आइतबार २ लाख ५२ हजार डोज हैजाविरुद्धको खोप आउँदै- स्वास्थ्य - कान्तिपुर समाचार
कान्तिपुर वेबसाईट
AdvertisementAdvertisement

आइतबार २ लाख ५२ हजार डोज हैजाविरुद्धको खोप आउँदै

कान्तिपुर संवाददाता

काठमाडौँ — सरकारले हैजाविरुद्धको खोप ल्याउने भएको छ । स्वास्थ्य तथा जनसंख्या मन्त्रालयका प्रवक्ता डा कृष्णप्रसाद पौडेलले यही आइतबार २ लाख ५२ हजार हैजाविरुद्धको खोप आउन लागेको बताएका हुन्।

हैजा विरुद्धको ‘ओरल कोलेरा भ्याक्सिन’ विश्व स्वास्थ्य संगठनको सहयोगमा आउन लागेको हो ।

‘संक्रमण तथा मृत्यु दर घटाउनको लागि खोपले काम गर्ने छ ।आउने हप्तादेखि नै खोप लगाउन सुरु गरिनेछ,' पौडेलले भने ।’

कपिलवस्तुमा हैजाको संक्रमण भएपछि हालसम्म १० जनाको मृत्यु भएको छ । डा पौडेलका अनुसार कपिलवस्तुको ५ वटा पालिकामा खोप वितरण गरिनेछ ।

कपिलवस्तुको कृष्णनगरपालिकामा असोज १८ गतेदेखि झाडापखालाका बिरामी देखिन सुरु भएको थियो । झाडापखालाबाट वडा नं ७, ८ र ९ प्रभावित बनेका छन् ।

मन्त्रालयका अनुसार आजको दिनसम्म तथ्यांक हेर्ने हो भने १ हजार ३५६ जना संक्रमित बनिसकेका छन् जसमा ६ जनाको मृत्यु भइसकेको छ । हाल ६ जनाको उपचार गराइरहेका छन् ।

प्रकाशित : कार्तिक २६, २०७८ १४:२९
प्रतिक्रिया
पठाउनुहोस्

गण्डकी प्रदेशमा कृषि कर्जा ५७ प्रतिशत बढ्यो, अण्डा र माछा उत्पादनमा उल्लेख्य वृद्धि

कान्तिपुर संवाददाता

काठमाडौँ — गण्डकी प्रदेशमा कृषि कर्जा उच्च दरले बढेको पाइएको छ । नेपाल राष्ट्र बैंकले सार्वजनिक गरेको यस प्रदेशको आर्थिक गतिविधि अध्ययनअनुसार कृषि कर्जा २०७७ असार मसान्तको तुलनामा ५७.१ प्रतिशतले बढेको हो । यस प्रदेशमा कुल २६ अर्ब ३७ करोड कृषि कर्जा प्रवाह भएको छ । 

अघिल्लो वर्षको यस अवधिमा कृषि कर्जा २९.७ प्रतिशतले वृद्धि भएको थियो । कुल कृषि कर्जामध्ये करिव ५६ प्रतिशत कर्जा कास्की (३७ प्रतिशत) र नवलपरासी (पूर्व) (१८.९ प्रतिशत) जिल्लामा मात्रै प्रवाह भएको देखिन्छ । मनाङ र मुस्ताङ जिल्लामा क्रमश: ०.५ र १ प्रतिशत मात्र कर्जा प्रवाह भएको देखिन्छ ।

यद्यपि कुल कर्जामा कृषि कर्जाको अंश १० प्रतिशत भन्दा कम रहेकोले यस क्षेत्रमा अझै थप कर्जा प्रवाह गर्नुपर्ने राष्ट्र बैंकको अध्ययन प्रतिवेदनले देखाएको छ । कृषि कर्जा ५७ प्रतिशत बढ्दा प्रदेशमा औद्योगिक कर्जा भने ७ प्रतिशतले बढेको छ । २०७८ असार मसान्तमा कुल औद्योगिक कर्जा ६१ अर्ब ६९ करोड पुगेको छ ।

२०७८ असार मसान्तमा यस प्रदेशमा कुल कर्जा लगानी ३ खर्ब १५ अर्ब ६५ करोड पुगेको छ । एक वर्षमा कुल कर्जा प्रवाह २७.७ प्रतिशतले बढेको हो ।

यस प्रदेशमा सबैभन्दा बढी १ लाख ६६ हजार ४०२ हेक्टर क्षेत्रफल अर्थात कुल खाद्य तथा अन्य बालीले ढाकेको क्षेत्रफलको ३५.७ प्रतिशत क्षेत्रफलमा मकै खेती भएको छ । मकैको उत्पादन खाद्य तथा अन्य बालीको कुल उत्पादनको ३२.३ प्रतिशत रहेको छ । खाद्य तथा अन्य बालीको कुल उत्पादनमा धान उत्पादनको हिस्सा ३०.८ प्रतिशत र आलु उत्पादनको हिस्सा २१.८ प्रतिशत छ ।

आर्थिक वर्ष २०७७/७८ मा दूध उत्पादन १४.४ प्रतिशतले बढेको छ । अघिल्लो वर्ष यस्तो उत्पादन १२.१ प्रतिशतले घटेको थियो । समीक्षा वर्षमा मासुको उत्पादन ७.८ प्रतिशत र माछाको उत्पादन ५२.५ प्रतिशतले वृद्धि भएको छ । खासगरी बजारमा माछाको बढ्दो मागका कारण कास्की, स्याङ्जा, तनहुँ र म्याग्दी जिल्लाहरुमा व्यवसायिक माछा पालनतर्फ किसानहरु आकर्षित हुँदै गएकाले माछाको उत्पादनमा वृद्धि भएको हो ।

समीक्षा वर्षमा अण्डाको उत्पादन भने १०६.३ प्रतिशतले वृद्धि भएको छ । अघिल्लो वर्ष यस्तो उत्पादन ५०.४ प्रतिशतले वृद्धि भएको थियो । बजारमा अण्डाको बढ्दो मागका कारण नयाँ फार्महरुको स्थापना हुनु र उन्नत जातका कुखुरा पालन गर्ने प्रवृत्तिका कारण अण्डाको उत्पादनमा वृद्धि भएको अध्ययन प्रतिवेदनमा उल्लेख छ ।



प्रकाशित : कार्तिक २६, २०७८ १४:२८
पूरा पढ्नुहोस्
प्रतिक्रिया
पठाउनुहोस्
×