बुद्ध एयरको पोखरा–सिमरा उडान सुरु - अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

बुद्ध एयरको पोखरा–सिमरा उडान सुरु 

कान्तिपुर संवाददाता

काठमाडौँ — प्रदेश २ को सिमरा र गण्डकी प्रदेशको पोखरा हवाई मार्गबाट जोडिएको छ । बुधबार पहिलोपल्ट पोखरा–सिमरा–पोखरा उडान भएको हो । 

यसअघि काठमाडौंबाहेक नेपालगञ्ज, भरतपुर र भैरहवामा पोखराबाट सिधा उडान हुँदै आएको छ । पोखराबाट नेपालगञ्ज, भरतपुर र भैरहवामा उडान भरिरहेको बुद्ध एअरले नै पोखरा–सिमराको सेवा सुरु गरेको हो ।

१९०० डी विचक्राफ्ट १८ सिटे जहाजले साताको ३ दिन पोखरा–सिमरा उडान भर्ने छ । आइतबार, बुधबार र शुक्रबार पोखरा र सिमराबाट यात्रुले आहोरदोहोर गर्न पाउनेछन् । यो मार्गमा ४ हजार ७ सय ७०, ५ हजार २ सय ७० र ७ हजार १ सय ७० गरी तीनथरि भाडादर छन् । उडान समय ३० मिनेट रहेको छ । पोखराबाट सिमरा दिउँसो १२:२० र सिमराबाट पोखराको उडान १३:१५ बजे तोकिएको छ ।

बुद्ध एयरका पोखरा कार्यालय प्रबन्धक गौतम बरालले यात्रुको चाप बढेसँगै उडान संख्या बढाउन सकिने बताए । पहिलो दिन सिमराबाट ८ यात्रु पोखरा आएका छन् । पोखराबाट भने १८ यात्रु बोकेर जहाज सिमरा पुगेको छ । नेपाल एसोसियसन अफ टुर एन्ड ट्राभल एजेन्ट्स (नाट्टा) गण्डकी प्रदेश समितिको अगुवाइमा पर्यटन पुनरुत्थान कार्यक्रमअन्तर्गत पोखराका पर्यटन व्यवसायी जहाजमार्फत सिमरा पुगेका हुन् ।

टोलीमा प्रदेशका पर्यटन, उद्योग, वाणिज्य तथा आपूर्ति मन्त्री मणिभद्र शर्मा समेत सहभागी छन् । टोलीमा नाट्टाका केन्द्रीय अध्यक्ष, पोखरा पर्यटन परिषद्, पोखरा उद्योग वाणिज्य संघ, नागरिक उड्डयन कार्यालयका प्रतिनिधिको सहभागिता छ । तीन दिनको भ्रमणमा टोलीले सिमरा र वीरगन्जमा प्रदेश सरकार, स्थानीय तह, उद्योग, पर्यटन व्यवसायी र सञ्चारकर्मीसँग अन्तरक्रिया गरेर शुक्रबारको फ्लाइटबाट पोखरा फर्किने छ ।

उडान सुरु भएसँगै सीमा खुल्नेबित्तिकै भारतीय सहरको नजिक रहेको वीरगन्ज नाका हुँदै पोखरा आउने पर्यटकको संख्यामा वृद्धि हुने अपेक्षा गरिएको छ । यसअघि बुद्ध एयरले पोखरालाई अन्तरप्रदेश उडानको हब बनाउन भरतपुर, भैरहवा र नेपालगञ्जमा सिधा उडान भरिरहेको छ ।

प्रकाशित : भाद्र १६, २०७८ १८:००
प्रतिक्रिया
पठाउनुहोस्

सभामुख, निर्वाचन आयोग र नेकपा (एस)विरुद्ध ओलीले दायर गरेको रिटको पेसी शुक्रबार 

कान्तिपुर संवाददाता

काठमाडौँ — नेकपा (एमाले)का अध्यक्ष केपी शर्मा ओलीले सभामुख अग्निप्रसाद सापकोटा, निर्वाचन आयोग, नेकपा (एकीकृत समाजवादी)लगायतलाई विपक्षी बनाई दायर गरेको रिट निवेदनको पेसी शुक्रबारका लागि तोकिएको छ ।

तस्बिरः जयसिंह महरा/कान्तिपुर

एमालेले कारबाही सिफारिस गरेका १४ सांसदलाई पदमुक्त नगरेको भन्दै सभामुख सापकोटा, ती सांसदसहितको सनाखतबाट एमाले विभाजन गरेको भन्दै निर्वाचन आयोग र नेकपा (एस)लाई विपक्षी बनाएर ओलीले वारेसमार्फत बुधबार रिट दायर गरेका थिए ।

रिट निवेदनको पेसी शुक्रबारका लागि तोकिएको सर्वोच्च अदालतका सञ्चार विज्ञ किशोर पौडेलले जानकारी दिए ।

रिट निवेदनमा साउन २५ गते कारबाही गरेका १४ सांसदलाई पार्टी र सांसदबाट निष्कासन गरिएको र त्यसको कार्यान्वयनका लागि संसद् सचिवालयलाई पत्र पठाउँदा कार्यान्वयन नगरिएको भनिएको छ । त्यस्तै, ती १४ जनासँगै सुरुमा हस्ताक्षर नभएका झलनाथ खनाललाई समेत सनाखत गरी नयाँ दल दर्ता गरेको भन्दै आयोगविरुद्ध रिट दायर गरिएको छ । त्यसरी भएका पत्राचार र निर्णय बदरका लागि परमादेश माग गरिएको छ ।

त्यस्तै, एमालेको चुनाव चिह्न सूर्य लिएर निर्वाचित भएका लुम्बिनी प्रदेश सभाका २ सदस्यलाई कारबाही सिफारिस गर्दा पनि कार्यान्वयन नभएको भन्दै ओलीले रिट दायर गरेका थिए । उक्त रिट पनि शुक्रबारका लागि पेसी तोकिएको छ । विमलाकुमारी खत्री वली र अजय शाहीलाई राजनीतिक दलसम्बन्धी ऐनअनुसार कारबाही गरिएको र त्यसको कार्यान्वयन नगरिएको भन्दै पदमुक्तको मागसहित रिट दायर गरिएको हो ।

प्रकाशित : भाद्र १६, २०७८ १७:५०
पूरा पढ्नुहोस्
प्रतिक्रिया
पठाउनुहोस्
x
×