यसकारण दिए कप्तानबाट पारसले राजीनामा

कुशल तिमल्सिना

काठमाडौँ — राष्ट्रिय क्रिकेट टोलीका कप्तान पारस खड्का मंगलबार मध्याह्न इमेलमार्फत कप्तान पदबाट राजीनामा दिएको सार्वजनिक गरे । लगत्तै उनले सामाजिक सन्जालबाट पनि त्यसबारे जानकारी गराए । सन् २००४ मा राष्ट्रिय टोलीमा डेब्यू गरेका पारसले सन् २००९ मा विनोद दासलाई प्रतिस्थापन गरी नेपाली टोलीको कप्तानी सम्हाल्दा नेपाल अन्तर्राष्ट्रिय क्रिकेटको सबैभन्दा तल्लो तहमा थियो । 


१० वर्षको बीचमा नेपाली क्रिकेटले देखेको सबैखाले सपना साकार पार्ने समूहको नेतृत्व पारसले गरे । उनी नेपाली क्रिकेटमा अहिलेसम्मकै सर्वाधिक सफल कप्तान हुन् । नेपाललाई आईसीसी विश्व क्रिकेट लिग डिभिजन–५ देखि ट्वान्टी–२० विश्वकप र एकदवसीय अन्तार्रष्ट्रिय मान्यता दिलाउन पारसले खेलाडी र कप्तानको रूपमा खेलेको भूमिका अविश्वसनीय छ । कप्तानबाट बाहिर्गमन भए पनि खेलाडीको रूपमा करिअरलाई निरन्तरता दिने र जीवनभर क्रिकेटमै रहिरहने प्रतिबद्धता पारसले मंगलबार दिउँसो अनौपचारिक पत्रकार सम्मेलनमा गरे । क्रिकेट विकासका लागि कप्तान पद गौण रहेको भन्दै सबैले आ–आफ्नो जिम्मेवारी पूर्णत: निभाउन सके नेपाली क्रिकेटले अझै ठूलो उपलब्धि हासिल गर्ने उनको भनाइ छ । त्यो भनेको टेस्ट मान्यता हो । पत्रकार सम्मेलनमा पारसले दिएको अभिव्यक्तिको सारसंक्षेप :

राष्ट्रिय क्रिकेट टोलीमा सन् २००४ मा छनोट भएपछि २००९ देखि कप्तानी भूमिकामा छु । कप्तानका भएको पनि १० वर्ष भइसकेछ । मेरो यो निर्णय हठात आएको होइन । उत्कृष्ट अवस्थामै बहिर्गमनको चाहना थियो । एउटा खेल हारे वा जितेमा कप्तानी वा खेलजीवनबाट संन्यासबारे मैले कहिल्यै सोचिनँ । मैले सधैं एउटा खेलाडीका रूपमा टिमलाई पहिलो प्राथमिकता दिएँ । सधैं जितको सोच बनाएँ । अहिलेको घटनाक्रम हेर्दा, हिजोमात्रै क्यान निलम्बन फुकुवा भयो । म आफैं पनि निलम्बन चाँडै खुलोस् भनेर प्रतीक्षा गरिरहेको थिएँ । मैले आफ्ना नजिकका शुभचिन्तकसँगको सल्लाहमा के ठीक, के बेठीक हो भनी सोधेर गरेको निर्णय हो । यो रातारात आएको होइन ।

क्रिकेट मेरो लगाव हो । यसमा म कहिल्यै सम्झौता गर्ने छैन । कप्तानको रूपमा बहिर्गमनको यो नै उपयुक्त समय हो । किनभने नयाँ नेतृत्व आएको छ । उहाँहरूलाई उपयुक्त व्यक्तिमा कप्तानीको जिम्मेवारी सुम्पने दायित्य रहनेछ । मेरो आवश्यकता परेको खण्डमा खेलाडीको रूपमा म सधैं उपलब्ध हुनेछु । कप्तानीबाट बाहिरिनु मेरा लागि कठिन निर्णय थिएन, मात्र आईसीसीको निलम्बन फुकुवा कुरिरहेको थिएँ ।

