कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: २०९

पैसा तिर्नेले मात्रै ट्विटरको एसएमएस भेरिफिकेसन पाउने

ट्विटर खाता कसरी सुरक्षित राख्ने?

काठमाडौँ — आफ्नो ट्विटर खातामा अरुको पहुँच नहोस् भनेर सुरक्षाका लागि अपनाइने टु फ्याक्टर अथेन्टिकेसनका तीनमध्ये एक, एसएमएस भेरिफिकेसनको विकल्प मंगलबारबाट हटाइएको छ । ट्विटर ब्लुका सब्स्क्राइबरहरूले मात्रै अब एसएमएसमा आधारित सुरक्षाको यो विकल्प प्रयोग गर्न सक्छन् ।

पैसा तिर्नेले मात्रै ट्विटरको एसएमएस भेरिफिकेसन पाउने

एसएमएसमा आधारित टु फ्याक्टर अथेन्टिकेसनका लागि शुल्क लाग्ने भएको हो । मासिक वा वार्षिक शुल्क तिरेर लिइने ट्विटर ब्लु खाताबाहेक प्रयोगकर्ताको नि:शुल्क खातामा टु फ्याक्टर अथेन्टिकेसनको यो सुविधा हटाइएको छ । एसएमएस भेरिफिकेसन वा ट्विवर ब्लुको सब्स्क्रिप्सन नलिने प्रयोगकर्ताको खाता असुरक्षित बनेका छन्, ह्याकरको निसानामा पर्ने जोखिम बढेको छ ।

मोबाइल फोनमा प्राप्त भेरिफिकेसन कोड राखेपछि ट्विटरमा लगइन गर्ने सुविधा ‘खराब नियत भएकाहरू’ले दुरुपयोग गरेको भन्दै ट्विटरले गत फेब्रुअरीमा एसएमएस भेरिफिकेसनको नीति परिवर्तन गर्ने जनाएको थियो । स्क्यामरहरूले अथेन्टिकेसनका लागि ‘झुटो एसएमएस रिक्वेस्ट’ पठाउँदा बर्सेनि ६ करोड डलर एसएमएसमा खर्च भइरहेको भन्दै ट्विटरका मालिक इलन मस्कले खर्च कटौतिका लागि एमएमएस भेरिफिकेसनलाई आफ्ना सबस्क्राइबरहरूमा मात्रै सीमित राखिने बताएका थिए । मार्च २० पछि ट्विटर ब्लु सब्स्क्राइबरबाहेक अन्यले त्यो सुविधा नपाउने भनिएसँगै हाल यो विकल्प 'डिसेबल' भएको छ ।

नि:शुल्क खाताहरूमा टु फ्याक्टर अथेन्टिकेसनका लागि टेक्स्ट म्यासेज विकल्प रोज्दा भेरिफिकेसनका लागि अन्य विकल्प रोज्नु भन्ने डाइलग बक्स देखापर्छ । बाँकी दुई विकल्पमा थर्ड पार्टी अथेन्टिकेसन एप वा 'सेक्युरिटी की' विधि प्रयोग गर्ने सुविधा उपलब्ध छन् । 'सेक्युरिटी की'का लागि छुट्टै हार्डवेयर खरिद गर्नुपर्ने भएकाले अथेन्टिकेसन एप हाम्रा लागि उत्तम विकल्प हो । यसका लागि गुगल अथेन्टिकेटर, ट्वीलियोको अथिजस्ता भरपर्दा अथेन्टिकेटर एप प्रयोग गर्न सकिन्छ । यी दुवै एप एन्ड्रोइड र आईओएसमा नि:शुल्क उपलब्ध छन् ।

प्रकाशित : चैत्र ७, २०७९ ११:४५
प्रतिक्रिया
पठाउनुहोस्
जनताको राय

नेपाल संघीय लोकतान्त्रिक गणतन्त्र घोषणा भएको १६ वर्ष पुरा भएको छ । गणतन्त्रको गति कस्तो लागिरहेको छ ?