बढी धान फल्ने क्षेत्रमै कम रोपाइँ- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

बढी धान फल्ने क्षेत्रमै कम रोपाइँ

कृषि विभाग भन्छ– ‘प्रदेश २ मा पानी बढी पर्‍यो, पानी जम्दा रोपाइँमा असर गर्‍यो । साउनसम्म गत वर्षजत्तिकै रोपाइँ हुन्छ ।’
रोपाइँमा ढिलाइ हुँदा उत्पादनमा असर पर्ने चिन्ता
राजु चौधरी

काठमाडौँ — धानको पकेट क्षेत्र तराईमै कम रोपाइँ भएपछि उत्पादन घट्ने हो कि भन्ने चिन्ता बढेको छ ।

मनसुन सक्रिय भएको र खेतमा पानी जम्दा रोपाइँमा ढिलाइ भएको कृषि विभागले जनाएको छ । यही साउन ६ सम्म तराई क्षेत्रमा ९० प्रतिशत रोपाइँ भएको विभागले सार्वजनिक गरेको विवरण छ । जब कि गत वर्ष यही समयमा त्यहाँ ९४.१६ प्रतिशत रोपाइँ भएको थियो । ‘तराईमा पनि विशेषगरी प्रदेश २ मा पानी बढी भयो । धान रोपाइँ हुने खेतमा पानी जम्यो,’ विभागका सूचना अधिकारी महादेवप्रसाद पौडेलले भने, ‘प्रदेश २ मा रोपाइँ कम हुँदा समग्र रोपाइँमै असर गर्‍यो ।’ तराईमा ९ लाख ७७ हजार ४ सय १४ हेक्टरमा रोपाइँ हुने गरेको विभागको विवरण छ । त्यसमध्ये प्रदेश २ मा मात्र ३ लाख ६५ हजार ६ सय १५ हेक्टरमा रोपाइँ हुन्छ । यहाँ ३ लाख २२ हजार २ सय ६९ हेक्टर (८८.१४ प्रतिशत) मा रोपाइँ भएको छ । गत वर्ष यही समयमा प्रदेश २ मा ३ लाख ५३ हजार ७ सय ९० हेक्टर (९६.७७ प्रतिशत) मा रोपाइँ भएको थियो ।


प्रदेश १ मा ८०.२ प्रतिशत रोपाइँ भएको छ । गत वर्षको तुलनामा प्रदेश १ को रोपाइँ २.४१ प्रतिशत कम हो । यहाँ २ लाख ७५ हजार ९ सय १ क्षेत्रफलमा रोपाइँ हुन्छ । यसमध्ये २ लाख २० हजार ७ सय ७२ हेक्टरमा रोपाइँ भएको विभागले जनाएको छ । नेपालमा मध्य, पूर्व र तराईमा बढी धान खेती हुन्छ ।

७० प्रतिशत तराईमै उत्पादन हुन्छ । तर सोही क्षेत्रमा धान रोपाइँ कम भएको र यसले उत्पादनमा असर पर्ने जानकारहरू बताउँछन् । यद्यपि विभागले भने गत वर्षकै हाराहारीमा रोपाइँ हुने दाबी गरेको छ ।

‘समग्र हिसाब गर्दा दुई/तीन प्रतिशत कम हो । त्यो खासै समस्या होइन,’ सूचना अधिकारी पौडेलले भने, ‘गत वर्ष ९८ प्रतिशत हाराहारीमा रोपाइँ भएको थियो । साउन मसान्तसम्म गत वर्षकै हाराहारीमा पुग्न सक्छ ।’ समयमै रोपाइँ हुन नसक्दा उत्पादनमा केही असर पुग्न सक्ने उनले बताए । वाग्मती प्रदेशमा भने रोपाइँ बढेको छ । वाग्मतीमा १ लाख १५ हजार २ सय ९५ हेक्टरमा रोपाइँ हुने विभागको विवरण छ । यहाँ ९०.३४ प्रतिशत अर्थात् १ लाख ४ हजार १ सय ५२ हेक्टरमा रोपाइँ भएको छ । गत वर्षको सोही अवधिमा वाग्मतीमा ९४ हजार ७ सय ९९ हेक्टरमा मात्रै रोपाइँ भएको थियो ।

