छायाँको लस्करमा कालीचरण

कान्तिपुर संवाददाता

काठमाडौँ — जीवशास्त्रका प्राध्यापक केआर खम्बूले आफ्नो राजनैतिक तथा शैक्षिक जीवनबारे लेखेको स्मरणात्मक पुस्तक ‘छायाँको लस्कर’मा आफ्ना सहकर्मी प्रधानमन्त्री केपी ओलीसँग अनकौं प्रसंगहरु कोट्याएका छन् ।

झापा कम्युनिष्ट आन्दोलनका कार्यकर्ता खम्बूको स्मरणमा तत्कालीन राजनैतिक अभियन्ता मोहनचन्द्र अधिकारी, सीपी मैनाली, केपी ओली, मदन भण्डारी, माधव नेपाल लगायतसँगको स्मरण छ । झापा आन्दोलनको बेला ओली कालीचरणमा नामले परिचित थिए ।

प्रधानमन्त्री निवास बालुवाटारमा बिहीबार साँझ प्रधानमन्त्री ओली र खम्बूकी जीवनसंगिनी शुभलक्ष्मी राईले संयुक्त रुपमा ‘छायाँको लस्कर’ विमोचन गरे । ओलीको ढिलाईको कारण विमोचन निर्धारित समयभन्दा सबा एक घण्टा पछि सरेको थियो । विमोचनमा खम्बुका सहकर्मी, गुरु, विद्यार्थीहरु पुगेका थिए । जीवशास्त्र अन्तर्गत उभयचर र सरीसृपमा विज्ञ खम्बू दृष्टिविहीन छन् । पोष्ट डक्टरेटको तयारी गर्दा गर्दै उनका दुवै आँखाका ज्योति गुमेका थिए ।

ओलीले आफूँगका स्मरण पुस्तकमा दुरुस्त भएको बताउँदै यी सन्दर्भ जोडिनु आफ्नालागि प्रेरणादायी भएको सुनाए । ‘ भूमिगत कालमा कमजोर होइन दह्रो संकल्पको कारण केपी ओली बदमास हो, देश र जनता विरुद्ध जाने भो भने पनि उहाँ (खम्बू)ले पत्याउनु हुन्न’ ओलीले भने, ‘म आफ्नै कालमा परिवर्तन हुन्छ भन्ने भएर आन्दोलनमा लागेको तर प्रधानमन्त्रीको जिम्मेवारीमा पुग्छु भन्ने लागेको थिएन ।’

झापा आन्दोलनमा खुम्बूको ठूलो योगदान छ भन्दै आफूले पूर्णकालिन कार्यकर्ता भएर हिँड्न नहिँडी अध्ययनमा लाग्न सुझाव दिएको ओलीले स्मरण गरे । लेखक खम्बूले दृष्टि वाचक सफ्टवेयरको सहयोगमा किताब लेखेको बताए । उनी किताब विमोचनको क्रममा पहिलो पटक प्रधानमन्त्री निवास बालुवाटार टेकेका थिए । ‘यो शिक्षा र राजनीतिसँग जोडिएको किताब हो’ खम्बूले सुनाए, ‘यीनै पात्रहरुका सन्दर्भमा यहाँ लेखेको छु ।’

विमोचनमा किताबको टिप्पणी गर्दै डा. जंगब चौहानले यो कृति राजनैतिक र साहित्यिक जीवनको दस्तावेज भएको बताए । ‘वाम राजनीतिमा माले, एमालेको उतार–चढाव र त्यसको प्रभाव यसमा थाहा पाउन सकिन्छ,’ चौहानले भने, ‘यहाँ लेखकले अनुसन्धान गर्दाका विषय, हिमाल, पहाड, तराईका परिवेश, भाषा, समाज, संस्कृति र तत्कालिन मानिसका चिन्तन समेटिएका छन् ।’

यो पनि पढ्नुहोस्:
एक कालीचरण, अर्का कालुराम

प्रकाशित : आश्विन ९, २०७६ २१:१६
प्रतिक्रिया
पठाउनुहोस्

धारा ३७० खारेज संविधानसम्मत : राजदूत पुरी

कान्तिपुर संवाददाता

काठमाडौँ — नेपालका लागि भारतीय राजदूत मञ्जिभसिंह पुरीले भारत सरकारले केही समयअघि गरेको संविधानका दुई धारा ३७० र ३५ ‘ए’ खारेजी संवैधानिक रूपमा ठीक रहेको दाबी गरेका छन् ।

फाइल तस्बिर ।


नीति अनुसन्धान प्रतिष्ठान नेपाल र नेसनल ल कलेजले बिहीबार आयोजना गरेको ‘भारतीय संविधानको धारा ३७० : अवधारणा तथा यथार्थ’ कार्यक्रममा राजदूत पुरीले उक्त दुई धाराको खारेजीसँगै जम्मु र कश्मीरमा विकास र समृद्धि हुने बताए।

भारतले केही समयअघि संविधानका दुई धारा खारेज गरेर जम्मु–कश्मीरलाई दिइएको विशेष अधिकार हटाएको थियो, जसलाई लिएर अन्तर्राष्ट्रिय रूपमै समर्थन र विरोध भइरहेको छ। पुरीले भने यसलाई भारत र पाकिस्तानबीचको आन्तरिक मामिला भएको बताए। उनले जम्मु र कश्मीरका केही भूभागमा पाकिस्तानले हस्तक्षेप गरिरहेको दाबी गरे।

राष्ट्रिय स्वयंसेवक संघअन्तर्गत अखिल भारतका प्रचार प्रमुख अरूण कुमारले जम्मु र कश्मीरमा विकास र समृद्धि ल्याउन भारत सरकारले संविधानको धारा खारेज गरेको बताए।

‘एक मुलुकमा दुई संविधान लागू हुन सक्दैन। जम्मु र कश्मीर सुरुवातदेखि नै भारतका थिए र रहिरहन्छन्,’ उनले भने। पाकिस्तानले उक्त क्षेत्रमा आतंकवादीको बढावा दिएको पनि उनले दाबी गरे।

प्रकाशित : आश्विन ९, २०७६ २०:५९
पूरा पढ्नुहोस्
प्रतिक्रिया
पठाउनुहोस्