वाग्मतीमा ७० खेल संरचना बन्दै- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

वाग्मतीमा ७० खेल संरचना बन्दै

मकवानपुर — वाग्मती प्रदेश सरकारले प्रदेशलाई खेलकुद हबको रूपमा विकास गर्ने योजनासाथ चालु आर्थिक वर्ष २०७६/७७ मा करिब ६१ करोड रुपैयाँ भौतिक संरचना निर्माणमा खर्च गर्ने भएको छ ।

हेटौंडा–६ स्थित गौरीटारमा निर्माणाधीन खेल मैदान । तस्बिर : सुवास/कान्तिपुर

प्रदेशका १३ जिल्लामा ७० खेलकुदका संरचना यसै आर्थिक वर्षबाट निर्माण गर्ने तयारीमा वागमती प्रदेशको सामाजिक विकास मन्त्रालय रहेको छ । चालु आवको नीति तथा कार्यक्रममा नै बहुवर्षीय योजनाअन्तर्गत प्रदेशमा ७० खेल संरचना बनाउने उल्लेख गरेको प्रदेश सरकारले कतिपय स्थानमा पूर्वाधार निर्माणको सम्झौता गरी निर्माण कार्यसमेत सुरु गरिसकेको प्रदेश खेलकुद विकास परिषद्का सदस्य सचिव सूर्यलाल भण्डारीले बताए ।


प्रदेश सरकारले खेलकुद संरचना निर्माण गर्न यस आवमा ६० करोड ९१ लाख ६९ हजार ३ सय ६९ रुपैयाँ बजेट विनियोजन गरेको छ । प्रदेश सरकारले निर्माण गर्न लागेकामा ३० खेल मैदान, २० कभर्डहल, आठ रंगशाला, २ स्मृति कभर्डहलसहितको भवन र बाँकी १० अन्य खेल संरचना रहेका छन् ।


परिषद्का सदस्य–सचिव सूर्यलाल भण्डारीका अनुसार मकवानपुरमा दुईटा खेल मैदान, दुईटा कभर्डहल, एउटा रंगशाला र एउटा अन्तर्राष्ट्रिय खेलकुद प्रतिष्ठान निर्माण हुने भएको छ ।


धादिङमा दुईटा कभर्डहल, तीन खेल मैदान र एउटा रंगशाला, नुवाकोटमा खेल मैदान दुईटा, कभर्डहल र रंगशाला एक–एक, ललितपुरमा दुईटा रंगशाला र दुईटा कभर्डहल, चितवनमा दुईटा कभर्डहल र तीन खेलमैदान, काठमाडौंमा तीन कभर्डहल, दुई खेलमैदान र एउटा क्रिकेट मैदान, रसुवामा दुईटा खेलमैदान र एउटा कभर्डहल गरी ३५ वटा खेल संरचना निर्माणको चरणमा छ ।


काभ्रेमा ६ खेलमैदान र एउटा कभर्डहल, दोलखामा एक–एक कभर्डहल, रंगशाला र खेलमैदान, रामेछापमा दुईटा खेलमैदान, १–१ कभर्डहल र रंगशाला, सिन्धुपाल्चोकमा ९ खेलमैदान, तीन कभर्डहल र एक रंगशाला, सिन्धुलीमा एक कभर्डहल र दुईटा रंगशाला निर्माण हुनेछन् । ‘अघिल्लो आर्थिक वर्षको बजेटले कतिपय स्थानमा निर्माण भएका भौतिक संरचनाको काम ४५ प्रतिशतसम्म सम्पन्न भइसकेका छन् ।