म खेलाडीमा योगदान जारी राख्न चाहन्छु । तर केही समय विश्राम चाहन्छु । किनभने मैले पछिल्लो समय कप्तानको मात्र नभएर मेन्टर, सेलेक्टर र मैदानको प्रदर्शनको जिम्मेवारी पनि निर्वाह गर्नुपरेको थियो । विश्राम कति लामो हुनेछ भन्ने निर्णय सेलेक्सन कमिटी र प्रशिक्षकको हुनेछ । नयाँ कप्तानको रूपमा जो आए पनि उत्कृष्ट आउनेछ भन्ने अपेक्षा गरेको छु । उसका लागि मेरो साथ र सहयोग सदैव रहनेछ । अहिलेको स्थितिमा उपकप्तान ज्ञानेन्द्र मल्लले कम्तीमा एक वर्ष कप्तानी गर्नुपर्छ जस्तो लाग्छ । किनभने ऊ धेरै सिनियर खेलाडी हो । त्यसपछिको निर्णय क्यानले गर्नेछ ।

हाम्रो चासो भनेको को अध्यक्ष बन्यो वा को कप्तान बन्यो ? भन्दा पनि नेपाली क्रिकेट अगाडि बढ्न संस्थागत सहकार्य र जिम्मेवारीबोध हुनुपर्छ । मैदानबाहिर नयाँ नेतृत्व आएको छ । मैदानभित्र हामी हुन्छौं । सबै मिलेर नयाँ सुरुआत गर्नुपर्छ । आगामी दिनहरू धेरै चुनौतीपूर्ण छन् र सबैले आ–आफ्नो जिम्मेवारी पूरा गर्नेछन् भन्ने आस गर्छु ।

नयाँ कप्तान को बन्छ भन्ने मेरो निर्णय हुन सक्दैन । म आफैं पनि कप्तान बन्दा तपाई कप्तान बन्दै हुनुहुन्छ भनेर पूर्वसूचना दिइएको थिएन । त्यो भनेको संघ र प्रशिक्षकले निर्णय गर्ने हो । नेपाल क्रिकेट अहिले जहाँ छ, खेलाडी र प्रशिक्षकको ठूलो भूमिकाकै कारणले छ । म कप्तान भएर यहाँ आइपुगेको होइन । म नहुँदा खत्तम हुने पनि होइन । कप्तान जोसुकै होस्, पदाधिकारी जोसुकै हो र खेलाडी तथा प्रशिक्षक जोसुकै होस्, सबैको सोच नेपाल क्रिकेट अगाडि बढाउने हुनुपर्छ । यस्तो भएमा नेपाली क्रिकेटले अहिलेभन्दा राम्रो प्रगति गर्नेछ ।

१० वर्षे मेरो कप्तानी यात्रामा खेलाडी र प्रशिक्षकको साथ/सहयोग महत्त्वपूर्ण रह्यो । तीन विदेशीसहित ४ प्रशिक्षकमातहत काम गर्ने अवसर पाएँ । रोय डायस, पुबुदु दासानायके, उमेश पटवाल र जगत टमाटा सबैले कप्तानको रूपमा मलाई धेरै सहयोग गर्नुभयो । हाम्रो एउटा प्रस्ट दृष्टिकोण नेपाली क्रिकेट माथि पुर्‍याउने नै थियो । यसमा खेलाडीले असीमित साथ दिए । सबैको सामूहिक र सकारात्मक साथले यहाँसम्म आएका हौं । व्यक्तिगत रूपमा म निकै भाग्यमानी महसुस गरिरहेको छु । मैले सपनामा पनि सोचेको थिइनँ कि मैले देशका लागि क्रिकेट खेल्नेछु । भाग्यमा लेखेको कुरा पुगेरै छाड्छ, राष्ट्रिय टिम हुँदै नेतृत्व गर्ने अवसर पनि पाएँ । यो एउटा अविश्वसनीय यात्रा थियो । त्यो कुनै न कुनै दिन अन्त्य हुनु नै थियो ।

