धिमाल कप फुटबल हुने

कान्तिपुर संवाददाता

बिर्तामोड — प्रथम धिमाल राष्ट्रिय फुटबल प्रतियोगिता कात्तिक ३० देखि मंसिर ५ सम्म हुने भएको छ । धिमाल सेवा समाजको आयोजनामा हुने प्रतियोगिता डोमालाल राजवंशी रंगशालामा हुनेछ ।

समाजका अध्यक्ष मानबहादुर धिमालले झापा, मोरङ र भारतमा बसोबास गर्ने धिमाल जातिका युवासम्मिलित ९ टिमले भाग लिने बताए । मोरङको बेलबारी, पथरी, उर्लाबारी र कानेपोखरी तथा झापाको दमक, बिर्तामोड, मेचीनगर र आयोजक तथा दार्जिलिङ जिल्लाको नक्सालबारी टिम सहभागी हुनेछ ।

प्रतियोगिताका लागि २१ लाखभन्दा बढी खर्च हुने अनुमान गरिएको अध्यक्ष धिमालले बताए । उनका अनुसार विजेता र उपविजेताको नगद पुरस्कार तय भइसकेको छैन । धिमाल जातिका युवालाई खेलकुदको माध्यमबाट अगाडि बढाउन प्रतियोगिता गर्न लागेको धिमाल जाति विकास केन्द्रका अध्यक्ष तेजबहादुर धिमालले बताए ।

धिमाल जातिबाट विजय धिमाल, रजिन धिमाललगायत युवा नेपाली राष्ट्रिय टोलीबाट खेल्दै आएकाले फुटबलमा पनि भविष्य बनाउन यस प्रतियोगिताले ठूलो सहयोग पुर्‍याउने केन्द्रका महासचिव केदार धिमालले विश्वास व्यक्त गरे ।

प्रकाशित : कार्तिक ४, २०७६ १९:२३
ADVERTISEMENT
प्रतिक्रिया
पठाउनुहोस्
ADVERTISEMENT

नेपाली कर्मचारीलाई भारतमा सम्पत्ति शुद्धिकरण सम्बन्धी प्रशिक्षण

कान्तिपुर संवाददाता

काठमाडौँ — नेपाल सरकारका १८ कर्मचारीलाई भारतमा सम्पत्ति शुद्धिकरण तथा आतंकवादी क्रियाकलापमा वित्तीय लगानी निवारण सम्बन्धी प्रशिक्षण दिइएको छ ।

सोमबारबाट भारतको बैंग्लोरस्थित नेशनल एकेडेमी अफ कस्टम, इनडाइरेन्ट ट्यास एन्ड नाकोटिक्स (एनएसीआईएन) ले उक्त प्रशिक्षण दिएको हो । नेपालस्थित भारतीय दूतावासले विज्ञप्ती जारी गर्दै जानकारी दिएको छ ।

नेपाल सरकारको अनुरोधमा ६० कर्मचारीका लागि सम्पत्ति शुद्धिकरण सम्बन्धी विशेष पाठ्यक्रम तयार पारिएको थियो । सोही कार्यक्रम अनुसार दोस्रो चरणमा ती अधिकारीले प्रशिक्षण लिएका हुन् । सरकारका विभिन्न निकायको क्षमतालाई अभिवृद्धिमा सघाउने उद्देश्यले यो कार्यक्रम सञ्चालन गरिएको विज्ञप्तिमा उल्लेख छ ।

भारत सरकारको पूर्ण सहयोग रहेको सो कोर्ष भारतीय विदेश मन्त्रालयको प्राविधिक तथा आर्थिक सहयोग कार्यक्रम अन्तर्गत रहेको छ ।

यस प्रशिक्षणले सहभागीलाई सम्पत्ति शुद्धिकरण तथा आतंकवादी क्रियाकलापमा वित्तीय लगानी निवारण सम्बन्धी मामिलालाई प्रभावकारी ढंगबाट सामना गर्न सक्ने क्षमतालाई अभिवृद्धि गर्ने दूतावासको दाबी छ । २० नेपाली उच्च अधिकारीले गत भदौमा ६ दिने प्रशिक्षण लिएका थिए । २१ नेपाली कर्मचारीहरुको समूह तेस्रो चरणका रुपमा आउदो मंसिर/पुस मा सुरु हुने बताइएको छ ।

वित्तीय अनुसन्धान एवम् सम्पत्ति शुद्धिकरण क्षेत्रमा एनएसीआईएन भारत सरकारको अत्याधुनिक शिक्षण सुविधासहितको प्रमुख प्रशिक्षण संस्थान हो । यो एसिया/प्रशान्त क्षेत्रका लागि विश्व भन्सार संस्थाको एक मान्यताप्राप्त क्षेत्रीय प्रशिक्षण केन्द्र हो ।

प्रकाशित : कार्तिक ४, २०७६ १९:०२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT