अर्को वर्षदेखि रोग प्रतिरोधी क्षमता कम भएकाले चौथो डोजको खोप पाउनेछन् : सीडीसी - स्वास्थ्य - कान्तिपुर समाचार
कान्तिपुर वेबसाईट
AdvertisementAdvertisement

अर्को वर्षदेखि रोग प्रतिरोधी क्षमता कम भएकाले चौथो डोजको खोप पाउनेछन् : सीडीसी 

कान्तिपुर संवाददाता

काठमाडौँ — अमेरिकाकाे सेन्टर फर डिजिज कन्ट्रोल एन्ड प्रिभेन्सन(सीडीसी) ले रोग प्रतिरोधी क्षमता कम भएकाले अर्को वर्षको सुरुवातदेखि कोभिड विरुद्धको चौथो डोजको खोप पाउन सक्ने जनाएको छ ।

गत सोमबार सीडीसीले निर्देशिका अध्यावधिक गर्दे रोग प्रतिरोधी क्षमता कम भएका व्यक्ति जस्तै केमोथेरापी गराइरहेका, अंग प्रत्यारोपण गरेका, एचआईभी पीडित आदिले चौथो डोजको खोप पाउन सक्ने बताएको हो ।जसले फाइजर–बायोनटेक र मोर्डनाको तेस्रो डोजको खोप लगाएका छन् उनीहरुले चौथो डोजको खोप पाउन योग्य हुने सीडीसीले जनाएको छ ।

निर्देशिकामा लेखिएको छ, ‘ जो मध्यम तथा गम्भीर रुपमा रोग प्रतिरोधी क्षमता भएका व्यक्ति छन् उनीहरुले चौथो डोजको खोप पाउन सक्नेछन् । तेस्रो डोज लगाएको कम्तीमा ६ महिना अवधि पुगेको हुनुपर्छ ।’ सीडीसीले गरेको नयाँ सिफारिस अनुसार चौथो डोजको मोर्डना खोप नर्मल डोजको आधा आकारमा हुनुपर्नेछ ।

अगष्टमा रोग प्रतिरोधी क्षमता कम भएकालाई फाइजर–बायोनटेक र मोर्डनाको तेस्रो डोजको खोपको लागि बाटो खुलेको थियो । दोस्रो डोज लगाएको कम्तीमा २८ दिनपछि तेस्रो डोजको खोप लगाउने बताइएको थियो । अध्ययनहरुका अनुसार यस्ता व्यक्तिहरुमा २ वटा मात्र डोजले सुरक्षित नहुन सक्छन् ।

रोग प्रतिरोधी क्षमता भएका व्यक्ति जसले तेस्रो डोजको एमआरएनए खोप पाइसकेका छन् । उनीहरुले फेब्रुअरीसम्म चौथो डोजको खोप पाउन सक्नेछन् । बुस्टर डोजका लागि खोप लगाउने व्यक्तिले अमेरिकामा उपलब्ध भएका ती ३ वटामा जुनसुकै पनि खोप रोज्न सक्नेछन् ।

त्यसैगरी सीडीसीले एक डोज मात्र लगाइने खोप जोन्सन एन्ड जोन्सन लगाएकाले पनि ३ वटा खोपमध्य बुस्टर डोजको रुपमा लगाउन पाउनेछन् । उनीहरुले खोप लगाएको कम्तीमा २ महिना पुग्नुपर्नेछ ।

प्रकाशित : कार्तिक १३, २०७८ १५:३२
प्रतिक्रिया
पठाउनुहोस्

राष्ट्रपति भण्डारी ढोरपाटनमा

रासस

काठमाडौँ — राष्ट्रपति विद्यादेवी भण्डारीले शनिबार ढोरपाटन सिकार आरक्ष क्षेत्रको अवलोकन भ्रमण गरेका छन् । नेपाली सेनाको हेलिकप्टरमार्फत दिउँसो १२:४० बजे ढोरपाटन आइपुगेकी उनले आरक्ष कार्यालयको निरीक्षणसमेत गरिन् । निरीक्षणपछि राष्ट्रपतिसमक्ष आरक्ष कार्यालयका प्रमुख संरक्षण अधिकृत वीरेन्द्रप्रसाद कँडेल र आरक्षको सुरक्षार्थ तैनाथ नेपाली सेनाको शत्रुमर्दन गुल्मका गुल्मपति सेनानी गोविन्द विष्टले आरक्षका गतिविधि र सुरक्षा स्थितिबारे प्रस्तुतीकरण गरेका थिए । 

राष्ट्रपति भण्डारीले आरक्षमा रहेका संग्रहालयका साथै ढोरपाटन उपत्यकाको दृश्यावलोकन गरेका प्रमुख संरक्षण अधिकृत कँडेलले जानकारी दिए । राष्ट्रपतिको भ्रमणलाई लक्ष्य गरी आरक्ष क्षेत्रमा सुरक्षा र व्यवस्थापकीय प्रबन्ध चुस्त पारिएको प्रमुख जिल्ला अधिकारी शिवकुमार कार्कीले जानकारी दिए ।

राष्ट्रपति भ्रमणमा आउने भएपछि प्रजिअको नेतृत्वमा सुरक्षा निकायका प्रमुखलगायत सरकारी निकायका पदाधिकारी शुक्रबारै ढोरपाटन पुगेका थिए । ढोरपाटन देशकै एकमात्र सिकार आरक्ष रहेको क्षेत्र हो । सिकार पर्यटनका लागि विश्वकै विख्यात ढोरपाटनमा अहिले सिकारको याम चलिरहेको छ । सौखिन र खर्चिला विदेशी सिकारीको रोजाइमा ढोरपाटन पर्ने गरेको छ । एक हजार ३२५ वर्ग किमीमा फैलिएको आरक्ष बागलुङ, म्याग्दी र रुकुम जिल्लाको उच्च पहाडी र हिमाली भू–भागमा अवस्थित छ ।

पर्यटकीय क्षेत्र ढोरपाटन देशकै ठूलो उत्तरगंगा जलाशययुक्त जलविद्युत् आयोजना बनाउने सरकारी घोषणाले पनि चर्चामा छ । राष्ट्रपतिको भ्रमणले ढोरपाटन क्षेत्रको विकास र प्रवर्द्धनमा महत्वपूर्ण टेवा पुग्ने विश्वास लिइएको छ ।

प्रकाशित : कार्तिक १३, २०७८ १५:३१
पूरा पढ्नुहोस्
प्रतिक्रिया
पठाउनुहोस्
×