भक्तपुर घटना पोष्टमार्टम रिपोर्ट : पत्नी र छोराको हत्यापछि आत्महत्या गरेको हुनसक्ने - उपत्यका - कान्तिपुर समाचार
कान्तिपुर वेबसाईट
AdvertisementAdvertisement

भक्तपुर घटना पोष्टमार्टम रिपोर्ट : पत्नी र छोराको हत्यापछि आत्महत्या गरेको हुनसक्ने 

कान्तिपुर संवाददाता

भक्तपुर — मध्यपुर थिमि नगरपालिका–९, निकोसेरामा एउटै परिवारका तीन जनाको शव भेटिएको प्रकरणमा पत्नी र छोराको हत्यापछि सुदिप अधिकारीले आत्महत्या गरेको प्रहरीको प्रारम्भिक अनुसन्धानलाई पोष्टमार्टमको रिपोर्टले पनि पुष्टि गरेको छ । 

३६ वर्षीय सुदीप अधिकारी, उनकी पत्नी ३४ वर्षीय सम्झना र छोरा १५ वर्षीय सुशान्तको भदौ २६ (शुक्रबार) साँझ घरभित्रै शव फेला परेको थियो । पत्नी र छोराको सुतेकै अवस्थामा धारिलो हतियार (दाउ) प्रहार गरी हत्या गरेर सुदिपले विष सेवन गरी आत्महत्या गरेको प्रहरीको आशंका थियो ।

महानगरीय प्रहरी वृत्त थिमि प्रमुख डीएसपी ऋषिराम कँडेलका अनुसार पोस्टमार्टम रिपोर्टको अध्ययन पछि आमा–छोराको धारिलो हतियार प्रहारबाट मृत्यु भएको निष्कर्ष निकालिएको छ । काठमाडौं मेडिकल कलेज चाँगुनारायण दुवाकोटमा गरिएको पोष्टमार्टमले पत्नी र छोराको हत्यापछि सुदिपले विष सेवन गरेर आत्महत्या गरेको हुनसक्ने रिपोर्ट निकालेको हो । सम्झनाको टाउकोमा तीन पटक धारिलो हतियार प्रहार भएको रिपोर्टमा उल्लेख भएको डीएसपी कँडेलले बताए ।

छोरा (सुशान्त) को भने घाँटी रेटिएको र टाउकोमा चारपल्ट धारिलो हतियार प्रहार भएको चिकित्सकले दिएको रिपोर्टमा उल्लेख छ । प्रहरीले घटनास्थलबाट सोही दिन धारिलो हतियार (दाउ) बरामद समेत गरेको थियो । सुदीपले भने विष सेवन गरेको पाइएको पोष्टमार्टममा उल्लेख भएको प्रहरीले बताएको छ । प्रहरीले शनिबार घर नजिकैको धानबारीमा ‘सल्फस’ नामक विषको २ वटा बट्टा फेला पारेको थियो ।

पत्नी र छोराको हत्याको २४ देखि ४८ घन्टाको बीचमा सुदीपले आत्महत्या गरेको हुनसक्ने रिपोर्टले देखाएको छ । प्रहरीका अनुसार सुदिपले भदौ २३ गते बेलुका आमा–छोराको हत्या गरेको र पर्सिपल्ट बिहान दुवैजनाको मोबाइल ‘स्वीच अफ’ गरेर विष सेवन गरी आत्महत्या गरेको देखिएको छ ।

शुक्रबार साँझ करिब ५ बजे अधिकारीका भाइ सुनीलले प्रहरीलाई खबर गरेपछि महानगरीय प्रहरी वृत्त थिमि, प्रहरी परिसर भक्तपुर, महानगरीय अपराध महाशाखा, केन्द्रीय अनुसन्धान ब्यूरो र फरेन्सिक विज्ञको टोली घटनास्थलमा पुगेको थियो । त्यसक्रममा सुदिपको शव घरको माथिल्लो तलाको कौशीको ढोकामा घोप्टिएको अवस्थामा, सम्झनाको शव दोस्रो तलाको ओछ्यानमा र सुशान्तको शव पहिलो तलाको ओछ्यानमा घोप्टिएको अवस्थामा फेला परेको थियो ।

प्रहरीका अनुसार आमा–छोरा दुवै जनाको शव कुहिएर किरा परेको अवस्थामा भेटिएको हो भने, घरको पहिलो तलामा कुकुर र माथिल्लो तलामा सुदिपको शव भेटिएको थियो । कुकुर र सुदिपको शव भने कुहिसकेको थिएन । कुकुरलाई समेत विष खुवाइएको प्रहरीको भनाइ छ ।

प्रहरीलाई सुदीपका आफन्तले बताएअनुसार उनले केही महिना अघि जागिर छोडेका थिए र घरकै भूईंतलाको सटरमा पतिपत्नीले किराना पसल संचालन गर्दै थिए । यसका लागि उनले २ लाख रुपैयाँ ऋण लिएको र घर बैंकमा धितोमा रहेको पाइएको पनि प्रहरीले बताएको छ । छिमेकी र आफन्तले केही समयदेखि अधिकारीको घरमा झगडा भइरहने गरेको बताएको पनि प्रहरीले उल्लेख गरेको छ ।

प्रकाशित : भाद्र ३१, २०७७ १९:२३
प्रतिक्रिया
पठाउनुहोस्

कोरोनाबाट काठमाडौं र रामेछापका एक/एक जनाको मृत्यु

कान्तिपुर संवाददाता

काठमाडौँ — कोरोनाबाट काठमाडौं र रामेछापका एक/एक जनाको उपचारको क्रममा मृत्यु भएको छ । 

स्वास्थ्य कार्यालय ललितपुरका अनुसार भदौ ३० गते उनीहरुको ललितपुरका अस्पतालमा उपचारका क्रममा मृत्यु भएको हो ।

भदौ २९ गते सुमेरु अस्पतालमा भर्ना भएकी काठमाडौंकी ८१ वर्षीया महिलाको मंगलबार मृत्यु भएको हो ।

यस्तै,निदान अस्पतालमा उपचाररत रामेछापका ३६ वर्षीय पुरुषको मृत्यु भएको स्वास्थ्य कार्यालय ललितपुरद्वारा जारी विज्ञप्तिमा उल्लेख छ । उनी भदौ २४ गते अस्पतालमा भर्ना भएका थिए ।

प्रकाशित : भाद्र ३१, २०७७ १९:०७
पूरा पढ्नुहोस्
प्रतिक्रिया
पठाउनुहोस्
×