वीरगन्जका भन्सारले तीन महिनामै संकलन गरे ६८ अर्ब बढी राजस्व- अर्थ / वाणिज्य - कान्तिपुर समाचार

वीरगन्जका भन्सारले तीन महिनामै संकलन गरे ६८ अर्ब बढी राजस्व

शंकर आचार्य

पर्सा — वीरगन्जस्थित २ भन्सार कार्यालयले चालु आवको त्रैमासिक अवधिमा ६८ अर्ब रुपैयाँ बढी राजस्व संकलन गरेका छन् ।

कोरोना कहरपछि आयात निर्यात व्यापार पुरानै लयमा फर्किन नसकेको अवस्था बीच पनि मुलुकको प्रमुख स्थल नाकास्थित वीरगन्ज र सिर्सिया सुक्खा बन्दरगाहले गरी यति परिमाणमा राजस्व संकलन गरेका हुन् ।

दुबै भन्सारले त्रैमासिक अवधिमा लक्ष्यभन्दा बढी नै राजस्व संकलन गरेका हुन् ।

वीरगन्ज भन्सार कार्यालयको तथ्यांकअनुसार, चालु आवको साउनदेखि असोज महिनासम्मको त्रैमासिक अवधिमा यो भन्सारले ४४ अर्ब २८ करोड ७१ लाख ३६ हजार रुपैयाँ राजस्व संकलनको लक्ष्य रहेकोमा २० प्रतिशत बढी अर्थात् ५३ अर्ब ६ करोड ९२ लाख ८७ हजार रुपैयाँ राजस्व संकलन गरेको छ ।

असोज महिनामा मात्रै यो भन्सारले २० अर्ब ५१ करोड ६१ लाख ५७ हजार रुपैयाँ राजस्व संकलन गर्न सफल भएको छ । जुन मासिक लक्ष्यभन्दा २२ दशमलव ५ प्रतिशतले बढी हो । यो महिनामा १६ अर्ब ७५ करोड १९ लाख ७ हजार रुपैयाँ राजस्व संकलनको लक्ष्य यो भन्सारले पाएको थियो ।

यता सुक्खा बन्दरगाह भन्सार कार्यालयले चालु आवको त्रैमासिक अवधिमा १२ अर्ब ५५ करोड ४ लाख ६ हजार रुपैयाँ राजस्व संकलन गरेको छ । जुन लक्ष्यभन्दा ५ दशमलव ६६ प्रतिशतले बढी हो । यस अवधिमा ११ अर्ब ८८ करोड ११ लाख ४१ हजार रुपैयाँ राजस्व संकलनको लक्ष्य यो भन्सारले पाएको थियो ।

वीरगन्ज भन्सार स्तै यो भन्सारले असोज महिनामा भने मासिक राजस्व असूली लक्ष्य भेट्टाउन सकेन । यो महिनामा ४ अर्ब २१ करोड ५७ लाख ८५ हजार रुपैयाँ राजस्व संकलनको लक्ष्य पाएको यो भन्सारले ३ अर्ब ९९ करोड ५८ लाख ८६ हजार रुपैयाँ मात्र राजस्व असूली गर्न सक्यो । जुन लक्ष्यको ९४ दशमलव ७८ प्रतिशत मात्र हो ।

वीरगन्ज भन्सार कार्यालयका प्रमुख भन्सार अधिकृत हरिहर पौडेलले असोज महिनामा चाडपर्व लक्षित सामग्रीको बढी आयात भएपछि त्रैमासिक राजस्व असुली लक्ष्य भेट्टाउन सहज भएको बताए । विशेषगरी यो महिनामा जिप, कार, भ्यानजस्ता नयाँ सवारी साधनको आयात अत्यधिक भएको उनले बताए ।

