ओबामाको पुस्तक पहिलो दिनमै झन्डै ९ लाख प्रति बिक्यो- साहित्य/विविध - कान्तिपुर समाचार

ओबामाको पुस्तक पहिलो दिनमै झन्डै ९ लाख प्रति बिक्यो

एजेन्सी

काठमाडौँ — अमेरिकाका पूर्वराष्ट्रपति बाराक ओबामाको नयाँ पुस्तक ‘अ प्रमिस्ड ल्यान्ड’ सार्वजनिक भएको पहिलो दिनमै अमेरिका र क्यानडामा मात्रै करिब ८ लाख ९० हजार प्रति बिक्री भएको छ । ओबामाको पुस्तक अमेरिकाका अन्य राष्ट्रपतिका संस्मणरणभन्दा धेरै बिक्री हुने अनुमान गरिएको छ । 

प्रकाशन गृह पेन्गुइन ऱ्यान्डम हाउसका अनुसार पहिलो दिनको बिक्रीमा अग्रिम अर्डर, इ–बुक र अडियो बुकको संख्यासमेत जोडिएको छ । पहिलो दिनको बिक्रीले आफूहरुले निकै उत्साहित भएको पेन्गुइन ऱ्यान्डम हाउसको सहप्रकाशन समूह क्राउनका डेभिड ड्रेकले बताए । ओबामाको पुस्तक नोभेम्बर १७ मा सार्वजनिक भएको हो ।

यसअघि ओबामा पत्नी मिसेलको संस्मरण ‘बिकमिङ’ पहिलो दिनमा उत्तर अमेरिकामा ७ लाख २५ हजार प्रति बिक्री भएको थियो । सन् २०१८ मा प्रकाशित उक्त पुस्तक अहिलेसम्म विश्वभर गरेर एक करोड प्रतिभन्दा बढी बिक्री भइसकेको छ ।

पूर्वराष्ट्रपति बिल क्लिन्टनको संस्मरण ‘माई लाइफ’ पहिलो दिनमा उत्तर अमेरिकामा मात्रै करिब ४ लाख प्रति बिक्री भएको थियो भने जर्ज डब्लू बुसको ‘डिसिजन प्वाइन्ट्स’ झन्डै २ लाख २० हजार प्रति बिक्री भएको थियो । अहिलेसम्म क्लिन्टनको उक्त पुस्तक ३५ लाख र बुसको संस्मरण करिब ४० लाख बिक्री भएको छ ।

सार्वजनिक भएको पहिलो दिनमै सबैभन्दा बढी बिक्री हुने पुस्तकचाहिँ जे के रोलिङको ‘ह्यारी पोर्टर एन्ड द डेथ्ली हलोज’ हो । सन् २००७ मा प्रकाशित उक्त पुस्तक पहिलो २४ घण्टामै ८० लाखभन्दा बढी बिक्री भएको थियो ।

ओबामाको पुस्तक प्रकाशन नहुँदै चर्चामा आएको थियो । बाराक ओबामा र मिसेल ओबामाको पुस्तक प्रकाशनका लागि क्राउन पब्लिकेसनले करिब ६ करोड डलर तिरेको बताइएको छ ।

ओबामाको नयाँ पुस्तकमा सन् २०१० मा आफ्नो भारत भ्रमणका बारेमा पनि चर्चा गरेका छन् । साथै उनले आफ्नो भारत भ्रमणका क्रममा तत्कालीन प्रधानमन्त्री मनमोहन सिंह, कांग्रेस नेतृ सोनिया गान्धी र कांग्रेस नेता राहुल गान्धीसँगको भेटका बारेमा पनि चर्चा गरेका छन् । राहुल गान्धीमाथि गरेको टिप्पणीले भारतीय सञ्चारमाध्यममा निकै बहस पनि भएको थियो । ओबामाले राहुललाई ‘अपरिपक्व’ व्यक्तिको रुपमा टिप्पणी गरेको बताइएको छ ।

त्यस्तै पुस्तकमा ओबामाले आफ्नो दुई कार्यकालका अनुभव, ओसामा बिन लादेनमाथिको आक्रमण र ट्रम्पको उदयमाथि पनि चर्चा गरेको बताइएको छ ।

ओबामाले यसअघि नै लेखेका पुस्तक ‘ड्रिम्स फ्रम माई फादर’ र ‘द अडासिटी अफ् होप’ लाखौं प्रति बिक्री भइसकेका छन् ।

प्रकाशित : मंसिर ४, २०७७ १२:५८
प्रतिक्रिया
पठाउनुहोस्

बबई नदीमा सेना बेपत्ता

कमल पन्थी

बर्दिया — बुधबार वनभोज खान गएका नेपाली सेनाका सिपाही बारबर्दिया नगरपालिका—१ स्थित बबई नदीमा बेपत्ता भएका छन् । वनभोज खान पुगेका बारबर्दिया—७ का अन्दाजी २६ वर्षीय विष्णु रनपाल साँझ करिब ५ बजे बेपत्ता भएको प्रहरी उपरीक्षक केदार रोजौरेले बताए ।

भद्रकाली गण, काठमाडाैंमा कार्यरत उनको परिचयपत्र वनभोज स्थलमा फेला परेकोले उनी नेपाली सेनामा कार्यरत रहेको प्रहरी उपरीक्षक रोजौरेले जनाए । प्रहरीले वनभोज खान पुगेका दुई समूहबीच विवाद हुँदा झडप भएपछि उनी बेपत्ता भएको प्रारम्भिक अनुसन्धानमा खुलेको छ । घटनाका सम्बन्धमा प्रहरीले अनुसन्धानका लागि तीन जनालाई नियन्त्रणमा लिएको छ ।

सिपाहीको खोजी बुधबार साँझदेखि भइरहेको छ । प्रहरी निरीक्षकको कमान्डमा भुरीगाउँ र बनियाभारबाट प्रहरी टोली उद्दारका लागि खटिएको प्रहरीले जनाएको छ । बिहीबार थप खोजीका लागि सशस्त्र प्रहरी बल परिचालन गरिने भएको छ ।

प्रकाशित : मंसिर ४, २०७७ १२:५५
पूरा पढ्नुहोस्
प्रतिक्रिया
पठाउनुहोस्
×