कोइला प्रयोग कटौतीबारे चीन र भारतले भने : ‘फेज आउट’ होइन, ‘फेज डाउन’- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

कोइला प्रयोग कटौतीबारे चीन र भारतले भने : ‘फेज आउट’ होइन, ‘फेज डाउन’

एजेन्सी

काठमाडौँ — संयूक्त  राष्ट्रसंघीय जलवायु परिवर्तन सम्बन्धी २६ औं सम्मेलन (कोप–२६) का क्रममा इन्धनको स्रोतका रुपमा कोइलाको प्रयोग शून्यमा झार्ने लक्ष्यका साथ तयार पारिएको अन्तिम सम्झौतापत्रमा हस्ताक्षर गर्न चीन र भारतले अस्वीकार गरेका छन् ।

ती दुई देशले कोइला प्रयोगलाई तत्काल शून्यमा झार्न नसकिने भन्दै घटाउँदै जाने विषयमा मात्रै आफ्नो सहमति रहने जनाएका हुन् । चीनले कोइला प्रयोग तत्काल घटाउन नसक्ने र 'नेट जीरो' अवधारणाको लक्ष्य पुरा गर्न अरु देशको तुलनामा बढी समय लाग्ने यसअघि नै बताउँदै आएको छ । कोइला कटौतीमा ढिलाइ गर्ने चीनको यस्तो नीतिमा कोप–२६ पछि भारत पनि सहमत भएको छ । यी दुई देशको भनाइप्रति विश्वव्यापी रुपमा आलोचना भइरहेको छ ।

कोप–२६ आयोजक समितिका संयोजक तथा बेलायती सांसद आलोक शर्माले चीन र भारतले किन कोइला प्रयोग शून्य पार्न चाहँदैनन् भनेर स्पष्ट कारण खुलाउनुपर्ने बताएका छन् । ‘मानवीय स्वास्थ्यका हिसाबले ज्यानमारा साबित भइसकेको कोइला प्रयोगलाई चीन र भारतले किन निरन्तरता दिन चाहिरहेका छन् भनेर खुलाउनुपर्छ,’ सम्मेलन समापन समारोहका क्रममा शर्माले बताएको द गार्जियनले उल्लेख गरेको छ ।

कोप–२६ को अन्तिम सम्झौताका क्रममा कोइला प्रयोगको विषयलाई लिएर चीन र भारतले ‘फेज आउट’ भन्ने शब्दमा विमति जनाएपछि त्यसको ठाउँमा ‘फेज डाउन’ भन्ने राखिएको पनि द गार्जियनले उल्लेख गरेको छ । ‘जसको अर्थ उनीहरुले अहिलेकै अनुपातमा कोइला प्रयोग गर्दै जानेछन् भन्ने हो । हामीले कडा मेहनत गर्दा २ वर्षभित्रमा कोइला प्रयोग शून्यमा झार्ने लक्ष्य राखेका थियौं,’ शर्माले भनेका छन् ।


प्रकाशित : मंसिर १, २०७८ १२:१५
प्रतिक्रिया
पठाउनुहोस्

‘कोभिड जैविक हतियार होइन’

एजेन्सी

वासिङ्टन — अमेरिकी गुप्तचर निकायहरूले कोभिड–१९ को उत्पत्तिको पहिचान कहिल्यै नहुन पनि सक्ने बताएका छन् । तर यो भाइरस जैविक हतियार भने नभएको निष्कर्ष ती निकायको छ ।

‘अफिस अफ द यूएस डाइरेक्टर अफ नेसनल इन्टिलिजेन्स (ओडीएनआई) ले अद्यावधिक गरेको विवरणमा जनावरबाट मानिसमा फैलिएको र प्रयोगशालाबाट मानिसमा सरेको दुवै परिकल्पना वास्तविक हुन सक्ने उल्लेख गरिएको छ । तर यसबारे यकिन गर्न भने प्रमाण यथेष्ट नभएको उल्लेख गरिएको छ ।

चीनले भने ओडीएनआईको प्रतिवेदनको कडा आलोचना गरेको बीबीसीले उल्लेख गरेको छ । अमेरिकी राष्ट्रपति जो बाइडेन प्रशासनले गत अगस्टमा गरेको तीनमहिने समीक्षालाई अद्यावधिक गरेर उक्त विवरण सार्वजनिक गरिएको हो ।

चारवटा गुप्तचर निकायले कोभिड–१९ को संक्रमण जनावर वा सम्बन्धित भाइरसबाट उत्पत्ति भएकामा ‘कम विश्वस्त’ रहेको बताएका छन् भने एउटा निकायले प्रयोगशालामा दुर्घटना भएपछि मानिसमा संक्रमण फैलिएको हुन सक्ने बताएको छ । त्यस्तो दुर्घटना चीनको वुहान इन्स्टिच्युट अफ भाइरोलोजीमा गरिएको परीक्षणका क्रममा भएको हुन सक्ने उक्त निकायको अनुमान छ ।

प्रतिवेदनमा सन् २०१९ को अन्त्यतिर वुहानमा भएको कोभिड–१९ को संक्रमणअघि चिनियाँ अधिकारीलाई पनि त्यसबारे थाहा नभएको उल्लेख छ । तर आवश्यक सूचना दिन र अन्तर्राष्ट्रिय अनुसन्धानका लागि भने चीनले असहयोग गरेको प्रतिवेदनमा उल्लेख छ । चिनियाँ अधिकारीहरूले कोभिड संक्रमण वुहानको समुद्री खाद्य बजारबाट फैलिएको बताउने गरेका छन् ।

प्रकाशित : कार्तिक १४, २०७८ ०७:४१
पूरा पढ्नुहोस्
प्रतिक्रिया
पठाउनुहोस्
×