फ्रान्सले १० वर्षमा एक लाख कृषि फार्म गुमायो- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

फ्रान्सले १० वर्षमा एक लाख कृषि फार्म गुमायो

विस्थापन हुनबाट बचेका फार्म भने तीव्र व्यवसाय विस्तारमा
ददि सापकोटा

फ्रान्स — फ्रान्सले सन् २०१० देखि २०२० सम्म करिब एक लाख कृषि फार्म गुमाएको छ । फ्रान्समा १० वर्षयता प्रत्येक दिन २७ भन्दा बढी फार्म विस्थापित हुने गरेका छन् । फ्रान्समा खेती किसानी गर्नेको संख्या प्रत्येक दिन कम हुँदै गएको छ, जसकारण बाँझो खेत बढ्ने तर कृषि फार्म घट्ने क्रम वृद्धि भइरहेको छ ।

विस्थापन हुनबाट बचेका कृषि फार्मले भने राम्रै गरी व्यवसाय विस्तार गरिरहेको डिसेम्बर १० मा सार्वजनिक कृषि जनगणनाले तयार पारेको प्रतिवेदनमा उल्लेख छ ।

सन् २०२० को कृषि जनगणनाले बनाएको यो तथ्यांक शुक्रबार फ्रान्सका कृषिमन्त्री जुलियन डेनोरमान्डीले सार्वजनिक गरे । युरोपेली संघको निर्देशनअनुसार हरेक १० वर्षमा गरिने यस सर्वेक्षणको अन्तिम नतिजा अप्रिल २०२२ मा उपलब्ध हुनेछ । यससँगै फ्रान्समा किसानको संख्या पनि घटेको छ । सन् २०१० मा कृषिमा छ लाख चार हजार सक्रिय प्रबन्धक, सहकारी र सहयोगी थिए । तिनीहरूको संख्या २०२० मा १८ प्रतिशत घटेर चार लाख ९६ हजारमा झर्‍यो । कृषि कामदारहरूको संख्या २०१० मा सात लाख ४० हजारबाट सन् २०२० मा ११ प्रतिशत घटेर सन् ६ लाख ५९ हजारमा साँघुरिएको छ । कृषिमा यस्तो अवस्था आउनुको मुख्य कारण कृषिमन्त्रीले नै बताउन सकेका छैनन् । ‘किनभने जीवनको प्रत्येक पाठ्यक्रम विशिष्ट छ । यो उमेरको उतारचढाव हुन सक्छ,’ जुलियन डेनोरमान्डीले अनुमान गरेका छन् ।

कृषि क्षेत्रमा बसोबास गर्नेभन्दा निवृत्त हुनेहरूको संख्या फ्रान्समा धेरै छ । ४० वर्षमुनिका किसानको संख्या स्थिर र ५० देखि ६० वर्षभन्दा बढीको संख्या बढ्दै गएको छ । पत्रकार सम्मेलनमा कृषिमन्त्री डेनोरमान्डीले पुस्ता परिवर्तनले कृषिमा धेरै अवरोध सिर्जना गर्ने उल्लेख गरे । सुविधा र तलब कम, जलवायु परिवर्तनको परिणाम अनि किसानहरूलाई व्यक्तिगत र व्यावसायिक जीवनबीच सन्तुलन मिलाउन भएको कठिनाइले किसानको संख्या घट्दै गएको उनको भनाइ छ ।

गएको एक दशकमा पशुधन र साना फार्म विशेष पीडित भएको बताइएको छ । पशुपालनमा विशेषज्ञता भएका फार्मको हिस्सा सन् २०१० मा ५५ बाट सन् २०२० मा ४८ प्रतिशतमा झरेको छ । १० वर्षमा ६४ हजार फार्म घटेका छन् । अर्थात् ३१ प्रतिशत कमी आएको छ । यो कमी दूध र मासु उत्पादन गर्ने गाईबस्तु फार्महरूमा अझ उच्च छ । तिनमा ४१ प्रतिशतले कमी आएको तथ्यांक छ ।

फ्रान्समा माइक्रो–फार्महरूको संख्या पनि घटिरहेको छ । औसतमा १२ हेक्टर जमिनमा फैलिएको र प्रतिवर्ष कुल उत्पादनको २५ हजार युरोभन्दा कम भएकोलाई माइक्रो फार्ममा गनिन्छ । सन् २०१० मा एक लाख ५६ हजार यस्ता फार्म रहेकामा सन् २०२० मा ३१ प्रतिशत घटेर एक लाख आठमा झरेको छ । यसको विपरीत उपयोगी कृषि क्षेत्र दुई करोड ६७ लाख हेक्टरमा स्थिर छ । यो राष्ट्रिय क्षेत्रको लगभग आधा हो ।

