डाक्टर सरुवा भएपछि सल्यान अस्पतालमा शल्यक्रिया र जटिल प्रसूति सेवा बन्द- स्वास्थ्य - कान्तिपुर समाचार
कान्तिपुर वेबसाईट
AdvertisementAdvertisement

डाक्टर सरुवा भएपछि सल्यान अस्पतालमा शल्यक्रिया र जटिल प्रसूति सेवा बन्द

विप्लव महर्जन

सल्यान — जिल्ला अस्पताल सल्यानबाट दुई डाक्टर सरुवा भएर गएपछि अस्पतालले शल्यक्रिया र जटिल प्रसूति सेवा बन्द गरेको छ । अस्पतालमा कार्यरत एमडिजिपी डाक्टर प्रदीप शर्मा र डाक्टर एन्जिला श्रेष्ठ सरुवा भएर गएपछि अन्य सर्जनको अभावमा शल्यक्रिया र जटिल प्रसूति सेवा शुक्रबारदेखि बन्द भएको जनाएको हो ।



जिल्ला अस्पतालले ती सेवा बन्द गरेपछि जिल्लाका मात्र नभई छिमेकी जिल्ला रुकुम, रोल्पाका सर्वसाधारणहरूसमेत प्रभावित भएका छन् । केही वर्षदेखि जटिल समस्या भएका बिरामी र सुत्केरी हुन नसकेकालाई शल्यक्रिया गरेर जिल्लामै सहज सेवा उपलब्ध गराउँदैआएको जिल्ला अस्पतालले सेवा संचालन गर्न नसकेपछि उपचारका लागि आएका बिरामीहरू प्रभावित भएका छन् ।

साथै जटिल समस्या देखिएका बिरामी उपचारका लागि बाहिर जाने गरेका छन् । कहिले डाक्टर त कहिले स्वास्थ्यकर्मीको अभावका कारण जिल्लावासीले विभिन्न किसिमका समस्या भोग्दै आउनु परेको छ । दक्ष डाक्टरको अभावमा अस्पतालले शल्यक्रिया सेवा दिन नसकेपछि जिल्लावासी स्वास्थ्य सेवाको अधिकारबाट बञ्चित मात्र भएका छैनन्, बाहिरका अस्पताल धाउनुपर्ने भएपछि उनीहरूले आर्थिक तथा भौतिक समस्या भोग्दैआएका छन् ।

जिल्ला अस्पतालमा कार्यरत आठ जनामध्ये सर्जन तथा एमडिजिपी डाक्टर सरुवा भएर गएपछि अहिले चारजना एमबिबीएस डाक्टर भएका र एमडिजिपी डाक्टर सरुवा भएर गएका ठाँउमा अर्को नआएकै कारण शल्यक्रिया सेवा र जटिल खालका प्रसूति सेवा बन्द भएको जिल्ला अस्पताल सल्यानका डा. असीम प्रजापतीले बताए । उनले शल्यक्रिया रोकिएकै कारण शुक्रबार मात्रै एकजना जटिल समस्या भएका बिरामीलाई अन्यत्र रिफर गरिएको जानकारी गराए ।

‘शल्यक्रिया तथा जटिल प्रसूति सेवा बन्द गर्नु हाम्रो रहर नभई बाध्यता हो’ उनले भने ‘जबसम्म एमडिजिपी डाक्टर तथा सर्जन आउँदैनन् तबसम्म शल्यक्रिया तथा जटिल प्रसूति सेवा संचालनमा आउँदैन ।’

उनका अनुसार एमडिजिपी तथा दक्ष डाक्टर नहुँदा अन्य सेवा पनि प्रभावित भएको छ । स्वास्थ्य कार्यालय सल्यानका निमित्त व्यवस्थापक दशरथ श्रेष्ठले भने एमडिजिपी डाक्टर सरुवा भएर गएपछि सेवा रोकिएको र जसबाट जिल्लावासीहरू सेवाबाट प्रभावित हुनुपरेको स्वीकार गरे । तर सोही पदमा नयाँ विशेषज्ञ डाक्टर आउन केही महिना लाग्ने उनले बताए ।

‘माग भए अनुसार प्रक्रियामा जान केही समय लाग्ने भएकाले एमडिजिपी तथा विशेषज्ञ डाक्टर आउन एक महिनाजति लाग्ने देखिन्छ’ उनले भने । विज्ञ डाक्टरको लागि सम्बन्धित निकायसंग नियमित सम्पर्कमा रहेको उनको भनाइ छ ।

२०४३ सालमा सुरु भएको जिल्ला अस्पताल सल्यानले विभिन्न समयमा कहिले डाक्टर त कहिले अन्य स्वास्थ्यकर्मी अभावका कारण नियमित सेवा दिन सकिरहेको छैन ।

१५ शैय्याको रुपमा संचालित अस्पताल अहिले झन्डै ४० शैय्यामा संचालित छ । केही वर्षदेखि ५० शैय्याको अस्पतालका लागि माग राख्दै आए पनि राजनीतिक नेतृत्वबाट चासो नदेखाइएको अस्पतालमा कार्यरत स्वास्थ्यकर्मीहरू बताउँछन् ।

प्रकाशित : मंसिर ४, २०७८ १५:५१
प्रतिक्रिया
पठाउनुहोस्

७५ जिल्लामा कांग्रेसको स्थानीय अधिवेशन सकियो, प्रदेश क्षेत्रीय अधिवेशन धमाधम

रसुवा र सर्लाहीमा उत्पन्न विवाद समाधान गर्न जिल्लाका नेताहरू काठमाडौंमा, निर्वाचन समितिसँग छलफल
कान्तिपुर संवाददाता