यदि हामी आफ्नो जिम्मेवारी पूर्णत: निर्वाह गर्न सक्यौं भयो हामीले हाम्रो अन्तिम गन्तव्य छिट्टै भेट्ने छौं । त्यो भनेको टेस्ट मान्यता हो । आफ्नो कप्तानी कार्यकालमा ट्वान्टी–२० विश्वकप खेल्नु र एकदिवसीय अन्तर्राष्ट्रिय मान्यता पाउनु मेरा लागि सबैभन्दा खुसीको क्षण हो । हरेक हारेको खेल दु:खको क्षण हुन्छ ।

यस खेलले मलाई सबैथोक दिएको छ । जति मैले सोचेको थिएँ वा सपना देखेको थिएँ । जीवन रहेसम्म म आफ्नो सबै कुरा नेपाली क्रिकेटका लागि दिनेछु । म कहिल्यै क्रिकेटबाट बाहिरिने छैन । जस्तोसुकै भूमिकामा भए पनि यहीँ रहनेछु ।

क्यानको नयाँ नेतृत्वसँग मेरो कुरा भएको छैन । चुनावका बेला पनि हामी यहाँ थिएनौं । क्यान निलम्बनमा परेदेखि नै क्यानका मान्छेहरूसँग कुरा भएको छैन । हामीले आईसीसीसँग समन्वय गर्ने गरेका थियौं । हामी खेलाडी र प्रशिक्षकले आवश्यक कुराहरू यसअघि नै मागे राखेका थियौं । पारस खड्का भनेको नेपाली क्रिकेट होइन, यहाँ थुप्रै राम्रा खेलाडी छन् । मैले अवसर पाएँ, प्रदर्शन गरें र अहिले यहाँ छु । व्यक्तिमा अड्किने हो भने हामी अगाडि बढ्न सक्दैनौं ।

भविष्यमा नेपाल क्रिकेट संघ वा बोर्ड जे हुन्छ त्यसको नेतृत्व गर्ने सोचेको छु । तर सोचेजस्तो सजिलो छैन । त्यसका लागि नयाँ संरचनामा आफूलाई ढाल्नुपर्छ । अहिलेसम्म म खेलाडी छु, पदाधिकारी भएर आउने हो भने मैले क्रिकेट विकासका लागि योजनासहितको काम गर्नुपर्छ । आज पारस कप्तान भयो भनेर भोलि संघको अध्यक्ष हुन्छ भन्ने कुनै ग्यारेन्टी छैन । त्यसका लागि काम गर्नुपर्छ । मेरो कामको मूल्यांकनले नै भविष्य निर्धारण गर्नेछ ।


ज्ञानेन्द्र मल्ल, उपकप्तान
राष्ट्रिय टोलीका उपकप्तान ज्ञानेन्द्र मल्लले पारसको व्यक्तिगत निर्णयको सम्मान गर्नुपर्ने बताए । ‘ऊ जतिको मान्छेले यति ठूलो निर्णय लिनु भनेको धेरै सोचे सम्झेर गरेको हुनुपर्छ । मेरो विचारमा हामीले र व्यक्तिगत रूपमा मैले उसको निर्णयको सम्मान गर्नुपर्छ ।’

पारसको कप्तानी अवधिभर उपकप्तानको भूमिकामा रहेका ज्ञानेन्द्रले व्यक्तिगत रूपमा पारसलाई एक पूर्ण नेतामा मूल्यांकन गरे । साथै भविष्यमा उनको कप्तानी ‘मिस’ गर्ने पनि बताए । ‘हामीले जतिबेला क्रिकेट सुरुआत गरेका थियौं, त्यतिबेला केही थिएन । क्रिकेटको पूर्वाधार र प्रतियोगिता नै थिएन र यसको लोकप्रियता शून्यप्राय: थियो,’ उनले भने, ‘हामीले त्यतिबेलैदेखि लिएको संकल्प के थियो भने जबसम्म टिमको प्रदर्शन राम्रो हुँदैन तबसम्म नेपालमा क्रिकेट विकास हुँदैन र यसको प्रचार पनि हुँदैन । सौभाग्यवश हामी दुईले कप्तान/उपकप्तानको जिम्मेवारी लिएयता नेपाली क्रिकेटमा कायपलट नै भयो, यसर्थ हामी आफ्नो लक्ष्यमा सफल भएको जस्तो लाग्छ ।’