सुक्खा बन्दरगाह भन्सार कार्यालयका सूचना अधिकृत चुडामणि शर्मा कट्टेलले समग्रमा त्रैमासिक अवधिमा राजस्व असुली लक्ष्यभन्दा बढी भए पनि असोज महिनामा भने मासिक राजस्व असुली लक्ष्य भेट्टाउन समस्या भएको बताए । उनले अघिल्ला वर्षहरुमा चाडपर्व नजिकिएसँगै चाडपर्व लक्षित वस्तुहरुको आयात बढ्ने गरेकोमा यस वर्ष भने त्यस्तो नभएको बताए । कोभिड महामारीसँगै विश्वव्यापी रुपमै कतिपय वस्तुको उत्पादन र मागसमेत घटेकाले त्यसको असर देखिएको हुन सक्ने उनले बताए ।

दसैंअघि रसुवा नाका सन्चालनमा आइसकेको र दसैं लक्षित लत्ताकपडा, जुत्ता तथा अन्य चिनियाँ वस्तुहरु उक्त नाकाबाट भित्रिएकाले समेत आयातकर्ताले यो नाका प्रयोग नगरेको हुन सक्ने उनले बताए । असोज महिनामा १५ गतेसम्म राजस्व संकलन लयमै रहे पनि त्यस पछि भने ओरालो लागेको उनले बताए ।

प्रकाशित : कार्तिक ३, २०७८ १८:३५
प्रतिक्रिया
पठाउनुहोस्

पर्सामा वर्षाले २ हजार हेक्टरको धान बाली नष्ट

शंकर आचार्य

पर्सा — कृषि ज्ञान केन्द्र पर्साका अनुसार अत्याधीक वर्षाका कारण पर्सा जिल्लाभर करिब २ हजार हेक्टर जमिनको धान बाली नष्ट भएको छ । केन्द्रका प्रमुख मुनिलाल प्रसादका अनुसार मंगलबार र बुधबार गरिएको स्थलगत निरीक्षणका आधारमा उक्त क्षति विवरण संकलन भएको हो ।

‘हामीले मंगलबार र बुधबार गरी २ दिन क्षतिको स्थलगत निरीक्षण गर्‍यौँ,’ उनले भने, ‘जिल्लाभर ८ हजार ५ सय हेक्टर क्षेत्रमा लगाइएको धान भदैया बालीमध्ये करिब २ हजार हेक्टरको धान बाली नष्ट भएको हाम्रो प्रारम्भिक अनुमान छ ।’

किसानले बाली भित्र्याउनका लागि काटेर खेतमा राखेको तथा पाकेर भित्र्याउन तयार भइसकेको भदैया बालीसमेत नष्ट भएको उनले बताए । पोखरीया नगरपालिका, पर्सागढी नगरपालिका, जिराभवानी गाउँपालिका, ठोरी गाउँपालिकाका अधिकांश जमिनमा भदैया धानको खेती गरिएको थियो ।

यसबाहेक ठोरी गाउँपालिकामा वडा नं ५ र ४ मा सुवर्णपुर, विजयवस्ती क्षेत्रमा लगाइएको तोरी बालीसमेत नष्ट भएको उनले बताए । ‘त्यस भेगका किसानले धान बाली भित्र्याएर तोरी छरेका थिए,’ उनले भने, ‘वर्षाले धानसँगै तोरी बाली पनि नष्ट गरेको पाइयो, के कति नष्ट भएको छ त्यो भने हालसम्म यकिन भइसकेको छैन ।’

पश्चिमी जिल्लाहरुमा जस्तो ठूलो क्षति पर्सामा भने नभएको प्रसादले बताएका छन् । वर्षाले अगहनी जातको धान बालीमा भने क्षति नपुर्‍याएको किसानहरु बताउँछन् । उक्त जातको धान बाली लगाएका किसानहरुका अनुसार वर्षाले यस जातको बालीलाई लाभ नै हुने प्रसौनीका किसानहरुले बताएका छन् ।

प्रकाशित : कार्तिक ३, २०७८ १४:५५
पूरा पढ्नुहोस्
प्रतिक्रिया
पठाउनुहोस्
×