माथिल्लो कर्णालीबारे सुझाव दिन गठित कार्यदलले माग्यो थप डेढ महिना समय
काठमाडौँ — माथिल्लो कर्णाली जलविद्युत् आयोजनाबारे सुझाव दिन गठित कार्यदलले थप डेढ महिना (४५ कार्यदिन) को समय मागेको छ । लगानी बोर्ड कार्यालयका प्रवक्ता सुरेन्द्र पौडेलका अनुसार यसअघि तोकिएको समयमा सुझाव प्रतिवेदन तयार पार्न नसकेपछि थप समयका मागिएको हो । ‘सुझाव प्रतिवेदन बुझाउने आज (शुक्रबार) अन्तिम दिन थियो । तर काम नसकिएपछि हामीले थप ४५ दिन माग्ने निर्णय गरेका छौं । यो प्रस्ताव बोर्डमा जान्छ,’ कार्यदलका सदस्य सचिव समेत रहेका पौडेलले भने ।
गत असोज २३ गते बसेको लगानी बोर्डको ४८ औं बैठकले राष्ट्रिय योजना आयोगका उपाध्यक्ष विश्वनाथ पौडेलको संयोजकत्वमा सुझाव कार्यदल गठन गर्ने निर्णय गरेको थियो । उक्त कार्यदलले पहिलो बैठक बसेको मितिले ४५ दिनभित्र प्रतिवेदन बुझाउने कार्यादेश पाएको थियो । गत मंसिर १ गते पहिलो बैठक बसेसँगै कार्यदलले पुस १५ गतेसम्ममा प्रतिवेदन बुझाइसक्नुपथ्र्यो । तर समय अपुग भएको भन्दै थप ४५ दिन समय मागिएको लगानी बोर्ड कार्यालयले जनाएको छ ।
योजना आयोगका उपाध्यक्ष संयोजक रहेको कार्यदलमा अर्थ, ऊर्जा र कानून मन्त्रालयका सचिव तथा लगानी बोर्डका प्रमुख कार्यकारी अधिकृत र एक जना विज्ञ सदस्य छन् । त्यस्तै, लगानी बोर्डको कार्यालयका सहसचिवलाई कार्यदलको सदस्य सचिवको जिम्मेवारी दिइएको छ । यो कार्यदलले माथिल्लो कर्णालीमा लगानी जुटाउन जीएमआरलाई थप समय दिने वा नदिने भन्ने सुझावसहितको प्रतिवेदन सरकारलाई बुझाउनेछ । त्यस्तै, आयोजना विकास सम्झौता (पीडीए) अनुसार काम भए–नभएको बारे अध्ययन तथा विश्लेषण कार्यादेश पनि कार्यदलले पाएको छ ।
परियोजना विकास सम्झौता (पीडीए) भएको ७ वर्ष बितिसक्दा पनि भारतीय विकास कम्पनी ग्रान्धी माल्लिकार्जुन राव (जीएमआर) ले माथिल्लो कर्णालीमा लगानी जुटाउन सकेको छैन । लगानी बोर्डको कार्यालय, जीएमआर, अपर कर्णाली हाइड्रोपावर लिमिटेड र कर्णाली ट्रान्समिसन कम्पनी प्राइभेट लिमिटेडबीच २०१४ सेप्टेम्बरमा पीडीए सम्झौता भएको थियो । ९ सय मेगावाट विद्युत् उत्पादन क्षमताको यो आयोजनामा जीएमआरले लगानी जुटाउन नसक्नु अहिले देखिएको सबैभन्दा ठूलो समस्या हो । दुई पटकसम्म म्याद थप्दा पनि लगानी ल्याउन नसकेपछि लगानी बोर्डको कार्यालयले जीएमआरलाई २०१८ सेप्टेम्बरयता म्याद थप गरिदिएको छैन ।
पछिल्लो तीन वर्ष अवधिमा न त लगानी जुटेको छ न त बोर्डले म्याद थप नै गरेको छ । वित्तीय व्यवस्थापन गर्न नसकेकै कारण आयोजनाबाट जीएमआरलाई निकाल्न पनि बोर्डले सकेको छैन । यहीं बीच भारतकै अर्को कम्पनी सतलज जलविद्युत् निगमलाई जीएमआरले माथिल्लो कर्णालीको लाइसेन्स बेच्न लागेको अपुष्ट समाचारहरु पनि बाहिरिएका छन् । तर लगानी बोर्डको कार्यालयले भने यसबारे आफूलाई कुनै जानकारी नरहेको जनाएको छ ।
