काठमाडौँ — नेपाल क्रिकेट संघ (क्यान) का कार्यवाहक सचिव प्रशान्तविक्रम मल्लले राजीनामा दिएका छन् ।

मल्ल नेपाल टी–२० लिगमा गभर्निङ काउन्सिल अध्यक्ष समेत रहेका थिए । मल्लको राजीनामा मंगलबार पोखरामा बसेको संघको बोर्ड बैठकले अनुमोदन गरेको हो । बोर्डको उक्त बैठकले कार्यसमिति सदस्यमा दुर्गाराज पाठकलाई कार्यबहाक सचिवको रुपमा जिम्मेवारी दिने निर्णय गरेको बुधबार पत्र सम्मेलनमार्फत जनाएको छ ।

संघका ७ जनाले तीन जना पदाधिकारीको राजीनामा माग गरेका थिए । उनीहरूले क्रिकेट संघका अध्यक्ष चतुरबहादुर चन्द, कोषाध्यक्ष रोशन सिंह, कार्यवाहक सचिव प्रशान्त मल्ललगायतको राजीनामा मागेका थिए । राजीनामा माग्नेमा बोर्ड सदस्यहरू ऋषिराम गौतमको नेतृत्वमा दाउद अन्सारी, सञ्जयराज सिंह, करण महतरा क्षेत्री, छुम्बी लामा, धर्मराज गिरी, अमितवीर पाण्डे रहेका थिए ।

राजीनामा माग गर्दै अध्यक्ष चन्दलाई पत्र बुझाएपछि उनीहरूले मंगलबारको बोर्ड बैठक बहिष्कार गरेका थिए । पत्रमा क्यानका अध्यक्ष, सचिव र कोषाध्यक्षले पत्रकार सम्मेलनमा आफ्नो कमीकमजोरी र गल्ती स्वीकार गरिसकेको र अरू कामले क्रिकेट संघको बदनाम भई निलम्बनको खतरामा पुगिसकेको आरोप छ ।