गोदावरी सम्मेलन हल अन्तिम चरणमा- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

गोदावरी सम्मेलन हल अन्तिम चरणमा

दीपेन्द्र विष्ट

काठमाडौँ — ललितपुरको गोदावरीमा ३ हजार क्षमताको सम्मेलन केन्द्र निर्माण अन्तिम चरणमा पुगेको छ । आधुनिक र प्रविधियुक्त यो केन्द्र फागुन अन्तिमसम्ममा बनिसक्ने सहरी विकास मन्त्रालयका एक अधिकारीले बताए । 

‘निर्माण अन्तिम चरणमा छ, नयाँ वर्षमा उद्घाटन हुन्छ होला,’ ती अधिकारीले भने । निर्माणस्थलमा रुख कटान गर्नुपर्ने भएकाले केही ढिलाइ भएको उनले बताए । ‘फागुनअघि निर्माण हुनेवाला थियो, करिब ३० रुख कटान गर्नुपर्ने भएकाले अलि ढिलाइ भयो,’ उनले भने ।


अन्तर्राष्ट्रियस्तरको प्रदर्शनी, सभा/सम्मेलन तथा कार्यक्रम गर्न मिल्ने हलको अभाव देखिएपछि भदौ ४ र कात्तिक २० मा मन्त्रिपरिषद् बैठकले विशेष निर्णयका आधारमा ५ महिनाभित्र हल निर्माणका लागि मन्त्रालयलाई निर्देशन दिएको थियो । त्यसलगत्तै सहरी विकास तथा भवन निर्माण विभागले टेन्डर आह्वान गरी निर्माण प्रक्रिया अघि बढाएको हो । भदौमा भएको बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) को चौथो सम्मेलन आयोजना गर्न सरकारलाई समस्या परेपछि सभाहल बनाउने निर्णय गरिएको ती अधिकारीले बताए ।


‘सरकारको यो विशेष निर्णय हो, अब चाँडै सम्पन्न हुन्छ,’ विशेष भवन निर्माण आयोजना समन्वय कार्यालयका इन्जिनियर देवन्द्रदेव खनालले भने, ‘रातदिन काम भइराखेको छ ।’ सरकारले तोकेको ठेक्का अवधिभित्रै काम सम्पन्न हुने उनले बताए । ‘चैत्र २० सम्म बनिसक्नुपर्ने ठेक्काको अवधि हो, त्यसभित्रै सम्पन्न हुन्छ,’ खनालले भने, ‘दैनिक २ सयभन्दा बढी कामदारले काम गरिराखेका छन् ।’ ४३ रोपनी १५ आना क्षेत्रफलमा निर्माण भइराखेको उक्त सम्मेलन केन्द्रका लागि सरकारले ७२ करोडभन्दा बढी बजेट लागत अनुमान गरेको थियो । पछि ठेक्का लगाउँदा ५८ करोड २४ लाख रुपैयाँमा सम्झौता भएको हो । केसी सामान्तर जेभीले निर्माण गरिराखेको खनालले बताए । ११ रोपनी १४ आनामा सम्मेलन केन्द्र, ३ रोपनी ३ आनामा आन्तरिक सडक, १६ रोपनी २ आनामा बगैंचा तथा हरियाली उद्यान र १३ रोपनी १ आनामा पार्किङ स्थल रहनेछ ।


यसरी एउटै हलमा एकै पटक ३ हजार मानिस बसेर सभा तथा सम्मेलन गर्न सक्ने मुलुककै पहिलो भवन निर्माण हुन लागेको इन्जिनियर खनालले बताए ।


मुख्य हल प्रवेश गर्नुअघि उत्तर र दक्षिण दिशामा साना दुई बहुउद्देश्यीय हल निर्माण हुने उनले बताए । दुई तला उचाइ बराबरको हल हुनेछ । यसका साथै उक्त भवनमा विशिष्ट व्यक्तिका विशिष्ट कक्ष, सहायता कक्ष र विभिन्न समयमा कार्यक्रमका लागि आदानप्रदान कक्षसमेत निर्माण हुनेछन् । मुख्य हलमा ३ हजार सिट, कार्यक्रम प्रस्तुतिका लागि मञ्च, आवश्यक कक्षको समेत व्यवस्था गरिएको छ ।


कार्यालय कक्ष, विशिष्ट कक्ष, सहायता कक्ष भएको ब्लक ३ तलाको हुनेछ, जसमा आवश्यकताअनुसारको शौचालयको व्यवस्थासमेत गरिएको छ । मुख्य हलसँगै निर्माण हुने साना तथा अन्य कक्षको ब्लक समेटी एउटै हलको निर्माण हुनेछ । सहरी विकास तथा भवन निर्माण विभागका महानिर्देशक मणिराम गेलालले यसपछि भक्तपुरमा ५ हजार क्षमताको सम्मेलन हल निर्माणको तयारी भइरहेको बताए । ‘सभासम्मेलन गर्न बढी सिट क्षमताको हल निर्माणकाको आवश्यकता थियो, केही रूपमा यसले पूरा गर्छ,’ उनले भने, ‘त्यसपछि ठूलो क्षमताको निर्माण हुन्छ ।’

प्रकाशित : माघ २१, २०७६ ०८:०६
प्रतिक्रिया
पठाउनुहोस्

अब फेरि इम्बोस्ड नम्बर प्लेट

दीपेन्द्र विष्ट

काठमाडौँ — भौतिक पूर्वाधार तथा यातायात मन्त्रालयले सवारी साधनमा आधुनिक प्रविधियुक्त इम्बोस्ड नम्बर प्लेट जडानलाई निरन्तरता दिने तयारी गरेको छ । सवारी साधनमा इम्बोस्ड नम्बर प्लेट राख्ने कार्य रोक्न माग गर्दै परेको रिट सर्वोच्च अदालतले खारेज गरेपछि पुनः प्लेट जडानको बाटो खुलेको हो ।