काठमाडौँ — कांग्रेसले १४ औँ महाधिवेशनअन्तर्गत ७५ जिल्लामा स्थानीय तहको अधिवेशन सम्पन्न गरेको छ । ती जिल्लामा वडा अधिवेशन सकिएर गाउँपालिका र नगरपालिकास्तरीय कार्यसमितिको नेतृत्व चयन भएको हो ।

‘अहिलेसम्म ७५ जिल्लामा स्थानीय तहको अधिवेशन सकिएको छ, अब ती सबैले प्रदेशसभा क्षेत्रीय कार्यसमितिको अधिवेशन गर्दैछन् । पहिल्यै पालिका अधिवेशन सकिएका ४८ जिल्लामा त शुक्रबारदेखि धमाधम नेतृत्व चयन भइरहेको छ,’ केन्द्रीय निर्वाचन समितिका सचिव जगन्नाथ श्रेष्ठले भने । उनका अनुसार रसुवा र सर्लाहीमा भने क्रियाशील सदस्यताकै विवादका कारण अधिवेशन रोकिएका छन् । रसुवामा वडा अधिवेशन पूरा भएपनि पालिका तहको अधिवेशन सम्पन्न हुन पाएको छैन । ‘रसुवामा वडा अधिवेशन भइसकेको छ, तर पालिका अधिवेशन सम्पन्न नहुदै निर्वाचत अधिकृतले राजीनामा दिए,’ सचिव श्रेष्ठले भने, ‘सर्लाहीमा त वडा अधिवेशन नै हुन सकेको छैन ।’

अधिवेशन रोकिएपछि सर्लाही र रसुवाका जिल्ला सभापतिसहित नेताहरू काठमाडौं आइपुगेका छन् । जिल्लाको विवादका विषयमा नेताहरूसँग छलफल गरेर विवाद समाधान गरी अधिवेशन अघि बढाउने तयारी रहेको सचिव श्रेष्ठले बताए । ‘अब समय छैन । ६ मंसिरमा क्षेत्रीय अधिवेशन गर्ने कार्यतालिका छ, त्यहीअनुसार हामीले बाँकी रहेका जिल्लाको अधिवेशनलाई पनि शीघ्र समाधान गरी अधिवेशन गराउने प्रयत्न गरिरहेका छौं,’ उनले भने । अहिले महाधिवेशनको व्यवस्थापनका लागि दैनिकजसो बैठक र छलफल भइरहेका छन् । महाधिवेशनको व्यवस्थापनका लागि गठित समितिहरूले समेत तयारी अघि बढाएका छन् ।

कांग्रेसले मंसिर २४ देखि २६ गतेसम्म काठमाडौंमा पार्टीको १४ औँ महाधिवेशन गर्ने कार्यतालिका छ । त्यसअघि अब १६५ वटा प्रतिनिधिसभा क्षेत्र, ७७ जिल्ला र ७ वटै प्रदेशको अधिवेशन भइसक्नुपर्छ । ‘महाधिवेशनका लागि धेरै समय छैन । त्यसैले सहज रुपमा अधिवेशन गर्न नसक्ने जिल्लाहरू छोडेर भएपनि हामी अधिवेशनको प्रक्रियालाई अघि बढाउँछौं,’ निर्वाचन समितिका एक पदाधिकारीले भने ।

कांग्रेसले १४ हिमाली जिल्लामा भने अधिवेशन पूरा गरिसकेको छ । समितिका अनुसार डोल्पा, बाँके, कैलाली, सुर्खेत, सप्तरी, सिरहा, धनुषा, महोत्तरी, बारा, पर्सा, पाँचथर, इलाम, तेह्रथुम, धनकुटा, भोजपुर, खोटाङ, ओखलढुंगा, उदयपुर, झापा, मोरङ, सुनसरी, सिन्धुली, काभ्रपलाञ्चोक, नुवाकोट, धादिङ, चितवन, मकवानपुर, भक्तपुर, ललितपुर, काठमाडौं, लमजुङ, तनहुँ, कास्की, पर्वत, स्याङ्जा, बागलुङ, पूर्वी नवलपुरासी, पश्चिम नवलपरासी, रुपन्देही, कपिलवस्तु, पाल्पा, अर्घाखाँची, गुल्मी, रोल्पा, प्युठान, दाङ, बर्दिया, रुकुम पश्चिम, सल्यान, जाजरकोट, दैलेख, डोटी, अछाम, बैतडी, डडेलधुरा र कञ्चनपुरलगायत जिल्लामा शुक्रबारदेखि प्रदेशसभा क्षेत्रीय अधिवेशन सुरू भएको छ । यी जिल्लामा ५ गतेभित्र प्रदेशसभा क्षेत्रीय अधिवेशन सम्पन्न भएपछि ६ गतेबाट प्रतिनिधिसभा क्षेत्रीय अधिवेशन सुरु हुनेछन् ।

निर्वाचन समितिले यी जिल्लाहरूमा ६ मंसिरमा प्रतिनिधिसभा क्षेत्रीय अधिवेशन र एकमात्र क्षेत्र भएका जिल्लाको अधिवेशन गर्ने मिति तोकेको छ । त्यस्तै, दुई वा सोभन्दा धेरै निर्वाचन क्षेत्र भएका जिल्लामा १० मंसिरमा जिल्ला अधिवेशन हुनेछ ।

प्रकाशित : मंसिर ४, २०७८ १५:४२
पूरा पढ्नुहोस्
प्रतिक्रिया
पठाउनुहोस्
×