागरिकता किर्ते कसूरमा अनुसन्धान सुरु

गुरुङलाई नागरिकता किर्ते कसूरमा अनुसन्धानका लागि शनिबार जिल्ला प्रहरी कार्यालय मकवानपुर लगिएको एसपी सिताराम रिजालले बताए । मकवानपुरको थाहा नगरपालिका-१२, टिस्टुङ घर भई काठमाडौंको कपन बस्दै आएका सतराजले नक्कली छोरा बनेर मृतक उमादेवी गुरुङको नाममा रहेको कीर्तिपुरस्थित ९९२ वर्गमिटर जग्गा गत बैशाख २७ मा आफ्नो नाममा पारेका थिए ।

किर्ते कागजात खडा गरेर जग्गा हडप्ने उनी सहित २१ जना विरुद्ध उमादेवीका श्रीमान एमसि परेराले जिल्ला प्रहरी परिसर काठमाडौंमा जाहेरी दिएका थिए । सतराजलाई काठमाडौं उपत्यका अपराध अनुसन्धान कार्यालयले गत असार ३ मा पक्राउ गरेको थियो ।

संगठित रुपमा सम्पत्तिको आपराधिक उपयोग र लिखत सम्वन्धी कसुरमा काठमाडौं जिल्ला अदालतको आदेश अनुसार सतराज साउन ३१ यता पुर्पक्षको लागि थुनामा थिए । जिल्ला अदालतको आदेश विरुद्ध सतराजले उच्च अदालत पाटनमा ७३ नं. को निवेदन हालेका थिए ।

गत पुष १९ मा उच्च अदालत पाटनका न्यायाधीशद्वय राज्यलक्ष्मी बज्राचार्य र रमेशराज पोखरेलको संयुक्त इजलासले उनलाई धरौटीमा छोड्न आदेश दिएका थिए । न्यायाधीशद्धयले ‘उमादेवी गुरुङ प्रतिवादी सतराज गुरुङको आमा हुन् वा जाहेरवाला एमसि परेराको श्रीमती हुन् भन्ने सम्बन्धमा पछि प्रमाण बुझ्दै जाँदा ठहरेबमोजिम हुने’ भन्दै धरौटीमा छोड्न आदेश दिएका हुन् ।

पीडित पक्षले भने उच्च अदालत पाटनले जग्गा हडपेको कसूरलाई नागरिकता कसूरमा बिषयान्तर गरेर मुद्धालाई फितलो बनाउन खोजेको गुनासो गरेका छन् । झुटा विवरण पेश गरेर नागरिकता लिएकोले नागरिकता ऐन सम्बन्धी कसूरमा सतराज विरुद्ध मकवानपुर जिल्ला प्रहरी कार्यालयमा दर्ता भएको मुद्धा अनुसन्धानकै क्रममा रहेको छ ।

‘उनी थाहा नगरपालिकाको मान्छे हुन्, मकवानपुर जिल्ला प्रशासन कार्यालयबाट किर्ते नागरिकता लिएकाले अब किर्ते नागरिकता सम्बन्धी कसुरमा अनुसन्धान अघि बढ्छ,’ मकवानपुर जिल्ला प्रहरी कार्यालयका एसपी रिजालले भने ।

काठमाडौं जिल्ला सरकारी वकिल कार्यालयको ०८० साउन २८ को अभियोग पत्र पनि ‘संगठित रुपमा सम्पत्तिको आपराधिक उपयोग र लिखत सम्बन्धी कसूर’ मा सतराज छुटी जाने भएमा मकवानपुर जिल्ला प्रहरी कार्यालयमा उपस्थित गराउनुपर्ने उल्लेख गरिएको छ ।

सतराजले मृतक उमादेवीको नाममा रहेका जग्गाहरु हडप्न गरेको प्रयासको फेहरिस्त लामो छ । उनले थाहा नगरपालिका-१२ मकवानुपरबाट नाता प्रमाणित तथा सिफारिस पत्र, मालपोत कार्यालय शिखरकोट मकवानपुर, कंलंकी मालपोत कार्यालय, किर्तिपुर नगरपालिका -१० बाट सर्जमिन मुचुल्का लगायतका कागजातहरु किर्ते गरेर ०७९ असोज १२ गते जिल्ला प्रशासन कार्यालय मकवानपुरबाट नागरिकता प्रतिलिपि लिएका थिए ।

यसअघिको नागरिकतामा सतराजले आमाको नाम देवकी गुरुङ थियो । झुटा विवरण राखेर बनाएको नागरिकतामा आमाको नाम उमादेवी बनाएका छन् । नागरिकता किर्ते गर्नुअघिका सतराजका कागजातमा आमाको नाम देवकी गुरुङ छ ।