गण्डकीमा पनि रोपाइँमा ४ प्रतिशत कमी आएको छ । यहाँ १ लाख ८ हजार २ सय ७८ हेक्टरमा रोपाइँ हुन्छ । साउन ६ सम्म ८७.६ प्रतिशत अर्थात् ९४ हजार ८ सय ९१ हेक्टरमा रोपाइँ भएको छ । गत वर्षको सोही अवधिमा गण्डकीमा ९१.११ प्रतिशत अर्थात् ९८ हजार ६ सय ५५ हेक्टरमा रोपाइँ भएको थियो । लुम्बिनीमा पनि रोपाइँ ३ प्रतिशत घटेको छ । यहाँ ३ लाख ३ हजार ५ सय ९३ हेक्टरमा रोपाइँ हुन्छ । यसमध्ये २ लाख ८० हजार ३६ हेक्टरमा रोपाइँ भएको छ । गत वर्षको सोही अवधिमा २ लाख ८८ हजार ८ सय ३८ हेक्टरमा रोपाइँ भएको थियो ।

कर्णालीको अवस्था पनि उस्तै छ । यहाँ ३८ हजार ३ सय ८५ हेक्टरमा रोपाइँ हुन्छ । साउन ६ सम्म ९३.८२ प्रतिशत अर्थात् ३६ हजार १२ हेक्टरमा रोपाइँ भएको छ । गत वर्षको सोही अवधिमा भने ३६ हजार ९ सय ३९ हेक्टरमा रोपाइँ भएको विभागको विवरणमा उल्लेख छ ।

सुदूरपश्चिम प्रदेशमा भने रोपाइँ बढेको छ । गत वर्ष १ लाख ५७ हजार २ सय २१ हेक्टरमा रोपाइँ भएकोमा अहिले १ लाख ५९ हजार २ सय ७६ हेक्टरमा रोपाइँ भएको छ । विभागका अनुसार सुदूरपश्चिममा १ लाख ६४ हजार ६ सय ३९ हेक्टरमा रोपाइँ हुन्छ ।

मुलुकभर बर्खे बाली १३ लाख ७१ हजार ७ सय ६ हेक्टरमा रोपाइँ हुन्छ । यसमध्ये साउन ६ सम्म ८८.७५ प्रतिशत अर्थात् १२ लाख १७ हजार ४ सय ११ हेक्टरमा रोपाइँ भएको छ ।

प्रकाशित : श्रावण ९, २०७८ ०७:५६
प्रतिक्रिया
पठाउनुहोस्

पहिलो स्पर्धामै कल्पना

टोकियो ओलम्पिक २०२० मा नेपाली खेलाडीद्वय सुटिङकी कल्पना परियार र जुडोकी सोनिया भट्टले शनिबार प्रतिस्पर्धा गर्दै छन्
राजु घिसिङ

टोकियो — टोकियो ओलम्पिक २०२० मा पहिलो स्वर्ण पदकको प्रतिस्पर्धा सुटिङको महिला १० मिटर एयर राइफलमा शनिबार हुँदै छ । यसै स्पर्धामा नेपालकी कल्पना परियारले चुनौती पेस गर्दैछिन् । असाका सुटिङ रेन्जमा बिहानै सुरु हुने स्पर्धामा कल्पनाले उत्कृष्ट प्रदर्शन गर्ने अपेक्षा गरिएको छ ।

असाका सुटिङ रन्जमा अभ्यास गर्दै नेपालीकी सुटिङ खेलाडी कल्पना परियार । तस्बिर सौजन्य : एनएसजेएफ

आर्मीकी २६ वर्षीया खेलाडीले आमन्त्रण कोटामा ओलम्पिक खेल्ने अवसर पाएकी हुन् । उनले ओलम्पिक छनोटको रूपमा रहेको एसियन सुटिङ च्याम्पियनसिप २०१९ (दोहा) मा ६१३.५ स्कोर गर्दै टोकियो ओलम्पिकको ढोका खोलेकी थिइन् । उनीसँगै सुस्मिता नेपालले ओलम्पिक छात्रवृत्तिमा दुई वर्ष तयारी गर्ने अवसर पाएका थिए । सुस्मिताले भने टोकियो यात्राको अवसर पाइनन् ।

