नेपाल भ्रमण वर्षको औपचारिक शुभारम्भ

काठमाडौँ — पर्यटनलाई अर्थतन्त्रको एक प्रमुख आधार बनाउने लक्ष्यसहित सरकारले बुधबार काठमाडौंको दशरथ रंगशालासहित सातै प्रदेशबाट ‘भ्रमण वर्ष–२०२०’ अभियान शुभारम्भ गरेको छ  । विदेशी पर्यटकका लागि आगमन खुला गरिएको ६९ वर्षयता नेपालले घोषणा गरेको यो तेस्रो भ्रमण वर्ष हो  ।

यसअघि सन् १९९८ र २०११ मा नेपालले भ्रमण वर्ष मनाएको थियो ।

‘नयाँ वर्ष २०२० को उज्यालो बिहानी र आरम्भसँगै नयाँ आशा, उत्साह, ऊर्जा र अपेक्षाका साथ नेपाल भ्रमण वर्ष–२०२० आरम्भ भएको छ,’ रंगशालामा आयोजित समारोहमा उपस्थित सबैलाई स्वागत गर्दै संस्कृति, पर्यटन तथा नागरिक उड्डयनमन्त्री योगेश भट्टराईले भने ।