कतिपय स्थानमा सम्झौता भई काम सुरु हुने चरणमा छ,’ परिषद्का सदस्य–सचिव भण्डारीले बहुवर्षीय योजनाअन्तर्गत संरचना निर्माणमा प्रदेशको विशेष जोड दिँदै भने, ‘हामी कभर्ड्हल, मैदानको स्तरोन्नतिको काम यसै आर्थिक वर्षमा सम्पन्न गर्नेछौं । आगामी वर्षबाट प्रदेशका विभिन्न स्थानमा निर्माण हुने मिनी रंगशालाको काममा केन्द्रित हुने योजना छ ।’ उनले पूर्वाधार निर्माणपछि प्रदेशस्तरको खेलकुद महोत्सव गर्ने तयारीमा परिषद् रहेको सुनाए ।

प्रकाशित : माघ २, २०७६ ०८:४०
प्रतिक्रिया
पठाउनुहोस्

चिन्ता धोनीको भविष्यबारे

‘अहिले ‘विछोड’ जस्तो महसुस भइरहेको छ । तपाईंहरूलाई थाहा छ, यो दिन आउनेछ र निकै नजिक छ । तर यसको सामना गर्न कोही चाहँदैनन् ।’
एएफपी

नयाँदिल्ली — भारतका पूर्व कप्तान महेन्द्रसिंह धोनी करिअरको अन्त्यतिर छन् । तर पिचको एकछेउबाट उनको चोटिलो टिप्पणीलाई लामो समयदेखि गुमाइरहेका समर्थकले अनुमान लगाउन थालेका छन् कि उनी कसरी बाहिरिन चाहन्छन् । 

३८ वर्षे धोनीले भारतीय सेनाको जगेडा रेजिमेन्टको मानार्थ कर्णेलको रूपमा गत वर्ष द्वन्द्वग्रस्त कश्मीर इलाकामा समय बिताए । जसकारण उनले वेस्ट इन्डिजविरुद्धको शृंखला गुमाएका थिए ।

इंग्ल्यान्डमा भएको एकदिवसीय विश्वकप सेमिफाइनलमा न्युजिल्यान्डसँग पराजित भएयता धोनी ६ महिनादेखि भारतीय टोलीमा छैनन् । मंगलबार सुरु अस्ट्रेलियाविरुद्धको तीन एकदिवसीय खेलको शृंखलामा पनि उनी टिमबाहिर छन् । गत महिना उनले महिना दिनसम्म आफ्नो भावी योजनाबारे जानकारी नदिने बताएका थिए । तर भारतीय टिमको हरेक पत्रकार सम्मेलनमा उनीबारे प्रश्न सोधिने क्रम रोकिएको छैन ।

यस वर्षको अन्त्यमा अस्ट्रेलियामा हुने ट्वान्टी–२० विश्वकपमा भारतीय समर्थकको माग दृष्टिगत गरी विश्वकपमा धोनीको सहभागिताबारे अड्कलबाजी भएको छ ।

भारतका महान ब्याट्सम्यान सुनील गावस्कर टिममा लामो गैरहाजिरीले नै विकेटकिपर/ब्याट्सम्यान धोनीको धेरै विषय प्रस्ट भइरहेको बताउँछन् । ‘जुन प्रश्न अहिले उब्जिरहेको छ । वास्तवमा यसबारे धोनी आफूले आफैंलाई सोध्नुपर्ने कुरा हो,’ उनले भनेका छन्, ‘यति लामो समयसम्म कसैले आफैं भारतीय टिमबाट बाहिर बस्न चाहन्छ त ? यो एउटा प्रश्नमात्र होइन, उत्तर पनि हो ।’

धोनीले सन् २०१४ मा टेस्ट क्रिकेटबाट संन्यास घोषणा गरेका थिए । राष्ट्रिय टिमका मुख्य प्रशिक्षक रवि शास्त्रीका अनुसार धोनीले छिटै एकदिवसीय अन्तर्राष्ट्रिय क्रिकेट छाड्नेछन् । तर चेन्नई सुपर किंग्सबाट इन्डियन प्रिमियर लिगमा आसन्न पुनरागमनको अर्थ यो हुनसक्छ कि उनको अन्तर्राष्ट्रिय क्रिकेटमा अन्तिम कीर्ति आउन बाँकी छ ।