गृह मन्त्रालयको अभिलेख अनुसार ०७० असार मसान्त, ०७४ भाद्र ५ र ०७९ बैशाख २९ सम्मको सतराजको मतदाता नामावलीको विवरणमा माताको नाम देवकी गुरुङ उल्लेख छ । तर ०८० बैशाख ९ सम्मको मतदाता विवरणदेखि भने आमाको नाम उमादेवी गुरुङ छ । राहदानी विभाग त्रिपुरेश्वरका अनुसार सतराज गुरुङले २०७१ असोज १ मा लिएको राहदानीमा आमाको नाम देवकी गुरुङ छ ।

उक्त राहदानी ‘ड्यामेज’ भएको भन्दै आफ्नी श्रीमतीलाई नजिकको नातेदार सुचक राखेर ०७२ असार २३ मा अर्को राहदानी लिएका छन् । सो राहदानी समेत ‘ड्यामेज’ भएको भन्दै यसपछि किर्ते नागरिकता लिएको १२ दिनपछि (०७९ असोज २४ मा) विधुतिय राहदानी (ई—पासपोर्ट) लिएका छन् । यसमा आमाको नाम उमादेवी गुरुङ उल्लेख गरेका छन् । उनले जग्गा हत्याउनकै लागि देवकी गुरुङलाई जेठी आमा र उमादेवी गुरुङलाई कान्छी आमा बनाएका छन् ।

‘०७९ साल पश्चात मात्र मृत उमादेवी गुरुङको सम्पत्ति अपुताली खान सतराजले विभिन्न सरकारी परिचयपत्रहरुमा आमाको नाम उमादेवी गुरुङ बनाएको देखिन्छ,’ अभियोगपत्रमा भनिएको छ । ‘यति राम्रो अनुसन्धान गरेर पनि किन फितलो बनाइदैछ,’ पीडित पक्ष भन्छन्, ‘सतराजको अपराधको जरो नै किर्ते नागरिकता हो, जग्गा हडप्ने बेला र हडपिसकेपछि हरेकमा आमाको नाम उल्लेख छ, सिलसिलेवार अपराध गरेको छ, नागरिकता नै बदर हुनुपर्छ ।’

सतराजको नागरिकतामा उनको जन्ममिति २०३५ साल साउन ७ गते खुल्छ । उनले आमा दाबी गर्ने उमादेवीको त्यतिबेला फिलिपिन्समा अध्ययनरत थिइन् । उमादेवी पढाइका लागि फिलिपिन्स जाने क्रममा सतराज जन्मिएको भोलीपल्ट (२०३५ साल साउन ८ गते) जापान पुगेकी थिइन् । उमादेवीले प्रयोग गरेको राहदानीमा जापान अध्यागनले स्ट्याम्प लगाएको हुदा सतराज उमादेवीको कोखबाट जन्मिएको पुष्टि नहुने उमादेवीका श्रीमान एमसि परेरा बताउँछन् ।

सतराजले परेरालाई इमेल गरेर समेत जग्गा किन्ने इच्छा व्यक्त गरेका थिए । त्यतिबेला उमादेवीको नाममा रहेको ललितपुर महानगरपालिका वडा नं. ५ मा कित्ता नं. ३५३ मा ०—८—०—०, कित्ता नं. १४८ मा १—०—०—०, ललितपुरकै सैबुमा कित्ता नं. २१३ को १—४—२—० र सुनाकोठीमा कित्ता नं.२४० को ५—१५—०—० र काठमाडौंको किर्तिपुरमा कित्ता नं. २०३ को ९९२.७० वर्गमिटर क्षेत्रफल जग्गा हडप्न उमादेवीकै दिदी पुर्णिमा गुरुङ र बहिनी मिरादेवीले सक्रिय थिए । यो विरुद्ध परेराले जिल्ला अदालत ललितपुरमा मुद्धा हालेका थिए ।

सतराजले उमादेवीका नाममा रहेका जग्गाहरु अरुले खाइदिन खोजेर अपराध गर्न लागिपरेकाले मुद्धा परेकै अवस्थाका जग्गाहरु खरिद गर्न आफु तयार रहेको इमेल गरेका थिए ।

‘उमादेवी गुरुङको नाममा रहेको जग्गाको मुद्धा हुदा कुनै पनि मुद्धा सहित खरिद गर्न तयार छ, कति मुल्य हो ? सर मलाई सम्पर्क गर्न नहिचकिचाउनुहोस् । बसेर हामी सल्लाह गर्न सकिन्छ, बाहिरको मान्छेहरुले घुमाउने र फसाउने काम बाहेक सही तरिका भन्दैन । सरले भेट्न चाहानुहुन्छ भने तलको सम्पर्क नम्बरमा सम्पर्क गर्नुहोस्,’ आफु पेशाले व्यापारी रहेको चिनाउदै सम्पर्क नम्बर सहित सतराजले परेरालाई इमेल लेखेर अनुरोध गरेका थिए ।

सम्बन्धित समाचार