‘हरेक खेलमा एउटा उदाहरण बनेर सबैको मार्गदर्शकका रूपमा पारस एउटा टिमको रोलमोडल नै हो, मैदानभित्र र बाहिर पनि । टिमको असल नेता, राम्रो मान्छे, सहयोगी भावना र युवालाई प्रोत्साहित गर्ने,’ पारससँगको सहकार्य अनुभवबारे ज्ञानेन्द्रले भने । पत्रकार भेटघाटमा पारसले ज्ञानेन्द्रले आफ्नो प्रतिस्थापन गर्नसक्ने बताएका थिए । ‘१० वर्षदेखि पारस कप्तान र म उपकप्तानमा रहयौं । उसको अनुपस्थितिमा कतिपय खेलमा मैले कप्तानी गरिसकेको अवस्थामा मलाई त्यो नौलो कुरा होइन । पारसले त्यो भन्नु मेरा लागि राम्रो हो र म तयार पनि छु । तर कप्तानको जिम्मेवारी क्रिकेट संघ, छनोट समिति र प्रशिक्षकले दिने कुरा हो ।’

सन्दीप लामिछाने, खेलाडी
पारसको राजीनामा सार्वजनिक भएपछि राष्ट्रिय टोलीका स्टार बलर सन्दीप लामिछानेले सामाजिक सन्जालमार्फत कप्तानसँगको सहकार्यको स्मरण गरेका छन् । पारसबारे आफ्नो प्रेरणास्रोत रहेको भन्दै उनले लेखेका छन्, ‘तपाईले विगतका वर्षहरूमा मलाई र धेरै युवालाई प्रेरित गर्नुभयो र हामीलाई यो सुन्दर खेलको सम्मान गर्न सिकाउनुभयो । तपाईको नेतृत्वमा नेपाली क्रिकेट यस्तो स्थानमा पुगेको छ जुन कहिल्यै पनि पुग्न सकेको थिएन ।’

सन्दीपले पारसले धेरै वर्षसम्म राष्ट्रिय टोलीका लागि योगदान निरन्तर राखेको हेर्न चाहेको पनि बताएका छन् । ‘तपाईको भविष्यका लागि शुभकामना र हामी तपाईले सकेसम्म धेरै वर्ष नेपालको प्रतिनिधित्व गरेको हेर्न चाहन्छौं, तपाई साँच्चै महान हुनुहुन्छ र सधैं हाम्रो प्रेरणा हुनुहुन्छ, तपाई वास्तविक कप्तान हुनुहुन्छ ।’

चतुरबहादुर चन्द, क्यान, अध्यक्ष
नेपाल क्रिकेट संघ क्यानका अध्यक्ष चतुरबहादुर चन्दले पारसको राजीनामाबाट आश्चर्यचकित भएको प्रतिक्रिया दिएका छन् । तर उनले आधिकारिक रूपमा आफूलाई थाहा नभएको, संचारमाध्यम र सामाजिक सन्जालमार्फत जानकारी भएको बताएका छन् ।

‘आधिकारिक रूपमा त जानकारी भएको छैन तर हिजोमात्रै साढे ३ वर्षको कालो बादल हटेर समग्र नेपाली क्रिकेट समर्थकमाझ खुसीको संचार भएको समयमा यस्तो ठूलो निर्णय पारसबाट नआएको भए हुन्थ्यो भन्ने मेरो व्यक्तिगत धारणा हो,’ अध्यक्ष चन्दले कान्तिपुरसँग भने ।

