सेरेना र फेडेररको गति 

एएफपी

न्युयोर्क — सेरेना विलियम्स बुधबार वर्षाले प्रभावित खेलमा यूएस ओपनबाट बाहिरिने डरबाट गुज्रिन बाध्य रहेकी छन् । पुरुषतर्फ शीर्ष वरीयताका डिफेन्डिङ च्याम्पियन नोभाक जोकोभिच काँधको दुखाइबीच खेल्न बाध्य रहे भने रोजर फेडेरर कमजोर सुरुआतका बावजुत अर्को चरण पुग्न सफल रहेका छन् ।

अमेरिकाकी आठौं वरीयताकी सेरेना २४ औं ग्रान्ड स्लाम उपाधिको अभियानमा छिन् । यो उपाधि जिते सेरेनाले मार्गरेट कोर्टको कीर्तिमान बराबरी गर्ने छिन् । यसैक्रमा उनले आफ्नै देशकी वाइल्ड कार्डप्राप्त १७ वर्षीया क्याटी म्याकनलीलाई ५–७, ६–३, ६–१ ले हराइन् ।

सन् १९९९ मा सेरेनाले पहिलोपल्ट यूएस ओपन जित्दा क्याटीको जन्म पनि भएको थिएन । उनले पहिलो चरणमा सेरेनालाई बलियो चुनौती पेस गरिन्, तर सेरेनाले त्यसयता खेलमा आफ्नो पकड कायम राखिन् । अन्तिम ११ मध्ये ९ गेम जितिन् । ‘आज म भाग्यमानी रहेँ, मेरो खेलमा म आफूलाई नै चित्त बुझिरहेको छैन,’ सेरेनाले भनिन्, ‘अब अर्को खेलमा मैले राम्रो खेल्ने प्रयास गर्ने छु र यो मेरो वाचा रह्यो ।’

उता पछिल्ला ५ ग्रान्ड स्लाममा ४ जितेका सर्वियाली स्टार जोकोभिचले पूरा खेल पीडामै खेले । उनले अर्जेन्टिनाका हुँवा इग्नासियो लोन्डेरोलाई ६–४, ७–६, ६–१ ले पराजित गरे । ‘काँधको चोटका कारण आज मेरो खेल प्रभावित रह्यो,’ उनले भने, ‘म पक्कै पनि कडा चुनौतीबाट गुज्रिएँ ।’ जोकोभिचले समग्रमा १६ ग्रान्ड स्लाम उपाधि जितिसकेका छन् ।

अर्कोतर्फ ३८ वर्षीय तेस्रो वरीयताप्राप्त स्विट्जरल्यान्डका फेडेररले पनि पहिलो सेट गुमाएर बोस्नियाका ९९ औं वरीयताका दामिर जुजुरलाई ३–६, ६–२, ६–३, ६–४ ले पराजित गरे । उनले पहिलो सेटमा लगातार कमजोर प्रदर्शन गरे ।

फेडेररले आफ्नो पहिलो खेलमा पनि भारतका क्वालिफायर सुमित नागलविरुद्ध पहिलो सेट गुमाएका थिए । खेलपछि उनले भने, ‘यसरी खराब प्रदर्शन गर्दा निराशा हुन्छ नै । जति बेला लगातार भूल हुन थाल्छन्, त्यति बेला पनि दुःख हुन्छ । तर खेलमा प्रत्येक समय सुधारको अवसर हुन्छ । अबको चरणमा मैले पक्कै पनि आफ्नो खेलमा सुधार गर्नुपर्ने हुन्छ,’ फेडेररले भने । वर्षको अन्तिम ग्रान्ड स्लामको बुधबारको खेलमा वर्षाका कारण २२ खेल पछि सारिएका छन् ।

जापानका सातौं वरीयताप्राप्त केई निसिकोरीले अमेरिकी ब्राडली क्लेनलाई ६–२, ४–६, ६–३, ७–५ ले हराए । निसिकोरी २०१४ को यूएस ओपन रनरअप हुन् । युक्रेनी पाँचौं वरीयताकी एलिना स्भिटोलिनाले सातपल्टकी ग्रान्ड स्लाम विजेता तथा सेरेनाकी दिदी भेनसलाई ६–४, ६–४ ले हराइन् । पूर्व यूएस ओपन रनरअप अमेरिकन मेडिसन किज विजयी रहिन् ।

प्रकाशित : भाद्र १३, २०७६ ०७:३६
प्रतिक्रिया
पठाउनुहोस्

प्रदेश ३ को आवधिक योजना : पूर्वाधार विकासमा जोड

सुवास बिडारी

मकवानपुर — प्रदेश ३ को आवधिक योजनाले पूर्वाधार विकासलाई जोड दिनुपर्नेमा सांसदले सुझाव दिएका छन् । प्रदेश सरकारको प्रथम आवधिक योजनाको आधारपत्रको विस्तृतीकरण छलफलमा सहभागी सांसदले समग्र पूर्वाधार विकासमा जोड दिँदै ‘स्मार्ट’ योजना तथा नीति बनाउन सुझाएका हुन् ।