जीएमआरले भने अहिले पनि म्याद थपका लागि बोर्डसँग बारम्बार माग गरिरहेको छ । दुई पटकसम्म थपेको म्याद गुजारेपछि बोर्डले जीएमआरलाई उसको व्यवसायिक योजना (एक्सन प्लान) पेश गर्न भनेको थियो । २०२० डिसेम्बर ३१ मा यस्तो एक्सन प्लान जीएमआरले बोर्डमा पेश गर्दै लगानी व्यवस्थापनका लागि थप १८ महिना समय थपिदिन भनेको थियो । तर यसबारे हालसम्म कुनै निर्णय हुन सकेको छैन । अब म्याद थप गर्ने/नगर्ने विषयबारे कार्यदलको सुझावका आधारमा मात्रै बोर्डको बैठकले तय गर्ने जनाइएको छ ।
लगानी बोर्ड, जीएमआर अपर कर्णाली हाइड्रोपावर लिमिटेड र कर्णाली ट्रान्समिसन कम्पनी प्राइभेट लिमिटेडबीच २०१४ सेम्पेम्बरमा भएको पीडीएअनुसार माथिल्लो कर्णाली जलविद्युत् आयोजना निर्माण–स्वामित्व–सञ्चालन र हस्तान्तरण (बुुट) मोडलमा गर्ने भनिएको छ । उत्पादन शुरु भएको मितिले ३० वर्षपछि नेपालले स्वामित्व पाउने यो आयोजनामा कर्जा र स्वपुँजीको अनुपात ७५:२५ हुनुपर्छ । अर्थात् आयोजनाको कुल लागतमध्ये जीएमआरले ७५ प्रतिशत ऋण लगानी खोज्ने र २५ प्रतिशत स्वलगानी गर्ने सम्झौता गरेको देखिन्छ । पीडीएको बुँदा नम्बर ८ अनुसार यस्तो सहमति भएको २० महिनाभित्र आयोजनाका लागि चाहिने सरकारी जग्गा भाडामा लिइसक्नुपर्नेछ र १ वर्षभित्र निजी जग्गाको मुआब्जा वितरण तथा अधिग्रहण गरिसक्नुपर्ने छ । यस्तो समय अधिकतम १ वर्ष थप गर्न सक्ने पनि पीडीएमा उल्लेख छ । त्यस्तै, बुँदा नम्बर ११.३.३ अनुसार सम्झौता भएको ६ महिनाभित्रमा आयोजना प्रभावितको पुनर्बास तथा बस्ती स्थानान्तरणको योजना लगानी बोर्डलाई बुझाइसक्नुपर्ने उल्लेख छ । तर जीएमआरले अझै जग्गा अधिग्रहण र मुआब्जाको काम सकेको छैन ।
व्यावसायिक उत्पादन मिति (सीओडी) २०२३ जुलाई १६ भित्र भएमा जीएमआरले प्रतिमेगावाट जडित क्षमतामा ५० लाख रुपैयाँ बराबर छुट पाउने पनि पीडीएमा उल्लेख छ । मूल्य अभिवृद्धि कर (भ्याट) का रुपमा उसले ४ अर्ब ५० करोड रुपैयाँ बराबर कर छुट पाउने गरी सम्झौता भएको देखिन्छ । तर यस्तो छुट पाउनका लागि जीएमआरले अबको अढाई वर्षमा आयोजना निर्माण सम्पन्न गरेर व्यवसायिक रुपमा विद्युत् उत्पादन सुरु गरिसकेको हुनुपर्नेछ । त्यस्तै आयोजना बनाउनका लागि प्रयोग हुने सिमेन्ट, छडजस्ता निर्माण सामग्रीको आयातमा ५० प्रतिशतसम्म भन्सार छुट पाउने सम्झौता पनि लगानी बोर्डसँग भएको देखिन्छ ।
तर उत्पादित विद्युत् बेच्नका लागि भने जीएमआरले ०.००५ प्रतिशत बराबर मात्रै कर तिरे पुग्नेगरी सम्झौता भएको देखिन्छ । त्यस्तै, काबु बाहिरको परिस्थितिका कारण आयोजनाको काममा ढिलाई हुन गएमा जति दिन समस्या भएको हो त्यति दिन बराबर मात्रै थप समय पाउने पनि सम्झौतामा उल्लेख छ । तर जीएमआरले काम गर्न नसक्नु काबु बाहिरको परिस्थिति नभई उसको व्यवस्थापकीय कमजोरी र आयोजना ओगटेर मात्र राख्ने नियतका रुपमा हेरिँदै आएको छ ।