पारसको राजीनामासँग नयाँ कार्यसमितिको भूमिकाको रूपमा नहेर्न पनि उनले सबैमा आग्रह गरेका छन् । चन्दले भने, ‘मानिसहरूले पारसको राजीनामा केही विवादास्पद रूपमा पनि हेरे । तर म के प्रस्ट पार्न चाहन्छु भने नयाँ कार्यसमितिसँगको मतभेदका कारण यो घटनाक्रमको विकास भएको होइन । विगतका कुरा बिर्सेर नेपाली क्रिकेटको भविष्यका लागि अगाडि बढ्दा हामीलाई कुनै समस्या नहुनुपर्ने हो । उहाँले हामीसँग कुनै छलफल पनि गर्नुभएको छैन ।’ अध्यक्ष चन्दले नयाँ कप्तानको छनोट प्रक्रिया क्यानको बैठकले निर्धारण गर्ने पनि जानकारी दिए । ‘हामीलाई आधिकारिक जानकारी आएपछि संघको बैठकमा त्यसबारे छलफल हुन्छ,’ उनले भने ।

आईसीसीले क्यान निलम्बन ससर्त फुकुवा गरेको थियो । यसबीचमा आफूहरूले पालना गर्नुपर्ने सर्तबारे पनि कुनै जानकारी आइनसकेको अध्यक्ष चन्दले बताए । यस्तोमा कप्तान चयनमा पनि अन्योल हुनसक्छ । चन्दले भने, ‘नयाँ विधानअनुसार टेक्निकल कमिटी, खेलाडी छनोट कमिटी बन्न बाँकी छ । त्यसैले नयाँ निर्णय गर्नेछ, उहाँ (पारस) सँगै सल्लाह गरेर मात्र निर्णय लिनेछौं । पारसमा नेपालको ठूलो लगानी छ, उहाँले पनि त्यहीअनुसा। प्रतिफल दिनुभएको छ । उहाँको योगदानको मूल्यांकन गर्नेछौं ।’

कप्तानीमा पारसको मुख्य उपलब्धि
२००९ नोभेम्बरमा एसीसी ट्वान्टी–२० प्रतियोगितामा कप्तानी जिम्मेवारी
२०१० विश्व क्रिकेट लिग डिभिजन–५ उपाधि
२०११ एसीसी ट्वान्टी–२० कपमा सेमिफाइनल
२०१२ विश्व क्रिकेट लिग डिभिजन–४ उपाधि
२०१२ ट्वान्टी–२० विश्वकप छनोटमा सातौं
२०१३ विश्व क्रिकेट लिग डिभिजन–३ उपाधि
२०१३ एसीसी ट्वान्टी–२० फाइनल
२०१३ विश्वकप छनोटमा तेस्रो भएपछि विश्वकपमा ऐतिहासिक छनोट

२०१४ ट्वान्टी–२० विश्वकपमा अफगानिस्तान र हङकङलाई हराए पनि बंगलादेशसँग पराजित, समूहबाटै बाहिर
२०१४ एकदिवसीय विश्वकप छनोटमा नवौं हुँदै डिभिजन २ बाट रेलिगेसन
२०१४ विश्व क्रिकेट लिग डिभिजन–३ उपाधि
२०१५ देखि २०१७ सम्म विश्व क्रिकेट लिग च्याम्पियनसिप
२०१७ विश्व क्रिकेट लिग डिभिजन–२ फाइनल
२०१८ एकदिवसीय विश्वकप छनोटमार्फत ऐतिहासिक एकदिवसीय अन्तर्राष्ट्रिय मान्यता
२०१९ ट्वान्टी–२० विश्वकपको एसियाली छनोटमा सिंगापुरसँग पराजित हुँदै बाहिर

प्रकाशित : आश्विन २९, २०७६ ०८:१६
ADVERTISEMENT
प्रतिक्रिया
पठाउनुहोस्
ADVERTISEMENT

