पशुपतिका व्यापारीलाई सारिँदै

कान्तिपुर संवाददाता

काठमाडौँ — पशुपतिको खुला क्षेत्रमा फूललगायत पूजा सामग्री व्यापार गर्दै आएकालाई चार चरणमा व्यवस्थापन गरिने भएको छ । पशुपति क्षेत्र विकास कोषले पहिलो चरणमा २६ जनालाई नयाँ भवनमा व्यवस्थापन गर्ने प्रक्रिया थालेको जनाएको छ । प्रक्रियाअनुसार आएकालाई पहिलो चरणमा फागुन २ गतेभित्र व्यवस्थापन गर्ने कोषको सेवा सुविधा महाशाखा प्रमुख राजु रेग्मीले बताए । 

ZenTravel

कोषले फूल व्यापारीलाई व्यवस्थित गर्न ६४ वटा कोठा भएको भवन बनाएको छ । त्यो भवनमा सबै नअट्ने भन्दै व्यवसायीले विरोध गरेका थिए । पशुपति मन्दिरअगाडि १६४ जना व्यापारी छन् । अर्को भवन बनाएर ती सबैलाई व्यवस्थित गरिने कोषले जनाएको छ । फागुन २ गते २६ जनालाई व्यवस्थित गर्ने र बाँकीलाई छ महिनाभित्र अर्को नयाँ भवन बनाएर राखिने कोषको सञ्चालक परिषद् सदस्य राजु खत्रीले जानकारी दिए ।

Meroghar


२०५८ सालमा कोषले पशुपति अधिग्रहण गरेर यहाँका ११९ घर हटाएपछि ती घरमा पसल सञ्चालन गर्नेलाई टहरामा राखेको थियो । घरधनी र भाडामा पसल सञ्चालन गर्नेको संख्या १४६ थियो । पछि थप २० जना थपेर १६४ जनालाई कोषले टहराको व्यवस्था गरेको थियो । घर पर्ने पहिलो प्राथमिकता र भाडामा बस्नेलाई दोस्रो प्राथमिकतामा परेका थिए ।

कोषले टहरा व्यवस्थित गर्न खत्रीको संयोजकत्वमा तीन सदस्यीय समिति गठन गरेको छ । समितिले टहराको छानबिन गरेर व्यवस्थित गर्नुपर्ने संख्या तोक्नेछ । कोषले घर भत्काएकालाई टहरा उपलब्ध गराए पनि त्यहीँभित्र किनबेच गरेर अरूलाई पसल दिइएको जनाएको छ । त्यसबारे पनि समितिले छानबिन गर्नेछ । यसका लागि तीनवटा मापदण्ड बनाएको महाशाखा प्रमुख रेग्मीले जानकारी दिए । एउटै परिवारका धेरै जनाले पसल चलाएका छन् भने तिनलाई एकै ठाउँमा व्यवस्थापन गर्ने, कानुनका दृष्टिले कोही छुटेका छन् भने त्यसलाई मान्यता दिने र पशुपति क्षेत्रभित्रै वडा नम्बर ८ का छन् भने तिनलाई प्राथमिकता दिएर बाहिरकालाई हटाउने गरी तीन वटा मापदण्ड कोषले बनाएको छ । ‘पशुपति क्षेत्रकाले हामीले केही सुविधा पाएनौं भन्ने गुनासो कोषसँग गर्ने गरेका छन्,’ खत्रीले भने, ‘खाइपाइ आएका कसैलाई पनि नछुटाउने गरी व्यवस्थापन गर्छौं ।’

पशुपति क्षेत्रका मुलसडक, सहायक सडकका पेटी, डबली, खुला चौर, कैलाशडाँडा, मृगस्थली, गोरखनाथ क्षेत्र, वनगणेश, पञ्चदेवल वृद्धाश्रम, भुकुण्डोललगायत क्षेत्रमा अव्यवस्थित टहरामा व्यापार हुँदै आएको छ । यसबाट पशुपतिको सौन्दर्यमा नकारात्मक असर पर्नुका साथै भक्तजन, पर्यटक र पैदलयात्रीलाई अप्ठेरो परेको छ ।

प्रकाशित : माघ २९, २०७६ ०७:३४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

राप्ती किनारमा ‘अम्ब्रेला स्ट्रिट’

पटिहानीको घटगाई राप्ती किनारमा अम्ब्रेला स्ट्रिट तयार भएको हो । यहाँबाट सूर्यास्तको मनोरम दृश्य देखिन्छ । 
रमेशकुमार पौडेल