नीति तथा योजना आयोगले आवधिक योजनाको अवधारण पत्रमाथिको छलफलका सहभागी । तस्बिर : सुवास/कान्तिपुर

प्रदेश नीति तथा योजना आयोगको बिहीबार आयोजनामा भएको छलफलमा आवधिक योजनाको लक्ष्य प्राप्तिका लागि सबै क्षेत्रको पूर्वाधारको समग्रमा विकास हुनुपर्ने भन्दै कांग्रेस प्रमुख सचेतक राधा घलेले पूर्वाधारलाई पर्यटनसँग जोड्नुपर्ने बताइन् ।

‘पूर्वाधारलाई पर्यटनसँग जोडेर काम गर्ने हो भने समग्र विकास हुने देखिन्छ,’ उनले भनिन् । सांसद् लालकुमारी पुनले ग्रामीण पूर्वाधार विकासमा काम गर्न सुझाव दिइन् । ग्रामीण जनसंख्याको बसाइँसराइ दर उच्च रहेको भन्दै उनले गाउँमा नै रोक्ने गरी पूर्वाधार विकासका योजनाहरू ल्याउन आयोगलाई सुझाव दिइन् ।

सांसद राजन दाहालले आवधिक योजनाले ऊर्जा क्षेत्रलाई छुटाएको भन्दै प्रदेश ३ को विकासका लागि ऊर्जा महत्त्वपूर्ण पूर्वाधार भएकोले समेट्न सुझाव दिए । प्रदेशसभा सदस्य मीना ज्ञवालीले स्थानीयकरण गरेर काम गर्नुपर्नेमा जोड दिइन् । ‘योजना आयोगले तयार गरेको आवधिक योजनाको अवधारणा पत्रलाई स्थानीयकरण गर्न जरुरी छ,’ उनले भनिन्, ‘स्थानीय तहमा पुगेर योजना कार्यान्वयन हुँदा मात्रै सबै विषय समेटिन्छ । जनताले विकासको अनुभूति गर्न पाउँछन् ।’

आयोगले विकासका लागि पाँचवटा प्रमुख चालकको रूपमा पूर्वाधार, कृषि, मानव संसाधन, उद्योग र पर्यटनलाई अघि सारेको छ । प्रथम आवधिक योजनाको अन्त्यसम्म प्रदेश ३ मा ११.२ प्रतिशत आर्थिक वृद्धि हासिल हुने लक्ष्य लिइएको नीति तथा योजना आयोगका सदस्य रामचन्द्र ढकालले जानकारी दिए । समन्वय र सहकार्य, रणनीतिक महत्वका आयोजनामा लगानी र परिणाममुखी शासन प्र्रणालीलाई अवधारणापत्रले समष्टिगत रणनीतिको रूपमा अघि सारेको छ ।

सांसदले एकीकृत कृषि पूर्वाधार र सामूहिक खेतीमा रणनीतिक योजना बनाउन आयोगलाई सुझाव दिएका छन् । सांसद केशवराज पाण्डेले सामूहिक खेतीका लागि स्थान पहिचान गर्दै लगानीका लागि प्रदेश सरकारले भूमिका खेल्नुपर्नेमा जोड दिए । सांसद नरोत्तम वैद्यले एउटा जिल्लामा एउटा विषयको प्रवर्द्धन गर्नुपर्नेमा जोड दिँदै पशुपतिनाथको मन्दिरलाई प्रदेश सरकारको मातहतमा ल्याएर व्यवस्थित गर्दै धार्मिक पर्यटन प्रवर्द्धनमा जोड दिनुपर्ने बताए ।

‘भारतीय प्रधानमन्त्रीले समेत मानेको पशुपतिलाई प्रदेश ३ सरकारले चिन्न सकेन,’ सांसद रमेश पौडेलले भने, ‘पशुपतिको वार्षिक आम्दानी करिब डेढ अर्ब रुपैयाँ रहेको छ । हामीलाई धार्मिक पर्यटन प्रवर्द्धन गर्दै पशुपतिलाई प्रदेश मातहतमा ल्याएको खण्डमा आर्थिक रूपमा प्रदेश बलियो हुँदै जाने छ ।’

प्रदेशको नीति तथा योजना आयोगको उपाध्यक्ष पद रिक्त रहेकै अवस्थामा महत्त्वपूर्ण कार्यक्रमको आयोजना गरिएको हो । नीति तथा योजना आयोगकै आयोजनामा आवधिक योजनालाई पूर्णता दिने तयारी सुरु गरिएको छ ।

तत्कालीन उपाध्यक्ष खिमलाल देवकोटाको अग्रसरतामा तयार गरिएको प्रथम आवधिक योजनालाई अहिले पूर्णता दिने तयारी प्रदेश सरकारले गरेको हो । देवकोटाको राजीनामा स्वीकृत भइसकेपछि हालसम्म आयोग नेतृत्वविहीन छ ।

प्रकाशित : भाद्र १३, २०७६ ०७:३५
पूरा पढ्नुहोस्
प्रतिक्रिया
पठाउनुहोस्