अलराउन्डरको अप्रत्याशित निर्णय

कुशल तिमल्सिना

काठमाडौँ — नेपाली खेलकुद वृत्त मंगलबार एकाएक तरंगित बन्यो, जब राष्ट्रिय क्रिकेट टोलीका अहिलेसम्मकै सफल कप्तान पारस खड्काले पदबाट राजीनामा घोषणा गरे । एक दशक नेपाली क्रिकेटको ‘स्वर्णयुग’ लाई नेतृत्व गरेका ३२ वर्षे अलराउन्डर पारसको यो निर्णय धेरैका लागि अप्रत्याशित थियो । १० वर्षमा नेपाली क्रिकेटले हासिल गरेको विरासतका नायक हुन् पारस ।

सन् २००९ को एसीसी ट्वान्टी–२० कपमा विनोद दासलाई प्रतिस्थापन गरी पारसलाई कप्तान बनाइयो । त्यस प्रतियोगितामा नेपालले समूह चरण पार गर्न सकेन । तर उनले कप्तानी सम्हालेको दोस्रो वर्ष सन् २०१० मा नेपालले विश्व क्रिकेट लिग डिभिजन–५ को उपाधि चुम्यो, जुन आईसीसीको आयोजनामा भएको पहिलो उपाधि थियो । २०११ मा काठमाडौंमै भएको एसीसी ट्वान्टी–२० को सेमिफाइनलमा पुगेपछि ट्वान्टी–२० विश्वकप छनोट प्रतियोगिताका लागि नेपालको ढोका खुल्यो ।

सन् २०१२ मा डिभिजन–४ को उपाधि जितेको नेपाल त्यही वर्ष ट्वान्टी–२० विश्वकप छनोटमा सहभागी १६ टोलीमध्ये सातौं स्थानमा उक्लिन सफल भयो । सन् २०१३ नेपाली क्रिकेटका लागि सबैभन्दा सफल वर्ष रह्यो । त्यसवर्ष नेपालले बर्मुडामा सम्पन्न विश्व क्रिकेट लिग डिभिजन–३ को उपाधि मात्र जितेन, एसीसी ट्वान्टी–२० कपको फाइनलमा पुग्यो । नामिबियामा भएको ट्वान्टी–२० विश्वकप छनोटमा तेस्रो हुँदै ऐतिहासिक रूपमा विश्वकपको यात्रा निश्चित गर्‍यो ।

२०१४ मा बंगलादेशमा भएको ट्वान्टी–२० विश्वकपमा नेपालले अफगानिस्तान र हङकङलाई पराजित गरेर सानदार प्रदर्शन गर्‍यो । तर घरेलु टोलीसँगको हारले समूह चरणबाटै बाहिरिनुपर्‍यो ।विश्वकप प्रतियोगितासम्मको यो यात्रा नै नेपाली क्रिकेटको अहिलेसम्मकै सबैभन्दा ठूलो सफलता हो ।

सन् २०१४ मै नेपाल न्युजिल्यान्डमा आयोजित एकदिवसीय विश्वकप छनोटमा सहभागी १० टोलीमध्ये नवौं भयो । फलस्वरूप डिभिजन–२ बाट रेलिगेसनमा पर्‍यो । त्यही वर्ष डिभिजन–३ मा सफलता हासिल गरी पुनः दोस्रो डिभिजनमा उक्लियो । सन् २०१५ मा नेपालले आईसीसी विश्व क्रिकेट लिग च्याम्पियनसिपमा स्थान बनायो । यस प्रतियोगितामा सहभागिता निश्चित भएपछि नेपालले स्वतः डिभिजन–१ को मान्यता पायो ।

सन् २०१७ सम्म चलेको यस प्रतियोगितामा नेपालले ७ टोलीसँग ‘होम एन्ड अवे’का आधारमा १४ खेल खेल्यो । यस प्रतियोगितामा असफल भएपछि पुनः रेलिगेसनमा परेको थियो । २०१७ मै डिभिजन–२ को फाइनलमा पुगेर नेपालले डिभिजन–१ को यात्रा तय गर्‍यो भने एकदिवसीय विश्वकप छनोटमा पनि स्थान बनायो । सन् २०१८ मा जिम्बावेमा भएको एकदिवसीय विश्वकप छनोटमार्फत नेपालले एकदिवसीयमा मान्यता पाएको हो । यो पनि नेपाली क्रिकेटको अर्को ऐतिहासिक सफलता हो ।