(चितवन) — सरकारले सय पर्यटकीय गन्तव्यभित्र समावेश गरेको चितवनको पटिहानीमा ‘अम्ब्रेला स्ट्रिट’ बनाइएको छ । भरतपुर महानगरपालिका–२२ मा पर्ने उक्त स्ट्रिटको लम्बाइ १२० मिटर रहेको छ । ९० मिटरसम्म ४८० वटा रंगिन छाता राखिएको छ । आडैमा रङ फेरिरहने वाटर फाउन्टेन (पानीको फोहरा) र सूर्यास्त नियाल्न मिल्ने ठाउँ पनि छ । पर्यटकलाई थप मोहित पार्न मानवनिर्मित थप संरचना पनि पटिहानीवासीले तयार गरेको वडाध्यक्ष विष्णुराज महतोले जानकारी दिए । 

पटिहानीको घटगाई राप्ती किनारमा अम्ब्रेला स्ट्रिट तयार भएको हो । घटगाईबाट सूर्यास्तको मनोरम दृश्य देखिन्छ । पश्चिममा सूर्य अस्ताउँदै गर्दा राप्ती नदीको पानी पनि रंगिन हुन थाल्छ । सूर्यास्त हेर्नका लागि आइरहेका पर्यटकले अब अम्ब्रेला स्ट्रिटको रंगिचंगी पनि देख्न पाउनेछन् ।

यी छातामुनिबाट जब मान्छेहरू नदी किनारतर्फ बढ्छन्, आडैमा खुला प्लेटफर्म भेटिन्छ । दुई तहको प्लेटफर्मको माथिल्लो खण्डको खुला भागमा दायाँबायाँ पटिहानीको जनजीवन झल्कने १० वटा ठूला चित्र राखिएका छन् । पहिटानी आदिवासी थारू र बोटे समुदायको बसोबास क्षेत्र हो । चित्रमा उनीहरूको रहनसहन र संस्कार अंकित छन् । बीचमा ठूलो वाटर फाउन्टेन छ, जहाँ फरकफरक रङका बत्ती बल्छन् । रात छिप्पिँदै जाँदा फाउन्टेनको रङ पनि गाढा हुँदै जान्छ । पटिहानी पर्यटन विकास समितिका अध्यक्ष शंकर थपलियाले सूर्यास्त हेर्न आउने पर्यटकलाई केही समय रमाउने वातावरण बनेको बताए । ‘घटगाई घाटबाट देखिने सूर्यास्त मनोरम छ । त्यही दृश्य हेर्न पर्यटक यहाँ आउँछन्,’ थपलियाले भने, वाटर फाउन्टेनको रंगिन वातावरणमा रमाउँदै रात छिप्पिएपछि होटल फर्कन्छन् ।’

सदरमुकाम भरतपुरबाट लगभग १८ किलोमिटर पश्चिम–दक्षिणमा पटिहानीको घटगाई पर्छ । घटगाईको आडैबाट राप्ती नदी बग्छ । चितवन राष्ट्रिय निकुञ्जको हरियो जंगल छ । नदीमा अनेक चरा देखापर्छन् । साँझ पर्दै जाँदा चित्तलको बथान र प्रायजसो गैंडा पनि पानी खान राप्ती तीरमा आउने गर्छन् । अम्ब्रेला स्ट्रिटमा आउनेहरूले यो दृश्य पनि हेर्न पाउने वडाध्यक्ष विष्णुराज महतोले बताए ।

पर्यटन प्रवर्द्धनका लागि तयार भएको यस्तो संरचनाका लागि भरतपुर महानगरपालिकाले डेढ करोड रुपैयाँ, संघीय सरकारको पर्यटन मन्त्रालयबाट एक करोड र वडा कार्यालयले ५० लाख रुपैयाँ खर्च गरेको वडाध्यक्ष महतोले जानकारी दिए । क्षेत्रीय होटल संघ कसरा सेक्टरका संयोजक गणेश पौडेलले यस्ता संरचना बने पनि प्राकृतिक सौन्दर्यमा असर नपर्ने गतिविधि हुनुपर्ने बताए । ‘निकुञ्ज आउने पर्यटक प्राकृतिक वातावरणमा रमाउँछन् । मानवनिर्मित अन्य संरचना तयार गर्नु नराम्रो होइन,’ उनले भने, ‘तर निकुञ्ज नजिक बन्ने संरचना प्राकृतिक वातावरण अनुकूल हुनुपर्छ ।’

प्रकाशित : माघ २९, २०७६ ०७:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×