संक्रमितको सम्पर्कमा रहेकी साथीको रिपोर्ट नेगेटिभ

कान्तिपुर संवाददाता

भक्तपुर — कोरोना भाइरस (कोभिड–१९) संक्रमण पुष्टि भएकी सुनसरीकी २५ वर्षीय युवतीको प्रत्यक्ष सम्पर्कमा रहेकी साथीको ‘नासल स्वाब’ परीक्षणको रिपोर्ट नेगेटिभ आएको छ । राष्ट्रिय जनस्वास्थ्य प्रयोगशालामा परीक्षण गरिएकाे स्वाबको रिपोर्ट नेगेटिभ आएको भक्तपुर अस्पतालकी मेडिकल सुपरिटेन्डेन डा.सुमित्रा गौतमले बताइन् ।


एउटै कोठामा बसेकी साथीलाई कोरोना पोजिटिभ देखिएपछि बुधबार सहिद धर्मभक्त राष्ट्रिय प्रत्यारोपण केन्द्रमा कार्यरत उनको ‘नासल स्वाब’को नमुना परीक्षणको लागि राष्ट्रिय जनस्वास्थ्य प्रयोगशाला पठाइएको थियो । उनलाई भक्तपुर अस्पतालको आइसोलेसन वार्डमा राखिएको छ ।

स्वाबको रिपोर्ट नेगेटिभ आएपनि संक्रमितको प्रत्यक्ष सम्पर्कमा रहेको व्यक्तिलाई एक साता आईसोलेसनमै राख्ने अस्पतालले जनाएको छ । ‘एक सातापछि पुन: स्वाब परीक्षणको लागि पठाउँछौं’, मेडिकल सुपरिटेन्डेन्ट डा.गौतमले भनिन्, ‘पुन: परीक्षणको रिपोर्ट नेगेटिभ आएपछि पनि मापदण्ड अनुरुप क्वारेन्टाइनमा राख्नुपर्छ ।’

संक्रमितको परिवार र छिमेकी क्वारेन्टाइनमा

कोरोना भाइरस (कोभिड–१९) संक्रमण पुष्टि भएका व्यक्तिको प्रत्यक्ष सम्पर्कमा रहेका ७ जनालाई क्वारेन्टाइन र ३ जनालाई आइसोलेसनमा राखेको छ । प्रहरीका अनुसार भक्तपुरमा मंगलबार कोभिड–१९ संक्रमण पुष्टि भएका २७ वर्षीय युवककी पत्नी, छोरा, घरमा डेरा बस्ने २, छिमेकी र हजाम २ गरी ७ जनाको परीक्षण गरेर क्वारेन्टाइनमा राखेको छ । त्यस्तै, वैशाख २९ मा सुनसरीबाट आएर मध्यपुर थिमि नगरपालिका–४ शंखधर चोकस्थित साथीको घरमा बसेकी युवतीमा कोरोना संक्रमण पुष्टी भएपछि कोठासागैको १, एम्बुलेन्समा लिन आएको २ जनालाई आइसोलेसनमा र सुनसरी रामधुनी घरमा १९ र उपत्यका आउने क्रममा मोटरसाइकल चालकलाई क्वारेन्टाइनमा राखेको महानगरीय प्रहरी परिसर भक्तपुर प्रमुख एसपी सविन प्रधानले बताए ।

प्रकाशित : जेष्ठ १, २०७७ १३:३४
प्रतिक्रिया
पठाउनुहोस्

गोरखाको मुख्य नाका मझुवामा सेना खटाइयो

हरिराम उप्रेती

गोरखा — गोरखा प्रवेशको मुख्य नाका मझुवामा नेपाली सेना खटाइएको छ । जिल्ला सुरक्षा समितिको  निर्णय अनुसार बिहीबारबाट नेपाली सेना मझुवा नाकामा खटिएको हो । यसअघि उक्त नाकामा नेपाल प्रहरी र सशस्त्र प्रहरी खटाइएको थियो । अन्य जिल्लामा कोरोना संक्रमितको संख्या बढेपछि गोरखामा जेठ १ गतेदेखि ५ गते जिल्ला भित्रन कडाइ गरिएको छ । 

लकडाउनलाई थप प्रभावकारी बनाउन तीनवटै सुरक्षा निकाय परिचालन गरिएको प्रहरी प्रमुख एसपी ओम अधिकारीेले बताए । मझुवासहित गोरखा भित्रनै सबै नाकामा चौबिसै घण्टा सुरक्षा निगरानी बढाइएको उनले बताए । सुरक्षा समितिको निर्णय अनुसार धादिङबाट गोरखा प्रवेश गर्ने आरुघाट नाका र तनहुँबाट गोरखा प्रवेश गर्ने तुरतुरे नाकामा नेपाल प्रहरी र सशस्त्र प्रहरी खटिएका छन् । घ्याल्चोकको सिउरेनटार र च्याङलीको नयाँपुल नाकामा भने नेपाल प्रहरीलाई मात्र खटाइएको एसपी अधिकारीले बताए ।

नाका भएर आवागमन र ढुवानी पूर्ण रुपमा बन्द गरिएको छ । ५ गतेसम्म खाद्यान्न र निर्माण सामाग्री ढुवानीमा पनि रोक लगाइएको छ । रिफर गरिएका बिरामी बोक्ने एम्बुलेन्स, तत्काल उपचार आवश्यक परेका बिरामी बोक्ने सवारी साधान, वडा अध्यक्ष वा सोभन्दा माथिका जनप्रतिनिधिका सवारी साधन बाहेक अन्यलाई जिल्ला बाहिर जान पनि रोक लगाइएको छ ।

बिहीबार मात्र खाद्यान्न बोकेर आएको चारवटा सवारीलाई मझुवा नाकाबाट फिर्ता पठाइएको उनले बताए । अनावश्यक रुपमा हिडँडुल नगर्न पनि प्रशासनले सर्वसाधारणलाई अनुरोध गरेको छ । बिहीबार अनावश्यक रुपमा हिँडडुल गर्नेलाई सम्झाइबुझाइ गरेर छाडेको अधिकारीले बताए ।

लकडाउन कडाइ गरिएसँगै गोरखा सदरमुकाम सुनसान छ । आन्तरिक रुपमा हुने सवारी आउजाउमा पनि कडाइ गरिएको छ । एम्बुुलेन्स, सुरक्षाकर्मी र केही सरकारी कार्यालयका गाडी मात्र गुडेका छन् । बंैक तथा वित्तिय संस्था पनि बन्द छन् ।

प्रकाशित : जेष्ठ १, २०७७ १३:०३
पूरा पढ्नुहोस्
प्रतिक्रिया
पठाउनुहोस्
×