आठ वर्षअघि नेपाली सेनामा भर्ती भएपछि राइफल र पेस्तोल चलाउन थालेकी कल्पनाले भनिन्, ‘अविश्वसनीय रूपमा यसैपालि ओलम्पिक खेल्ने सपना पूरा गर्ने अवसर पाएकी छु । यसलाई उत्कृष्ट प्रदर्शन गर्दै सार्थक तुल्याउने प्रयास गर्नेछु ।’ नेपालले आयोजना गरेको १३ औं दक्षिण एसियाली खेलकुद (साग) मा स्वदेशीमध्ये सर्वाधिक ६१४.५ स्कोर गरेकी उनीसँग वर्ल्डकप २०१९ (दिल्ली) र एसियाली खेलकुद २०१८ (जाकार्ता–पालेम्बाङ) को अनुभव पनि छ । आमन्त्रण कोटामा अवसर पाएका भुटान र श्रीलंकाली सुटरले पनि महिला १० मिटर एयर राइफलमा प्रतिस्पर्धा गर्दैछन् । उनीहरूलाई उछिन्नुपर्ने चुनौती छ कल्पनालाई । यो स्पर्धामा ५६ खेलाडी सहभागी छन् ।

इरिनाविरुद्ध सोनिया

जुडोकी सोनिया भट्ट महिला ४८ केजीमुनिको स्पर्धामा पनि शनिबार नै रुसकी इरिना डोल्गोभाविरुद्ध भिड्दैछिन् । जुडोमा यसअघि ओलम्प्कि खेलेका चार नेपालीको चुनौती पहिलो चरणमै समाप्त भएको थियो । त्यसैले पहिलो चरणमा सफलता हासिल गर्दै अगाडि बढ्ने उनको चाहना छ ।

रुसकी इरिना डोल्गोभा र सोनिया भट्ट ।

आमन्त्रण कोटामै ओलम्पियन बन्ने अवसर पाएकी १९ वर्षीया सोनियाले निप्पोन बुदोकानमा हुने अन्तिम ३२ को प्रतिस्पर्धामा जित हात पार्ने लक्ष्य बनाएकी छन् । तर, उनलाई सजिलो भने छैन । विश्व वरीयतामा नवौं स्थानकी इरिना यसपालि पदककी दाबेदार हुन् । रियो ओलम्पिक २०१६ मा पनि प्रतिस्पर्धा गरेकी २५ वर्षीया इरिनाले ग्रान्ड स्लाम, युरोपियन च्याम्पियनसिपलगायत अन्तर्राष्ट्रिय प्रतियोगिताहरूमा १७ पदक जितेकी छन् । यो स्पर्धामा २८ खेलाडीले प्रतिस्पर्धा गर्दैछन् ।

‘सुरुमा तौल घटाउन मिहिनेत गर्नुपरे पनि तयारी राम्रै भएको छ । त्यसैले सोनियाबाट राम्रो प्रदर्शन गर्ने आस गरेको छु,’ प्रशिक्षक सूर्यनारायण श्रेष्ठले भने । वास्तविकता हेर्ने हो भने सोनियाले इरिनाविरुद्ध चार मिनेट टिक्न पनि संघर्ष गर्नुपर्ने देखिन्छ । १३ औं सागमा कांस्य हात पारेकी सोनियाले वर्ल्ड जुनियर जुडो च्याम्पियनसिप २०१९ (मोरक्को) सहित जुनियरका तीन अन्तर्राष्ट्रिय प्रतियागितामा एक–एक खेल जितेकी छन् । उनले युथ ओलम्पिक २०१९ (ब्युनस आयर्स) मा पनि प्रतिस्पर्धा गरेकी थिइन् ।

शनिबार बिहानै प्रतिस्पर्धा गर्नुपर्ने भएकाले कल्पना र सोनिया ओलम्पिक रंगशालामा आयोजित उद्घाटन समारोहमा सहभागी भएनन् । त्यसैले मार्चपासमा नेपालमा दुई खेलाडी (पौडीका गौरिका सिंह र एलेक्स शाह) सहित पदाधिकारीमात्रै सहभागी भएका थिए । एथलेटिक्सकी सरस्वती चौधरी शनिबार काठमाडौंबाट टोकियो आउनेछिन् । यिनै पाँच खेलाडीले यसपालिको ओलम्पिकमा नेपालको प्रतिनिधित्व गर्दैछन् ।

प्रकाशित : श्रावण ९, २०७८ ०७:५०
पूरा पढ्नुहोस्
प्रतिक्रिया
पठाउनुहोस्
×