नेपालको आर्थिक वृद्धिदर घट्ने एडीबीको प्रक्षेपण- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

नेपालको आर्थिक वृद्धिदर घट्ने एडीबीको प्रक्षेपण

चालु आवमा ४.१ प्रतिशतले बढ्ने अनुमान
कान्तिपुर संवाददाता

काठमाडौँ — एसियाली विकास बैंक (एडीबी) ले नेपालको आर्थिक वृद्धिदरको यसअघिको प्रक्षेपण संशोधन गरेको छ । गत आर्थिक वर्ष २०७७/७८ को आर्थिक वृद्धिको प्रक्षेपित लक्ष्य नेपालले भेटाउन नसकेको र चालु आर्थिक वर्ष २०७८/७९ का लागि यसअघि गरिएको प्रक्षेपण पनि पूरा गर्न नसकिने देखिएकाले लक्ष्य संशोधन गरिएको एडीबीले जनाएको छ । 

‘एसियन डेभलपमेन्ट आउटलुक’ ले यसअघि सार्वजनिक गरेको नेपालको कुल ग्राहस्थ उत्पादन (जीडीपी) वृद्धिदरको लक्ष्य संशोधन गर्नुपरेको एडीबीले बुधबार सार्वजनिक गरेको विवरणमा उल्लेख छ । संशोधित विवरणअनुसार गत आर्थिक वर्ष २०७७/७८ मा जीडीपी वृद्धिदर ३.१ प्रतिशत अनुमान गरेकोमा २.३ प्रतिशतमात्रै कायम भएको देखिएको छ । सरकारले भने गत आर्थिक वर्षको आर्थिक वृद्धिदर ४ प्रतिशत रहने अनुमान गरेको थियो ।

त्यस्तै, चालु आर्थिक वर्ष २०७८/७९ का लागि एडीबीले यसअघि ५.१ प्रतिशत वृद्धिदर प्रक्षेपण गरिएकोमा त्यसलाई संशोधन गर्दै ४.१ प्रतिशतमा झारेको छ ।

गत आर्थिक वर्षमा नियन्त्रित अवस्थामा रहेको मूल्यवृद्धि चालु आर्थिक वर्षमा भने बढ्ने अनुमान गरिएको छ । गत आर्थिक वर्षमा मूल्यवृद्धि ३.६ प्रतिशत बराबर रहेको र चालु आर्थिक वर्षमा यस्तो दर बढेर ५.२ प्रतिशत पुग्ने अनुमान एडीबीले गरेको छ ।

चालु आर्थिक वर्षको सुरुवाति दिनहरुमा कोभिड–१९ महामारी संक्रमणदर उच्च नै रहेकाले आर्थिक वृद्धिदरको लक्ष्य संशोधन गर्नुपरेको एडीबीले जनाएको छ । कृषि, उत्पादन र उद्योग क्षेत्र बिस्तारै लयमा फर्किए पनि पर्यटन र सेवा क्षेत्रमा अझै महामारीको असर बाँकी रहेको छ । स्वास्थ्य क्षेत्र, रोजगारी सिर्जना र सामाजिक सुरक्षाको विषयलाई सरकारले प्राथमिकतामा राखे पनि त्यसको कार्यान्वयनमा देखिएको जटिलताले अर्थतन्त्रको वृद्धिदर खुम्चिएको एडीबीले जनाएको छ ।

अघिल्लो आर्थिक वर्षको तुलनामा गत आर्थिक वर्ष आयात २५.७ प्रतिशत, निर्यात ३० प्रतिशत र रेमिट्यान्स ८.२ प्रतिशतले बढेको थियो । अर्थतन्त्रमा महामारीको असर बिस्तारै कम हुँदै गए पनि सामान्य अवस्थामा भने फर्किसकेको छैन ।

प्रकाशित : आश्विन ६, २०७८ १४:२८
प्रतिक्रिया
पठाउनुहोस्

पर्वतीय उडान सुरु

कान्तिपुर संवाददाता

काठमाडौँ — निषेधाज्ञाका कारण वैशाखयता ५ महिना बन्द रहेको माउन्टेन फ्लाइट (पर्वतीय उडान) चाडपर्वको आगमनसँगै खुला भएको छ । सरकारले निषेधाज्ञा खुकुलो गरेसँगै बुद्ध एयर र यति एयरलायन्सले काठमाडौंबाट हुने पवर्ततीय उडान सुचारु गरेको जनाएका छन् ।

पर्वतीय उडान हुने रुटमा दुवै वायुसेवाले गणेश हिमालदेखि विश्वकै अग्लो हिमचुचुरो सगरमाथासम्म कम्तीमा एक दर्जन हिमालको नजिकैबाट दृश्यावलोकन गराउँछन् । यो रुटमा काठमाडौंबाट उड्ने जहाज २५ हजार फिट उचाइमा उड्दै फन्को लगाउँदै काठमाडौंमै फर्किन्छन् ।

पर्यटन बजार चलायमान बनाउन बुद्धले हरेक शनिबार ९ हजार ९ सय ९९ रुपैयाँमा बिक्री गर्ने एउटा टिकटमा अर्को एकजनालाई सित्तैमा उडाउने अफर ल्याएको छ । यो अफर नेपाली र भारतीय नागरिकका लागि मात्रै हो ।

भारतीयबाहेक अन्य मुलुकका नागरिकहरुले पर्वतीय उडानको टिकट १ सय ९२ डलर मा खरिद गर्नुपर्ने हुन्छ । यात्रु संख्या १९ भन्दा बढी भए बुद्धले ७० सिट क्षमताको एटीआर–७२ जहाज उडाउने जनाएको छ । बुकिङ कम भएमा १९ सिट क्षमताको बिचक्राफ्ट जहाज उडाउँछ ।

यसैबीच यतिले हरेक आइतबार पर्वतीय उडान सुरु गर्ने घोषणा गरेको छ । ‘मौसममा केही सुधार हुने संकेत देखिएको र सेप्टेम्बर–मार्च महिना उपयुक्त मानिने भएकाले पर्वतीय उडान सुचारु गरिएको छ,’ यतिका प्रवक्ता सुर्दशन बर्तौलाले भने ।

यतिले पर्वतीय उडानमा एटीआर–७२ विमान उडाउने छ । उसले दुई जना नेपालीलाई ९ हजार ८ सय ४८ रुपैयाँ तथा दुई जना आवासीय विदेशीका लागि १४ हजार ७ सय ७५ रुपैयाँ भाडा तोकेको छ । यतिले एक जनामात्रै नेपाली वा भारतीय भएमा सगरमाथाको उचाइ बराबर अर्थात ८ हजार ८ सय ४८ रुपैयाँ एउटा टिकटको भाडा तोकेको छ ।

हिमालमा पदयात्रा तथा आरोहण गर्न नसक्ने हिमालप्रेमी विदेशीहरुका लागि नेपालको माउन्टेन फ्लाइट प्रख्यात छ । कोरोना संक्रमणअघि निजी वायुसेवाहरुले पूर्वमा विराटनगर र पश्चिममा पोखराबाट पनि माउन्टेन फ्लाइट सुरु गरेका थिए । तर, कोरोना संक्रमणसंगै यी दुई स्थानबाट हुने उडान बन्द हुन पुगे ।

प्रकाशित : आश्विन ६, २०७८ १४:२०
पूरा पढ्नुहोस्
प्रतिक्रिया
पठाउनुहोस्
×