चीनमा कोरोना प्रकोप : मृतकको संख्या ५६ पुग्यो, २ हजार जना संक्रमित
बेइजिङ — चीनमा कोरोना भाइरसका कारण मृत्यु हुनेको संख्या ५६ पुगेको छ भने १ हजार ९ सय ७५ मा यसको संक्रमण देखिएको चिनियाँ अधिकारीहरुले बताएका छन् ।
आइतबार बिहानको रिपोर्टअनुसार अघिल्लो २४ घण्टामा १५ जना नयाँ मृतकहरु फेला परेका हुन् भने ६८८ मा यसको संक्रमण देखिएको छ ।
गत महिना मध्य चीनको वुहानमा फेला परेको नयाँ भाइरस नोवेल कोरोना भाइरसको संक्रमण हङकङ, मकाउ, ताइवानमा समेत फैलिएको छ । न्यून मात्रामा थाइल्यान्ड, जापान, दक्षिण कोरिया, अमेरिका, भियतनाम, सिंगापुर, मलेसिया, नेपाल, फ्रान्स र अस्ट्रेलियामा समेत यो प्रकोपको संक्रमण भएको पाइएको छ ।
हालै मात्र क्यानाडामा समेत ५० वर्षीय एक मानिसमा पहिलोपटक यसको संक्रमण देखिएको क्यानाडा सरकारले बताएको छ । हालै मात्र चीनको वुहानदेखि ग्वानझाऊ हुँदै टोरन्टो फर्किएका ती मानिसमा कोरोना भाइरसको संक्रमण फेला परेको हो ।
शनिबार चिनियाँ राष्ट्रपति सी चिङफिङले त्यहाँको सरकारी टेलिभिजन सीसीटीभीसँग कोरोना प्रकोपका कारण चीनमा भयावह रुप लिएको बताएका थिए । चिनियाँ नयाँ वर्षको छेकोमा आयोजित कम्युनिस्ट पार्टीको सभामा कोरोना रोकथामका लागि तत्कालै सरकारी पहलबारे प्रकाश पारेका थिए ।
कोरोना प्रकोपका कारण चीनमा हुँदै गरेका पछिल्ला सार्वजनिक सभा, सभारोह र उत्सवहरु बन्द गरिएको छ भने सहर, बजार, रेल्वे स्टेसन र विमानस्थलमा उच्च सतर्कता अपनाउँदै सुरक्षा बल खटाइएको छ ।
सम्बन्धित समाचार :
- कोरोना भाइरस : सतर्क रहौं, आतंकित नबनौं
- 'नोवल कोरोना' संक्रमण पुष्टि नहुँदै संक्रमितलाई डिस्चार्ज गर्नु कति जायज ?