महसुल वृद्धिको विरोधमा फलामे डन्डी बिक्रीमा रोक
काठमाडौँ — सरकारले बजेटमार्फत फलामे डन्डीमा भन्सार तथा अन्तःशुल्क बढाएपछि उद्योगीहरूले यसको बिक्रीवितरण रोकेका छन् । सोमबार राजधानीमा पत्रकार सम्मेलन आयोजना गर्दै नेपाल स्टिल रोलिङ मिल एसोसिएसन सम्बद्ध केही उद्योगी व्यवसायीले फलामे छड तथा डन्डी बिक्रीवितरण हाललाई रोकिएको जनाएका हुन् ।
‘आयातित सामानको भन्सार छुटाउने कार्य तथा उद्योगबाट उत्पादित फलामे छड बिक्रीवितरणसमेत हाललाई रोकेका छौं,’ एसोसिएसनका पूर्वअध्यक्ष प्रदीपकुमार श्रेष्ठले भने, ‘सरकारको निर्णय नराम्रो होइन । तर नतिजा नकारात्मक आउने भयो ।’ अर्थमन्त्री जनार्दन शर्माले शुक्रबार संसद्मा पेस गरेको अध्यादेशको बजेटलाई प्रतिस्थापन गर्न बनेको विधेयकमार्फत यसको भन्सार महसुल तथा अन्तःशुल्कमा हेरफेर गरेका छन् ।
‘पत्रुसँग मिसाउने स्पञ्ज आइरनको भन्सार महसुलमा शून्य प्रतिशत भन्सार लाग्ने तर आयातित बिलेटको भन्सार ४.७५ प्रतिशत लाग्ने तथा १६ सय ५० प्रति टनबाट वृद्धि गरी २५ सय अन्तःशुल्क तथा सोझै बिलेट प्रयोग गरी उत्पादन गरिने डन्डी स्वतः महँगो हुन जाने हुन्छ,’ उद्योगीहरूको विज्ञप्तिमा भनिएको छ, ‘जसले गर्दा बहुसंख्यक डन्डी उद्योगले प्रतिस्पर्धा गर्न नसकी घाटा बेहोर्दै बन्द हुने स्थितिको सिर्जना हुन जान्छ । यसको प्रत्यक्ष प्रभाव बैंकको लगानीमा समेत पर्न जान्छ ।’ कच्चा पदार्थमा शून्य प्रतिशत अन्तःशुल्क हुनु भनेको विश्व व्यापार संगठनको नीतिविपरीत रहेको उनीहरूको भनाइ छ ।
हाल ३० उद्योगमध्ये ६ उद्योगले स्पन्ज ल्याएर बिलेट उत्पादन गरिरहेका छन् । बाँकी उद्योगले बिलेट आयात गरेर फलामका डन्डी उत्पादन गर्ने एसोसिएसनले बताएको छ ।
प्रकाशित : भाद्र २८, २०७८ १४:३९