कान्तिपुर वेबसाईट
AdvertisementAdvertisement
२२.१२°C काठमाडौं
काठमाडौंमा वायुको गुणस्तर: १५५

क्यानको बैठकमै पदाधिकारीको राजीनामा माग

अनिश भट्टराई

गण्डकी — नेपाल क्रिकेट संघ (क्यान) को बोर्ड बैठक मंगलबार पोखरामा समयमा सुरु हुन सकेन । संघका ७ पदाधिकारी बैठकमा नजाँदा समयमा सुरु नभएको हो । उनै ७ जनाले बोर्ड बैठकमा तीन पदाधिकारीको राजीनामा माग गरेका थिए ।

क्यानको बैठकमै पदाधिकारीको राजीनामा माग

उनीहरूले क्रिकेट संघका अध्यक्ष चतुरबहादुर चन्द, कोषाध्यक्ष रोशन सिंह, कार्यवाहक सचिव प्रशान्त मल्ललगायतको राजीनामा मागेका हुन् । राजीनामा माग्नेमा बोर्ड सदस्यहरू ऋषिराम गौतमको नेतृत्वमा दाउद अन्सारी, सञ्जयराज सिंह, करण महतरा क्षेत्री, छुम्बी लामा, धर्मराज गिरी थिए । अर्का सदस्य अमितवीर पाण्डे अस्वस्थता रहेका कारण अनुपस्थित थिए । तर राजीनामा माग गर्ने ७ सदस्यीय टोली रहेको पत्रमा उनले हस्ताक्षर गरेका छन् ।

राजीनामा माग गर्दै अध्यक्ष चन्दलाई पत्र बुझाएपछि उनीहरूले बोर्ड बैठक बहिष्कार गरेका थिए । पत्रमा क्यानका अध्यक्ष, सचिव र कोषाध्यक्षले पत्रकार सम्मेलनमा आनो कमीकमजोरी र गल्ती स्वीकार गरिसकेको र अरू कामले क्रिकेट संघको बदनाम भई निलम्बनको खतरामा पुगिसकेको आरोप छ । ‘बोर्ड बैठकमा असहमति र नोट अफ डिसेन्ट लेखेर विरोध गर्दा पनि तपाईंहरूले बारम्बार गल्तीमाथि गल्ती गरेर नेपाली क्रिकेटको राष्ट्रिय र अन्तर्राष्ट्रिय क्षेत्रमा बदनाम भई नेपाल क्रिकेट संघ विघटन र निलम्बनको खतरा पुगेको यथार्थ अवस्था हो । त्यसकारण हामीहरूले कार्यसम्पादन समिति र गभर्निङ सदस्यहरूको राजीनामा सार्वजनिक मिडियामार्फत मागिसकेका छौं,’ पत्रमा उल्लेख छ ।

राखेपले स्पट फिक्सिङबारे अनुसन्धान गर्न बनाएको छानबिन समितिले क्यान निलम्बन गर्न सुझाव दिएको उल्लेख गर्दै पत्रमा भनिएको छ, ‘खेलकुद ऐन २०७७ अनुसार क्रिकेट संघलाई विघटन गर्न समेत सिफारिस गरिसकेको छ । साथै नेपाल प्रहरीको छानबिन निकाय सीआईबीको प्रारम्भिक प्रतिवेदनमा नेपाल टी–२० लिगको साझेदार कम्पनी सेभेन थ्री स्पोर्ट्स नै फिक्सिङमा संलग्न भएको प्रतिवेदनसमेत सार्वजनिक गरी दुई खेलाडीलाई पक्राउ गरी अनुसन्धान गरिरहेको छ ।’

‘नेपाल क्रिकेट संघको निलम्बनको खतरा भइरहेको अवस्थामा राजीनामा दिई नेपाल क्रिकेट संघलाई विघटन र निलम्बनबाट जोगाउन मार्ग प्रस्त गरिदिनुहुन अनुरोध गर्दछौं,’ असन्तुष्ट पक्षले भनेको छ, ‘अन्यथा क्यानमाथि आउने सबै अवस्थाको जिम्मेवारी तपाईंहरू नै हुनुहुन्छ । इतिहास, समाज र राष्ट्रले तपाईंहरूलाई माफी दिने छैन ।’ असन्तुष्ट पक्ष बैठकबाट बाहिरिएपछि उनीहरूबिनै बोर्ड बैठक सञ्चालनमा आएको थियो । क्यानले राति अबेरसम्म चलेको बैठकले निर्णय सार्वजनिक गरेको छैन ।

प्रकाशित : माघ १८, २०७९ ०७:२१
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?