‘मैले धोनीसँग कुरा गरिसकेको छु र यो हामीबीचको मात्र थियो । सम्भवतः उनी आफ्नो एकदिवसीय क्रिकेट करिअर अन्त्य गर्दैछन्,’ शास्त्रीले भारतीय टेलिभिजनसँग भने, ‘यो उमेरमा सम्भवतः उनी एकमात्र फर्म्याटमा केन्द्रित हुन चाहन्छन् । त्यो हो ट्वान्टी–२० । यसको मतलब उनी अझै खेलिरहन चाहन्छन् । त्यसका लागि उनले ठूलो परीक्षाबाट गुज्रनुपर्नेछ । किनभने उनी आईपीएल खेल्दैछन् र उनको शरीरले कस्तो प्रतिक्रिया दिन्छ त्यो पनि हेर्नुपर्नेछ ।’

क्रिकेटको वर्चस्व रहेको भारतमा धोनी अर्का महान् सचिन तेन्दुलकरकै जस्तो विदाइको प्रतीक्षामा हुनसक्छन् । सन् २०१३ मा आफ्नो बिदाइका लागि आयोजित टेस्टअघि तेन्दुलकर पनि भविष्यलाई लिएर यस्तै चिन्तामा थिए । शास्त्रीले हालै धोनीको संन्यासबारे विभिन्न अड्कलबाजी गरिरहेका भारतीय सामाजिक सन्जाल प्रयोगकर्तालाई जवाफ दिँदै भनेका थिए, ‘अहिले ‘विछोड’ जस्तो महसुस भइरहेको छ । तपाईहरूलाई थाहा छ, यो दिन आउनेछ र निकै नजिक छ । तर यसको सामना गर्न कोही चाहँदैनन् ।’

धोनीको अनुपस्थितिमा भारतीय छनोटकर्ताले ट्वान्टी–२० मा विकेटकिपर/ब्याट्सम्यानको भूमिकामा ऋषभ पन्त र सन्जु सामसनजस्ता नयाँ प्रतिभालाई प्रस्तुत गरिरहेको छ । अहिलेसम्म यी दुईबीच को भन्ने निश्चित भएको छैन । धोनीले सन् २००७ मा पहिलो संस्करणको ट्वान्टी–२० विश्कप भारतले जित्दा टिमको नेतृत्व गरेका थिए । उनले सन् २०११ को एकदिवसीय विश्वकपमा छक्का प्रहार गरी उपाधि घरेलु टोलीलाई दिलाएर राष्ट्रिय नायकको छवि कायम गरेका थिए ।

धोनीले ३ सय ५० एकदिवसीय अन्तर्राष्ट्रियमा १० हजार ७ सय ७३ रन बटुलेका छन् । पछिल्लो विश्वकपमा उनको लयबारे सर्वत्र आलोचना भएको थियो । पछिल्लो समय विराट कोहलीले उनको योगदानलाई छायाँमा पार्न थालेका छन् । शनिबार श्रीलंकाविरुद्धको खेलमा ११ हजार रन पूरा गरेपछि धोनीको महानतामा ग्रहण लाग्न सुरु भएको छ । कोहली १ सय ९६ इनिङ्समै यो सफलताको हकदार बनेका थिए । जबकि धोनीले ३ सय २४ इनिङ्स खेल्नुपरेको थियो ।

तर धोनीको संन्यासबारे भारतीय क्रिकेट अधिकारी भने गम्भीर रहेको भान हुन्छ । भारतका नयाँ क्रिकेट प्रमुख सौरभ गांगुलीको प्रतिबद्धता छ कि धोनीजस्ता वरिष्ठ क्रिकेटरलाई सम्मान गरिनेछ र विश्व च्याम्पियनको कहिल्यै पतन हुँदैन ।

प्रकाशित : माघ २, २०७६ ०८:३५
पूरा पढ्नुहोस्
प्रतिक्रिया
पठाउनुहोस्
×