पर्यटन व्यवसायी भरतकुमार बस्नेतले हालेको रिट गत मंसिरमा प्रधानन्यायाधीश चोलेन्द्रशमशेर राणासहित पाँच न्यायाधीशको संवैधानिक इजलासले खारेज गरेपछि मन्त्रालयले नम्बर प्लेट जडानलाई निरन्तरता दिन लागेको हो । बस्नेतले प्रधानमन्त्री तथा मन्त्रिपरिषद्को कार्यालयलाई समेत विपक्षी बनाई सर्वोच्चको संवैधानिक इजलासबाट हेरिने गरी ६ फागुन ०७४ मा रिट दर्ता गराएका थिए ।

देवनागरीको सट्टा अंग्रेजीमा नम्बर प्लेट लेखेको भन्दै सर्वोच्चमा रिट हालिएको थियो । त्यसपछि तत्कालीन प्रधानन्यायाधीश गोपाल पराजुलीको इजलासले १० फागुन ०७४ मा ‘अंग्रेजीमा उल्लेख भएको इम्बोस्ड नम्बर प्लेट वितरण नगर्न/नगराउन’ अन्तरिम आदेश दिएको थियो ।

सर्वोच्चको आदेशपछि झन्डै २ वर्षदेखि रोकिएको इम्बोस्ड नम्बर प्लेटको काम अघि बढाउने बाटो खुलेको भौतिक पूर्वाधार तथा यातायातका मन्त्रालयका एक उच्च अधिकारीले बताए । ‘अब केही दिनमै इम्बोस्ड नम्बर प्लेट जडान हुन्छ,’ ती अधिकारीले भने, ‘यातायात व्यवस्था विभागलाई निर्देशन दिइसकेका छौं ।’ उनका अुनसार विभागले त्यसबारे तयारी गरिरहेको जनाएको छ । पाँच वर्षअघि बंगलादेशी कम्पनी डेकाटुर टाइगरसँग ५ वर्षमा २५ लाख नम्बर प्लेट छाप्ने गरी ४ अर्ब ९० करोड २० लाख (४३ मिलियन डलर) को सम्झौता भएको थियो ।

यातायात व्यवस्था विभागका अनुसार हालसम्म करिब ४ हजार ६ सयवटा सवारी साधनमा इम्बोस्ड नम्बर प्लेट जडान गरिसकिएको छ ।

सरकारसँग ०७३ जेठ १७ मा गरेको सम्झौतामा बंगलादेशी कम्पनी डेकाटुर टाइगरले ५ वर्षभित्र २५ लाख इम्बोस्ड नम्बर नेपाल सरकारलाई उपलब्ध गराउने उल्लेख छ । सम्झौताअनुसार ०७८ जेठभित्र २५ लाख सवारी साधनमा इम्बोस्ड नम्बर प्लेट जडान गर्नुपर्नेछ । तर, ठेक्का अवधि करिब १६ महिनामात्र बाँकी रहेकाले विभागले कम्पनीसँग सम्झौता गरेर म्याद थप्ने तयारीसमेत गरेको मन्त्रालयका ती अधिकारीले बताए । ‘म्याद बढाउनुको विकल्प छैन,×’ ती अधिकारीले भने, ‘अब बरु चाँडै कसरी काम सिध्याउने भन्नेबारे सोच्नुपर्छ ।’ विभागले मोटरसाइकललाई २ हजार ५ सय, तीनपाङ्ग्रे सवारीलाई २ हजार ९ सय, चारपाङ्ग्रे सवारीलाई ३ हजार २ सय र हेभी सवारीलाई नम्बर जडान गर्न ३६ सय रुपैयाँ शुल्क निर्धारण गरेको थियो ।

सवारी साधन तथा सवारीधनीको विवरण उल्लेख गरी राजस्व तिरे/नतिरेको जानकारी लिन सकिने गरी इम्बोस्ड नम्बर प्लेट जडान गरिन्छ । आधुनिक प्लेटमा रेडियो फ्रिक्वेन्सी इन्फर्मेसन डिभाइस र आईएफआईडी जडान गरिने भएकाले सवारीसाधन कुन अवस्थामा छन् भन्ने सजिलै पत्ता लगाउन सकिने उनले बताए । उपत्यका भित्रिने ५ र बाहिरिने ५ स्थानमा आईएफआईडी स्टेसन राखिने विभागको योजना छ । विभागका अनुसार नेपालमा हाल १४ किसिमका नम्बर प्लेट गाडीमा राख्ने गरिन्छ ।

यातायात विभागका महानिर्देशकले इम्बोस्ड नम्बर प्लेट जडान केही दिनभित्र सुरु हुने बताए । ‘प्रक्रिया अघि बढिसकेको छ, केही दिनमै जडान गर्छौं,’ विभागका महानिर्देशक गोगन हमालले भने । उनले प्लेट जडानका लागि सम्झौता गरिएको कम्पनीलाई सम्पर्कमा आउन पत्राचार गरिसकिएको जनाए ।

मुद्दा पर्नुअघि विभागले जडान गरेका करिब ४ हजार नम्बर प्लेटमा विवरण अद्यावधिक गरी ‘वाग्मती’ प्रदेश राख्नुपर्ने भएको छ । त्यहीबेला प्रदेशको नामकरण नगरिएको भन्दै अब प्रदेश ३ को सट्टा वाग्मती राखिने भएको हो ।

प्रकाशित : माघ १४, २०७६ २१:५५
पूरा पढ्नुहोस्
प्रतिक्रिया
पठाउनुहोस्
×