हिउँ खस्यो फरर

चिसा भए हातखुट्टा पानी पर्दा दरर ।
बाहिर निस्की हेर साथी हिउँ खस्यो फरर ।।

हिउँका ढिका जताततै बाटो पूरै सेतै छ ।
केटाकेटी सबैको ध्यान आज त्यतै छ ।।

स्कुल पनि बिदा भयो बाहिर हिउँको रास छ ।
हिउँ परेपछि पो आजको दिन खास छ ।।

हिउँ खेली बिरामी हुने पीर छ बाबालाई ।
हिउँमै खेल्न दौडिएँ म फकाएर आमालाई ।।

खेल्ने, डुल्ने उमेर हो पढ्ने हाम्रो काम हो ।
पढी, लेखी हामीले राख्ने देशको नाम हो ।।

आज हिउँ परेर चिसो बढ्यो लेकमा ।
कति मान्छे आएका घुम्न हाम्रो भेगमा ।।

फोटो खिच्दै हिउँ खेल्दै दाइदिदी रमाए ।
कोही डराई परै बसे केहीले हिउँ समाए ।।

भोलि घाम लाग्यो भने पग्लिजान्छ हिउँ सबै ।
आऊ साथी हिउँ हेरौं आज कतै नगई ।।

हातका कोमल औंला हिउँले खान्छ भनेर ।
म त पन्जा लगाई आएँ आफैं ज्ञानी बनेर ।।
- मिर्मिसा पराजुली
लालीगुराँस टोल, पोखरा