बाइडेन किमलाई भेट्न अनिच्छुक- विश्व - कान्तिपुर समाचार
कान्तिपुर वेबसाईट
AdvertisementAdvertisement

बाइडेन किमलाई भेट्न अनिच्छुक

उत्तर कोरियाप्रतिको अमेरिकी नीति परिवर्तन हुने
एजेन्सी

वासिङ्टन — अमेरिकी राष्ट्रपति जो बाइडेन उत्तर कोरियाली नेता किम जोङ–उनलाई भेट्न इच्छुक नरहेको ह्वाइट हाउसले जनाएको छ । तर उनलाई भेट्न नचाहनुको कारणबारे भने ह्वाइटहाउसले केही उल्लेख गरेको छैन ।

अमेरिकी राष्ट्रपति जो बाइडेन उत्तर कोरियाली नेता किम जोङ–उन फाइल तस्बिर : रोयटर्स

पछिल्लो समाचारसँगै उत्तर कोरियाप्रति राष्ट्रपति बाइडेनको नीति उनका पूर्ववर्ती डोनाल्ड ट्रम्पको भन्दा फरक हुने देखिएको छ । ‘मलाई लाग्छ उनको रबैया पूर्णरूपमा फरक हुनेछ र किमलाई भेट्नेबारे उहाँको कुनै चासो छैन,’ ह्वाइटहाउसकी प्रेस सचिव जेन साकीले भनिन् ।

राष्ट्रपति ट्रम्प र किमबीच सन् २०१८ मा पहिलो पटक सिंगापुरमा भेटवार्ता भएको थियो । ट्रम्प उत्तर कोरियाली सर्वोच्च नेतालाई भेट्ने पहिलो बहालवाला अमेरिकी राष्ट्रपतिसमेत हुन् । दुई नेताबीच सन् २०१९ मा उत्तर–दक्षिण कोरियाको गैरसैनिकीकृत क्षेत्रमा संक्षिप्त वार्ता भएको थियो ।

दुई साताअघि बाइडेन प्रशासनले उत्तर कोरियाली नेतालाई सम्पर्क गर्ने प्रयास गरिए पनि प्योङयाङबाट कुनै जवाफ नआएको जनाएको थियो । अधिकारीहरूका अनुसार दुई देशबीचको बढ्दो तनाव मत्थर पार्न बाइडेन प्रशासनले विभिन्न माध्यमबाट किमसँग सम्पर्क गर्ने प्रयास गरेको थियो । त्यसका लागि संयुक्त राष्ट्रसंघमा रहेको उत्तर कोरियाली नियोगसमेत परिचालित गरिएको अधिकारीहरूले जनाएका थिए । उत्तर कोरियाले हालसम्म जो बाइडेनलाई औपचारिक रूपमा अमेरिकी राष्ट्रपति स्वीकार गरिसकेको छैन । बाइडेनले गत जनवरी २० मा राष्ट्रपतिको कार्यभार सम्हालेका हुन् ।

अमेरिका र दक्षिण कोरियाले हालै संयुक्त सैन्य अभ्यास गरेपछि पुन: उत्तर कोरिया रुष्ट बनेको छ । सैन्य अभ्यासको विरोध गर्दै उत्तर कोरियाली सर्वोच्च नेताकी बहिनी किम यो–जोङले अमेरिकालाई ‘बारुदको दुर्गन्ध रोक्न’ चेतावनी दिएकी थिइन् । ‘दक्षिण कोरिया सरकारले फेरि अर्को पटक युद्धको र संकटको खेल’ सुरु गरेको किमको भनाइ थियो । सर्वोच्च नेताकी बहिनी किम यो–जोङ निकै शक्तिशाली मानिन्छिन् ।

संयुक्त सैन्य अभ्यासको प्रतिउत्तर स्वरूप उत्तर कोरियाले गत बिहीबार दुईवटा ब्यालेस्टिक क्षेप्यास्त्र परीक्षणसमेत गरेको छ । बाइडेन अमेरिकाको राष्ट्रपतिमा निर्वाचित भएपछि गरिएको यो पहिलो परीक्षण हो । उक्त कदमको जापान र दक्षिण कोरियाले निन्दा गरेका थिए ।

अमेरिकी राष्ट्रपति जो बाइडेनले भने आधिकारिक रूपमा यसबारे कुनै प्रतिक्रिया जनाइसकेका छैनन् । त्यसअघि उत्तर कोरियाले छोटो दूरीका क्षेप्यास्त्र परीक्षण गरेपछि भने बाइडेनले अमेरिका नचिढिएको प्रतिक्रिया दिएका थिए । तर पनि उत्तर कोरियाको पछिल्लो कदम अमेरिका र उसका साझेदारहरूका लागि टाउको दुखाइ भएको छ ।

