९० वर्षीय लेखकले भने– ‘म अब धेरै बाँच्नेछु’- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

९० वर्षीय लेखकले भने– ‘म अब धेरै बाँच्नेछु’

मनोज बोगटी

(दार्जिलिङ) — दार्जिलिङमा यस्ता धेरै साहित्यकार छन्, जसको चर्चा सतहमा हत्तपत्त देखा पर्दैन । इन्द्रबहादुर राईसित लामो समय सहकार्य गरेका पुराना साहित्यकार सुखनमको नाम भने यसपटक ह्वात्तै चर्चामा आयो । यसको कारण थियो, दुइवटा संस्थानले उनलाई प्रदान गरिने भनिएको पुरस्कारको घोषणा । दान खालिङ साहित्य सम्मान र बद्रीनारायण स्मृति पुरस्कार ।

अघिल्लो वर्ष नै घोषणा भएको दुईमध्ये बद्रीनारायण स्मृति पुरस्कार ग्रहण गर्न डुवर्सको बाग्राकोट आइपुगेका लेखक सुखनम हर्षित मुद्रामा देखिए । बद्रीनारायण प्रधान स्मृति प्रतिष्ठानले ९३ औं बद्री जयन्तीकै छेक पारेर उनलाई पुरस्कार प्रदान गरेको हो । ‘मैले तीन कुरा कहिल्यै सोचेको थिइनँ,’ पुरस्कार ग्रहण गर्दै गर्दा सुखनमले भने, ‘एक दिन म पनि लेखक बन्नेछु, बुढेसकालमा मलाई पनि कसैले सम्झनेछन् र कुनै दिन म पनि पुरस्कृत हुनेछु । हो, यही कुरा मैले कहिल्यै सोचिनँ ।’


७० वर्षदेखि उनी लेखनमा छन् । नेपाली भाषा–साहित्यका ११ कृति प्रकाशित छन् । यिनी दार्जिलिङका नामी अनुवादक, इतिहासकार अनि कथाकार हुन् ।


नाम सुखछिरिङ नम्फोक (लेप्चा) भए पनि नाम र जातबाट अघिल्ला शब्द जोडेर सुखनम नाम बनाएर लेखनमा आएका यी लेखकको खासै चर्चा थिएन । केही वर्षअघि साहित्यकार जीवन नामदुङले ‘सुखनमका कथाहरू’ प्रकाशित गरेदेखि साहित्यकार र संघसंस्थाहरूको आँखा उनीमाथि परेको हो ।


‘मैले प्रगतिशील लेखक बद्रीनारायण प्रधानसित जीवनमा तीनपल्ट मात्र भेट्न पाएँ,’ ९० वर्षीय सुखनमले भने, ‘विचारलाई जीवनशैली बनाउने लेखकको नामबाट पुरस्कृत हुन पाउँदा खुसी छु । यो ऊर्जाबाट म अब धेरै बाँच्नेछु । धेरै काम गर्नेछु ।’


उनकै समकालीन साहित्यकार कृष्णसिंह मोक्तानको बाहुलीबाट उनलाई पुरस्कार प्रदान गरिएको थियो । कार्यक्रममा नरबहादुर दाहाल, डा. हर्कबहादुर छेत्री, मीमलाल सापकोटा, सखमन मोक्तान अनमोल प्रसाद, रेमिका थापालगायतका साहित्यकार थिए ।

प्रकाशित : माघ ८, २०७६ ०९:४८
प्रतिक्रिया
पठाउनुहोस्

अमेरिकामा पनि पुग्यो ‘रहस्यमयी’ कोरोनाभाइरस

एजेन्सी

वाशिंगटन — गत महिना चीनको वुहानमा देखिएको 'रहस्यमयी' कोरोनाभाइरस अमेरिकामा पनि पुगेको छ । अमेरिकाको रोग नियन्त्रण तथा रोकथाम केन्द्र(सीडीसी)ले मंगलबार अमेरिकामा कोरोनाभाइरसको पहिलो संक्रमणका बारेमा जानकारी गराएको हो । बिरामीको परिचय नखुलाए पनि वाशिंगटनको प्रोभिडेन्स रिजनल मेडिकल सेन्टरको आइसोलेसन वार्डमा उनको उपचार भइरहेको सीडीसीले जनाएको छ ।

सीडीसी अधिकारीहरुका अनुसार वुहानबाट भर्खरै फर्किएका ३० वर्षीय अमेरिकी नागरिकमा कोरोनाभाइरसको संक्रमण देखिएको हो । उनी जनवरी १५ मा वुहानबाट सियाटल फर्किएका थिए । उनी जनवरी १९ मा अस्पताल गएका थिए । उनी चीनबाट फर्किएको चार दिनपछि बिरामी परेका थिए । बिरामीको लक्षणअनुसार चेक गर्दा उनमा कोरोनाभाइरसको संक्रमणको पुष्टि भएको हो ।

स्वास्थ्य अधिकारीले उनी कोको सँग सम्पर्कमा थिए भन्ने अनुसन्धान गरिरहेको बताएको छ ।

अमेरिकाले चीनबाट(विशेषगरी वुहान) फर्किने यात्रुहरुलाई स्वास्थ्य जाँचपछि मात्रै प्रवेश दिने भएको छ । विमानस्थलमा शरीरको तापक्रम, खकार र स्वासप्रश्वासलगायतका स्वास्थ्य जाँच गरिनेछ डब्लूएचओका अनुसार विश्वमै पहिलोपटक चीनको वुहानकै समुद्री खाद्य बजारमा यो भाइरस देखिएको हो। हालसम्म उक्त भाइरसबाट संक्रमित अधिकांश बिरामी समुद्री खाद्य बजारमा काम गर्ने छन्। हालसम्म यस भाइरसबाट सयभन्दा बढी बिरामी परेका छन् भने ९ जनाको मृत्यु भइसकेको छ। कोरोनाभाइरस ऊट, बिरालो, चमेरोसहित थुप्रै पशुमा प्रवेश गरिरहेको छ। चीनका सरकारी अधिकारीका अनुसार यो भाइरस एक व्यक्तिबाट अर्को व्यक्तिमा सरेको स्पष्ट प्रमाण भने छैन।

कोरोना भाइरसको समूहको एउटा हिस्सा हो, जसबाट सामान्य रुघाखोकीदेखि लिएर घातक रोगसम्म हुन सक्छ । कोरोना भाइरसको संक्रमण सामान्यतया पशु र मानिसमा हुन्छ र हाल यस्ता कतिपय भाइरस छन्, जो पशुमा भए पनि मानिस त्यसबाट संक्रमित भएका छैनन् । सन् २००३ मा चीनलगायत एसियामा यस्तै सार्स भाइरस (सिभियर एक्युट रेस्पिरेटरी सिन्ड्रोम) फैलिएको थियो । यसको विस्तार उत्तरी अमेरिका, दक्षिण अमेरिका र युरोपसम्म देखिएको थियो । त्यसयता यो संक्रमणबाट चीनमा ६ सय ४६ जनाको मृत्यु भएको थियो भने विश्वभरमा मर्नेको संख्या ८ सय १३ पुगेको थियो ।

सम्बन्धित समाचार

'कोरोना भाइरसको जोखिम नेपालमा पनि'

‘कोरोना’ को शंकामा निगरानी


प्रकाशित : माघ ८, २०७६ ०९:४४
पूरा पढ्नुहोस्
प्रतिक्रिया
पठाउनुहोस्
×