आर्टिफिसियल इन्टेलिजेन्स (एआई) को सुरक्षित र विश्वासिलो प्रयोग सम्बन्धमा अमेरिकी सरकारले आफ्ना हरेक संघीय निकायहरूमा प्रमुख एआई अधिकृति नियुक्त गर्न यो साता एक निर्देशिका जारी गरेको छ । संघीय निकायहरूमा वरिष्ठ भूमिकामा रहने गरी प्रमुख एआई अधिकृत नियुक्त गर्न र सोही नेतृत्वमा एआईका विभिन्न प्रविधि अनि प्लाटफर्म प्रयोगको व्यवस्था मिलाउन भनिएको छ । बाध्यात्मक भनिएको सो निर्देशिकामा अमेरिकी सरकारले यो वर्षभित्र नियुक्त गर्ने एआई क्षेत्रका एक सयजना व्यवसायिक व्यक्तिहरूसँग कसरी समन्वय गर्न सकिन्छ भन्नेबारे पनि उल्लेख गरिएको छ ।
सन् २०२३ को तीन महिनामा मात्रै युट्युबले भारतका २२ लाख ५४ हजारभन्दा धेरै भिडियो हटाइदिएको जनाएको छ । भारतपछि सर्वाधिक धेरै भिडियो हटाइएको अर्को देश सिंगापुर हो । सिंगापुरबाट अपलोड गरिएका १२ लाख ४३ हजार भिडियो युट्युबले अक्टोबरदेखि डिसेम्बरबीच प्लाटफर्मबाट हटाइदिएको थियो । संयुक्त राज्य अमेरिका, इन्डोनेसिया, रुस, ब्राजिल, पाकिस्तान, बंगलादेश, जर्मनी र फिनल्यान्डबाट अपलोड गरिएका भिडियो पनि युट्युबले अधिक संख्यामा हटाएको देखिन्छ ।
न्यूयोर्ककी ९३ वर्षीया एकल महिलाले न्यूयोर्ककै सबैभन्दा गरिब स्थानका रुपमा परिचित ब्रोन्क्समा रहेको ब्रोन्क्स मेडिकल स्कूल, अल्बर्ट आइन्स्टाइन कलेज अफ मेडिसिनलाई १ बिलियन अमेरिकी डलर उपहार स्वरूप दिएकी छन् । वाल स्ट्रिट फाइनान्सरकी पत्नी डा. रुथ गोटेसम्यानले त्यहाँ पढ्ने सबै विद्यार्थीहरुको पढाइ खर्च तिर्नका लागि प्रयोग गर्ने सर्तसहित करिब १ खर्ब ३२ अर्ब ६४ करोड नेपाली रुपैयाँ बराबरको रकम मेडिकल कलेजलाई उपहार दिएकी हुन् ।
उपाधिको बलियो दाबेदार जापानले एसियन कपको अन्तिम १६ मा आफ्नो स्थान निश्चित गरेको छ । उसले यसका लागि समूह ‘डी’ को खेलमा इन्डोनेसियालाई ३–१ ले हरायो । यो जितपछि जापानको तीन खेलबाट ६ अंक भएको छ ।
संयुक्त राज्य अमेरिकाका विभिन्न विख्यात विश्वविद्यालयहरूले गायिका एवं सङराइटर टेलर स्विफ्ट र उनका कामबारे शैक्षिक पाठ्यक्रम बनाइ अध्यापन थाल्ने घोषणा गरेका छन् । गत डिसेम्बरमा हार्भर्डले आउँदो स्प्रिङ सेमेस्टरदेखि कक्षा सुरु गर्ने जनाएयता त्यस विषयमा भर्ना हुने विद्यार्थीको ओइरो लागेको छ, कतिसम्म भने विश्वविद्यालयले थप शिक्षकहरू खोज्नु पर्ने अवस्था आएको छ ।
लिभरपुलले युरोपा लिगमा आफ्नो शतप्रतिशत सुरुआतलाई कायम राख्दै बिहीबार समूह ‘ई’ को खेल टुलुजलाई सहजै ५–१ गोल अन्तरले पराजित गरेको छ । लगातार तीन खेलमा लिभरपुलले जित निकालेको छ र नौ अंकसहित समूहको शीर्ष स्थानमा छ ।
च्याटजीपीटीजस्ता जेनेरेटिभ आर्टिफिसयल इन्टेलिजेन्स टुलहरूले आफ्ना लेख, रचना, स्क्रिप्ट आदि अनुमति बेगर प्रयोग गर्नुका साथै एआईमार्फत कलाकारका आवाज एवम् हुलिया बनाएर व्यवसाय गरेको लगायत विविध विषयमा हलिउडकर्मीले विरोध गर्दै आएका थिए । लेखक तथा कलाकारहरूको युनियन र हलिउडका स्टुडियोबीच एआईको सुरक्षित र अनुमतिसहितको प्रयोगका विषयमा सहमति भएसँगै पाँच महिना लामो हड्ताल हाल अन्त्य भएको छ ।
भारतको सबैभन्दा ठूलो वायुसेवा कम्पनी इन्डिगोले एक विशेष स्मार्टवाचमार्फत आफ्ना विमान चालकहरूको थकान वा तन्द्रा अवस्था जाँच्ने भएको छ । इन्डिगोले थकान व्यवस्थापनका प्रक्रियाहरूमा सुधार गर्न सल्लाहकारसमेत नियुक्त गर्ने योजना बनाएको रोयटर्सले जनाएको छ ।
अमेरिका लगायत विभिन्न देशको विरूद्धमा अफवाह फैलाउने तथा चीन सरकार लक्षित प्रसार गर्ने कार्यमा गुप्तरूपमा संलग्न एक ठूलो अनलाइन अभियान निस्तेज पारिएको मेटाले जनाएको छ । मेटाले हालै सार्वजनिक गरेको रिपोर्टमा चिनियाँ सुरक्षा निकायका व्यक्तिहरूसँग सम्बन्धित फेसबुक र इन्स्टाग्रामका ७ हजार ७०० एकाउन्ट निस्तेज पारिएको उल्लेख छ । मेटाका अनुसार यो अभियानमा फेसबुक र इन्स्टाग्रामसँगै युट्युब, टिकटक, पिनइन्ट्रेस्ट, रेडिट समेत ५० वटा एप र प्लाटफर्महरूको प्रयोग भएको थियो ।
भारतले महँगो बासमती चामलको मात्रै निर्यात गर्ने भएको छ । समर्थन मूल्य प्रति टन १२०० अमेरिकी डलरभन्दा मुनिको बासमती चामल अन्य मुलुकमा निर्यात नगर्ने निर्णय कार्यान्वयन गर्न व्यापार प्रवर्द्धन निकाय ‘एपेडा’ (कृषि तथा प्रंशोधित अन्न उत्पादन निर्यात विकास अख्तियार) लाई निर्देशन जारी गरिएको छ ।