उत्तर कोरियाले परमाणु हतियार त्याग्नुपर्ने अमेरिका र पश्चिमा देशहरूको भनाइ छ । अमेरिकी राष्ट्रपति बाइडेनले पनि उत्तर कोरियाप्रतिको अमेरिकी नीति पुनरावलोकन गर्दै बताउँदै आएका छन् । उत्तर कोरियाविरुद्ध लगाइएका प्रतिबन्धहरू फुकुवा गर्नुपूर्व उसले परमाणु कार्यक्रम त्याग्नुपर्ने र कानुनको पालना गर्नुपर्ने अमेरिकी राष्ट्रपति बाइडेनको सर्त छ ।

अमेरिकाले आफूप्रतिको ‘शत्रुतापूर्ण व्यवहार’ त्याग्नुपर्ने उत्तर कोरियाको भनाइ छ । त्यसका साथै आफ्नो सैनिक क्षमताको अंशका रूपमा परमाणु कार्यक्रमलाई निरन्तरता दिने प्योङयाङको भनाइ छ । त्यसका लागि लामो दूरीका क्षेप्यास्त्र, हतियार, जासुसी स्याटेलाइट तथा परमाणु ऊर्जाबाट चल्ने पन्डुब्बी निर्माणमा तीव्रता दिने किम बताउँछन् ।

प्रकाशित : चैत्र १८, २०७७ १०:३४
प्रतिक्रिया
पठाउनुहोस्

बिहारको सीतामढीमा भेटिए महोत्तरीबाट बेपत्ता सात किशोरी र बालिका

सुनिता बराल

महोत्तरी — मंगलबार दिउँसोदेखि बेपत्ता भएका महोत्तरी, भंगाहाका ७ किशोरी तथा बालिका भारत, विहारको सीतामढी पुगेको पाइएको छ । उनीहरू सीतामढी पुगेको भनी त्यहाँको प्रहरीले नेपाल प्रहरीलाई खबर गरिसकेको भंगाहा नगरपालिकाका मेयर सञ्जीवकुमार साहले जानकारी दिए । उनले प्रहरीलाई उद्धृत गर्दै जनाएअनुसार सबै किशोरी सकुशल छन् ।  

घाँस काट्न गएका किशोरीहरू बेपत्ता भएपछि टोलमा जम्मा भएका महोत्तरीको भंगाहा–७ का स्थानीय ।

मंगलबार दिउँसो २ बजे घाँस काट्न भनी गएका किशोरीहरू नफर्किएका हुन् । बेपत्ता हुनेमा भंगाहा नगरपालिका–८ धर्मपुरका १८ वर्षका अस्मिता पासवान र नागिना पासवान, १३ वर्षीया ज्योति पासवान, १५ वर्षका अर्चना पासवान र रिया पासवान, १० वर्षका रञ्जना पासवान र सीमा पासवान छन् ।

मेयर साहका अनुसार स्थानीयले किशोरीहरूलाई मंगलबार दिउँसो नजिकै अजगेवा गाउँको खेतमा घाँस काटिरहेको देखेकोमा त्यसपछि उनीहरू बेपत्ता भएका थिए । उनीहरू बिहार पुगेको खबर आएसँगै नेपाल प्रहरीको टोली त्यसतर्फ जान लागेको साहले जानकारी दिए ।

‘पारिपट्टिबाट भारतीय प्रहरीले समातेर राखेको छ, यताबाट प्रहरी गएपछि केहीबेरमा उनीहरूलाई हस्तान्तरण गरिनेछ । त्यसपछि उनीहरूलाई घर–परिवारको जिम्मा लगाइन्छ,’ उनले भने ।

सम्बन्धित परिवारलाई भने उनीहरू कहाँ गए भन्ने जानकारी नै नभएको बेपत्तामध्ये एक किशोरीका काका मनोज पासवानले बताए ।

साँझ ७ बजेसम्म किशोरीहरू घर नफर्किएपछि परिवारले प्रहरीलाई खबर गरेका थिए । भंगाहा प्रहरी चौकी सीतापुर, लोहरपट्टी प्रहरी चौकी र जिल्ला प्रहरी कार्यालय महोत्तरीका प्रहरी निरीक्षक राजेश घिमिरे नेतृत्वको टोलीले रातभर किशोरीहरूको खोजी गरेको थियो । प्रहरी र स्थानीयले मिलेर रातभर खोजी गरेको महोत्तरीका एसपी दिनेश आचार्यले जानकारी दिए ।

सम्बन्धित समाचार

महोत्तरीमा घाँस काट्न निस्केका ७ जना बालिका र किशोरी बेपत्ता

प्रकाशित : चैत्र १८, २०७७ १०:१९
पूरा पढ्नुहोस्
प्रतिक्रिया
पठाउनुहोस्
×