वाणिज्य विभागले भन्यो : खानेतेलको अवैध आयात गरे कारबाही हुन्छ
काठमाडौँ — वाणिज्य आपूर्ति तथा उपभोक्ता संरक्षण विभागले खाने तेलको अवैध रुपमा आयात गरी कारोबार गरेको पाइएमा कारबाही गर्ने चेतावनी दिएको छ । पछिल्लो समय नेपालभन्दा भारतमा खानेतेल सस्तो भएपछि केही व्यापारीले भारतबाट अवैध रुपमा आयात गर्ने गरेको भन्दै स्वदेशका उद्योगी व्यवसायीले गुनासो गर्दै आएका छन् ।
उद्योगी व्यवसायीको गुनासोपछि विभागले सूचना जारी गर्दै यस्तो चेतावनी दिएको हो । भारतमा कर घटाइँदा खानेतेलको मूल्य नेपालमा भन्दा सस्तो पर्ने गरेको छ, जसले गर्दा उतैबाट तेल अवैध रुपमा आयात हुने गरेको स्वदेशी उद्योगहरुको गुनासो छ ।
विभागले एक सूचना जारी गर्दै भनेको छ ‘इजाजत नलिई गुणस्तरहीन तोरीको तेल अवैध तरिकाले भित्र्याई तराईका बजारहरुमा बिक्री वितरण भइरहेकोले नेपाली उद्योगहरु बन्द हुने स्थितिमा पुगेको भनी नेपाल चामल, तेल, दाल उद्योग संघको पत्र आएको हुँदा सम्बन्धित निकायलाई निगरानीको लागि लेखी पठाइसकिएको छ ।’ त्यसरी भित्र्याइएको तेल कतै सञ्चित भेटिएमा वा थोक तथा खुद्रा बिक्री वितरण गरेको पाइएमा उपभोक्ता संरक्षण ऐन तथा प्रचलित कानुनबमोजिम कारबाही गरिने विभागले जनाएको छ ।