यस क्षेत्रमा महिलाहरूलाई आकर्षण गर्नुपर्ने आवश्यकता पनि औंल्याइएको छ । अहिले महिला किसानको संख्या फ्रान्समा जम्मा २७ प्रतिशत छ । त्यसमा पनि विद्यार्थीहरूले आधा प्रतिनिधित्व गर्छन् । कृषि उच्च शिक्षा भएका व्यक्तिले अधिकांश श्रमशक्तिको प्रतिनिधित्व गर्छन् । यो संख्या पनि आगामी दिनमा घट्न सक्ने औंल्याइएको छ । सन् २०२० को कृषि जनगणनाबाट धेरैजसो कृषि फार्मले जैविक खेती, गुणस्तर लेबल र छोटो क्षेत्रलाई मात्रै लक्ष्य गरेर बजारीकरणको नीति अपनाइरहेको देखिएको छ । १० वर्षमा, अर्ग्यानिक खेतीको हिस्सा तीन गुणा बढेको छ ।

सन् २०१४ मा कृषि क्षेत्रको गुणस्तर बढाउन भन्दै फ्रान्सले उच्च वातावरणीय मूल्य (हाई इन्भाइरोन्मेन्टल भ्यालु) सिर्जना गरेको थियो । रासायनिक पदार्थ, कीटनाशक औषधिलगायतको प्रयोग कम गरेर प्राकृतिक खेती उत्पादन गर्ने र त्यसलाई उच्च मूल्यमा बिक्री गर्न सकिने प्रावधान फ्रान्सले नीतिगत रूपमै ल्याएको थियो । यो पद्धति दुई हजार पाँच सयभन्दा बढी फार्मले अपनाएको कृषि मन्त्रालयले उल्लेख गरेको छ । तर यसमा किसानको उत्साह कम देखिएको कृषिमन्त्री डेनोरमान्डीको भनाइ छ ।

प्रकाशित : पुस ९, २०७८ ०८:०२
प्रतिक्रिया
पठाउनुहोस्

कालिञ्चोकमा बढ्दै पर्यटक

नयाँ वर्ष नजिकिँदै गर्दा होटलहरुमा बुकिङ बढ्यो
केदार शिवाकोटी

दोलखा — जिल्लाकै मुख्य पर्यटकीय क्षेत्र कालिञ्चोक भारतीय र बंगलादेशी पर्यटकको रोजाइमा पर्न थालेको छ । अंग्रेजी नयाँ वर्ष मनाउन कालिञ्चोकका २० प्रतिशत होटल भारतीयले बुक गरिसकेका छन् ।

बंगलादेशबाट समेत कालिञ्चोकका होटलमा बुकिङ इन्क्वायरी आइरहेको होटल व्यवसायी हरि ओलीले जानकारी दिए । ‘नयाँ वर्ष मनाउन कालिञ्चोकका होटलमा भारतीय पर्यटकले बुकिङ गर्न थालेका छन्,’ उनले भने, ‘अहिले २० प्रतिशत जति कोठा भारतीयबाट बुकिङ भएको छ, नयाँ वर्ष नजिकिँदै गर्दा यो बढ्न सक्छ ।’

कालिञ्चोकमा मंसिरमा मात्रै ३ हजारभन्दा बढी भारतीय पर्यटक पुगेका छन् । भारतको उत्तर प्रदेश र बिहार राज्यबाट पर्यटक कालिञ्चोक घुम्न आउने गरेका छन् । मुम्बई र दिल्लीबाट समेत कालिञ्चोक आउनेहरू उत्तिकै छन् । मंसिरमा ७५ भन्दा बढी बंगलादेशी पर्यटक कालिञ्चोक घुम्न आएको होटल व्यवसायी बताउँछन् । फूलबारी राजमार्ग प्रयोग गरेर झापाबाट बंगलादेशी पर्यटक कालिञ्चोक आउने गरेको उनीहरूको भनाइ छ । कालिञ्चोकमा आन्तरिक पर्यटकको चहलपहल पनि राम्रै छ ।

पछिल्लो समय कालिञ्चोकमा भारत र बंगलादेशबाट पर्यटक आउन लागेको कालिञ्चोक केबरकारका निमित्त प्रमुख सन्देश शिवाकोटीले पनि स्विकारे । केबलकार चढ्नेको संख्या अहिले प्रतिदिन एक हजार हाराहारी रहेको उनले जनाए । यसमा १५ प्रतिशत पर्यटक भारतीय रहेको उनले बताए । कालिञ्चोकमा केबलकार चढ्न, मन्दिर दर्शन गर्न र हिउँ खेल्दै दृश्यावलोकनका लागि पर्यटक पुग्ने गरेका छन् ।

यस वर्ष अझैसम्म कालिञ्चोकमा हिमपात भएको छैन । क्रिसमस मनाउन आउनेहरूले समेत कालिञ्चोकका होटल बुकिङ गरिरहेको होटल व्यवसायी बताउँछन् । अहिले प्रतिदिन तीन सयसम्म सानाठूला सवारीसाधन कालिञ्चोक पुग्ने गरेका छन् । वैशाखसम्म हिमापात हुने कालिञ्चोक क्षेत्रबाट रोल्वालिङ, लामटाङलगायत हिमशृंखला देखिन्छन् ।

प्रकाशित : पुस ९, २०७८ ०७:४४
पूरा पढ्नुहोस्
प्रतिक्रिया
पठाउनुहोस्
×