उपचारमा खटिँदा मृत्यु भएमा परिवारलाई १० लाख - उपत्यका - कान्तिपुर समाचार

उपचारमा खटिँदा मृत्यु भएमा परिवारलाई १० लाख 

सीमा तामाङ

(ललितपुर) — गोदावरी नगरपालिकाले कार्यक्षेत्रमा खट्ने क्रममा स्वास्थ्यकर्मी, जनप्रतिनिधि तथा कर्मचारीमा कोरोना संक्रमित भएमा उपचार नि:शुल्क र मृत्यु भएमा तिनका परिवारलाई १० लाख रुपैयाँ उपलब्ध गराउने भएको छ । 

गोदावरी नगर कार्यपालिकाको शनिबार बसेको आकस्मिक बैठकले उक्त निर्णय गरेको नगरप्रमुख गजेन्द्र महर्जनले बताए । उपचारको क्रममा स्वास्थ्यकर्मी बिरामी तथा अंगभंग भए त्यसको उपचार खर्चसमेत नगरपालिकाले ब्यहोर्ने जनाएको छ । जोखिम मोलेर कोरोना संक्रमण फैलन नदिन आआफ्नो ठाउँबाट सहयोग गरिरहेकाहरुको मनोबल बढाउन यो निर्णय गरिएको नगरप्रमुख महर्जनले बताए । ‘उहाँहरुको योगदानको सम्मान गर्न हामीले यो निर्णय गरेका हौं,’ उनले भने, ‘नगरपालिकाको यस निर्णयबाट स्वास्थ्यकर्मीलाई मनोबल उच्च राख्न मद्दत पुग्नेछ ।’


बैठकले कार्यक्षेत्रमा खटिएका स्वास्थ्यकर्मीलाई प्रतिदिन पाँच सय रुपैयाँका दरले प्रोत्साहन भत्ता दिनेसमेत दिने निर्णय गरेको नगरप्रमुख महर्जनले बताए । नगरपालिकाले कोरोना भाइरस जोखिम न्यूनीकरण गर्ने कामका लागि प्रत्येक वडालाई दुई लाख रुपैयाँ दिने निर्णयसमेत गरेको छ । नगरपालिकाभित्रका अपागंता भएका, एकल महिला, सुत्केरी (६ महिनासम्म) महिलाको विवरण संकलन गरी विशेष राहत प्याकेज तयार पार्ने निर्णय भएको उनले बताए ।


त्यसैगरी नगरपालिकाभित्र दैनिक ज्याला मजदुरीबाट जीवन निर्वाह गर्नेहरुको विवरण संकलन गरी राहत प्याकेज ल्याउने उनले जानकारी दिए । उनका अनुसार लकडाउनको अवधिभर स्वास्थ्य चौकीमा खटिएका स्वास्थ्यकर्मीलाई एक महिनामा २५ लिटरका दरले इन्धन दिने निर्णयसमेत बैठकले गरेको छ ।

नगरपालिकाले बज्रबाराही अस्पतालमा कोरोना संक्रमित बिरामी आएमा उनीहरुलाई राख्न १० बेडको ‘आइसोलेसन वार्ड’को व्यवस्था गरेको जनाएको छ ।

प्रकाशित : चैत्र १५, २०७६ २०:०३
प्रतिक्रिया
पठाउनुहोस्

संक्रमणको त्रासमा स्वास्थ्यकर्मी

३९ जना डाक्टरको दरबन्दी भएको डडेलधुरा अस्पतालमा सात जना मात्रै काममा
डाक्टर भन्छन्, ‘बिसञ्चो भए फोनबाटै सोध्नु, अस्पताल आउनु पर्दैन’
डीआर पन्त

(डडेलधुरा) — अजयमेरु गाउँपालिकाका हरिदत्त भट्ट सामान्य ज्वरो आएपछि डडेलधुरा अस्पताल पुगेका थिए । कोभिड–१९ संक्रमण त्रासका कारण सुनसान रहेको अस्पतालमा भेटिएका एकजना चिकित्सकले उनलाई जाँच गरेपछि अस्पताल आउनुभन्दा आफूलाई भएको समस्या टेलिफोनबाट सोध्न आग्रह गरे । 


‘डाक्टरको अवस्था दयनीय थियो,’ भट्टले भने, ‘झर्को मान्दै जाँच गरे र गाउँघरका अरुलाई पनि फोनबाटै सोध्न भनिदिनु होला भने ।’ धेरै समस्या भयो भने मात्र अस्पताल आउन डाक्टरले भनेको उनले सुनाए ।

दुई डाक्टरद्वारा राजीनामा
डडेलधुरा अस्पतालमा करारमा नियुक्त भएका दुई डाक्टरले राजीनामा गरेका छन् । कोरोना संक्रमणको त्रासका कारण उनीहरुले राजीनामा गरेको अस्पताल स्रोतले जनाएको छ । अस्पतालका मेसु डा. जगदिशचन्द्र बिष्टले भने पारिवारिक कारणले राजीनामा गरेको दाबी गरे । केही साताअघि मात्र नियुक्त भएका दुवै चिकित्सकले साताअघि राजीनामा गरेको उनले जानकारी दिए ।

३९ जना डाक्टरको दरबन्दी भएको डडेलधुरा अस्पतालमा अहिले आठ जना मात्रै छन् । त्यसमा पनि एकजना सुत्केरी बिदामा छिन् ।
सुदूरपश्चिम प्रदेशका सात पहाडी जिल्लाको सुविधासम्पन्न भनिएको डडेलधुरा अस्पतालको स्थिति हो यो । पहाडी जिल्लाको केन्द्रमा रहेको डडेलधुरा अस्पताल सरकारले दुई वर्षअघि घोषणा गरेको देशका सुविधासम्पन्न पाँच वटामध्ये एक हो । अस्पतालमा अहिलेसम्म कोरोना संक्रमितको उपचार गर्दा चिकित्सकले प्रयोग गर्ने विशेष पहिरन, जाँच गर्ने किट्स र अन्य कुनै पनि सुविधा छैनन् । केही थान पीपीई दुई दिनअघि आइपुगेको अस्पतालले जानकारी दिएको छ । प्रदेश सरकारले अन्य अस्पतालहरूलाई चार दिनअघि विशेष बजेट दिए पनि डडेलधुरा अस्पतालले पाएको छैन ।

‘जाँच गर्दा प्रयोग गर्ने केही थान कपडा र नमूना संकलन गर्ने केही किट्सबाहेक अरु पुरानै अवस्था हो, कोरोनाको लक्षण भएका बिरामी आए जाँच गर्ने व्यवस्था मिलाइएको छ,’ मेसु बिष्टले भने, ‘छुट्टै फिभर क्लिनिक पनि सञ्चालन गर्ने तयारीमा छौं ।’ नमूना संकलन गर्ने सामग्रीको तयारी पनि भएको उनले जानकारी दिए । बिरामीको चाप नहुँदासम्मका लागि सामग्री रहेको, चाप निकै बढ्यो भने मात्रै समस्या आउनसक्ने उनले बताए ।

प्रकाशित : चैत्र १५, २०७६ १९:५३
पूरा पढ्नुहोस्
प्रतिक्रिया
पठाउनुहोस्
x
×