२०१९ मा ट्वान्टी–२० विश्वकपको एसियाली छनोटमा सिंगापुरसँग पराजित भएपछि ग्लोबल छनोटमा पुग्न असफल भएको हो । यी सबै उतारचढावमा नेपाली क्रिकेट टोलीको नेतृत्व पारसले गरे । ट्वान्टी–२० विश्वकप खेल्न पाउनु र एकदिवसीय मान्यता पाउनुलाई करियरको सबैभन्दा ठूलो सफलता ठान्छन् उनी । भन्छन्, ‘यो यात्रामा मेरा समकालीन खेलाडी र प्रशिक्षकको सहयोग महत्त्वपूर्ण रह्यो । तीन विदेशी– रोय डायस, पुबुदु दासानायके र उमेश पटवाल तथा स्थानीय जगत टमाटा गुरुले कप्तानका रूपमा मलाई धेरै सहयोग गर्नुभयो । खेलाडीहरूको साथ पनि उस्तै रह्यो । प्रस्ट रूपमा जसरी भए पनि क्रिकेटलाई माथि पुर्‍याउने हाम्रो लक्ष्य थियो र सबैको लक्ष्यलाई एकाकार गरेरै यहाँ आइपुगेका हौं ।’

विश्व जगत्मा नेपाली क्रिकेटको मानकलाई उचो बनाउने अभियानको नेतृत्व गरेका पारसलाई कप्तानीबाट राजीनामा दिनुपर्ने दबाब तत्कालका लागि थिएन । नेपाल क्रिकेट संघ (क्यान) को हालै निर्वाचित नयाँ कार्यसमितिले पनि यसबारे निर्णय गरेको होइन । मैदानभित्र उनको रणनीति र व्यक्तिगत प्रदर्शन पनि खस्केको थिएन, बरु अझै राम्रो भइरहेको थियो । ‘म मैदानभित्र एउटा खेल हारेको दुःखमा वा एउटा खेल जितेको अवस्थामा पद छाड्ने प्रवृत्तिको मान्छे होइन । र, यो निर्णय रातारात गरिएको पनि होइन,’ मंगलबार पत्रकार सम्मेलनमा पारसले भने, ‘क्यानमा नयाँ नेतृत्व आएको छ, आईसीसीले निलम्बन फुकुवा गरेको छ र अब सबै मिलेर नयाँ सुरुआत गर्नुछ । अबका दिनमा नयाँ चुनौती स्वीकार गर्दै सबैले आआफ्नो जिम्मेवारी पूरा गर्नेछन् भन्ने आशा गर्छु ।’

१० वर्ष नेपाली क्रिकेटलाई सम्भव भएजति सबै उपलब्धि दिलाएका पारसले आफूले कप्तानी छाडे पनि क्रिकेटबाट टाढा हुन नसक्ने प्रस्ट पारे । संघको छनोटमा परेको अवस्थामा राष्ट्रका लागि सदैव तयार रहेको उनले बताए । ‘खेलाडीका रूपमा आफूलाई निरन्तरता दिन चाहन्छु, तर अहिले केही समय आराम गर्नेछु,’ उनले भने, ‘कप्तान मात्र होइन, मेन्टर, सेलेक्टर र खेलाडीका रूपमा बिताएँ । अब म खेल्छु/खेल्दिनँ भन्ने कुरा सेलेक्सन कमिटी र प्रशिक्षकको निर्णयमा भर पर्छ । राष्ट्रिय टिम हुँदै नेतृत्व गर्ने अवसर पनि पाएँ । यो एउटा अविश्वसनीय यात्रा थियो र यसको अन्त्य कुनै दिन हुनु नै थियो ।’

प्रकाशित : आश्विन २९, २०७६ ०७:२५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT