चुनौती बेहोर्दै रिबेरी

एएफपी

मिलान — बायर्न म्युनिखका लिजेन्ड फ्रान्क रिबेरीले सिरी ‘ए’ क्लब फिओरेन्टिनासँग दुईवर्षे सम्झौता गर्दै बुधबार अन्तिमपल्ट चुनौती बेहोर्न लागेको बताएका छन् । फ्रान्सेली विंगरले ‘फ्रि–एजेन्ट’ को रूपमा गत मेमा १२ सिजनपछि बायर्न छाडेका हुन् ।

उनले बायर्नमा छँदा बुन्डेसलिगामा सर्वाधिक नौ उपाधिका लागि ‘केइजर फ्रान्क’ को उपनाम पाएका थिए । उनले बायर्नबाट क्लब स्तरमा २३ उपाधि जिते । उनी ३६ वर्षे उमेरमा पनि माथिल्लो स्तरको फुटबल खेल्नलाई निरन्तरता दिन चाहन्छन् । टस्कन क्लबसँग वार्षिक ४४ लाख डलर तथा बोनससहितको दुईवर्षे सम्झौतामा सहमति पनि जनाए ।

‘फ्रान्क रिबेरी हाम्रो हुन् ∕ लिजेन्डलाई स्वागत छ ∕,’ अमेरिकी स्वामित्वको क्लबले बैजनी रङको जर्सीसँगै फिओरेन्टिनाको मफलरमा रिबेरीको फोटो देखाएको छ । त्यसपछि रिबेरी र उनका पत्नी वाहिबाले इन्स्टाग्राममा ‘नयाँ चुनौतीका लागि तयार’ भन्दै निजी विमानमा चढेको फोटो पोस्ट गरेका छन् ।

रिबेरीलाई सन् १९८२ को विश्वकप विजेता र फिओरेन्टिनाका लिजेन्ड जियानकार्लो एन्टोग्नोनीले स्वागत गरेका थिए । जियानकार्लो क्लबको व्यवस्थापन पक्षमा संलग्न छन् । उनले इटाली सर्न मनाएका बायर्नका पूर्व सहकर्मी लुका टोनी (जो फिओरेन्टिनामा पनि खेलेका थिए) सहित हजारौं दर्शकलाई सम्बोधन गरे । ‘म खुसी छु । यहाँ म परिवारसहित आएको छु,’ रिबेरीले भने, ‘मैले फिओरेन्टिनासँग गत सातादेखि कुरा गरिरहेको थिएँ । लुका टोनीसँग पनि कुरा गरेँ । उनले फिओरेन्टिना महान् क्लब भएको बताए र सहर सुन्दर भएको पनि । मलाई पनि इटालियन मनपर्‍यो । मैले सुधार गर्नुपर्ने भए पनि यो बोल्छु ।’

रिबेरीले यसअघि टर्किस क्लब गालातासारे र फ्रान्सेली क्लब मार्से, ब्रेस्ट र मेट्जबाट खेलेका थिए ।‘मेरो लागि यो महत्त्वपूर्ण हो कि दुई वर्षको सम्झौता गरेको छु,’ रिबेरीले भने, ‘अर्को महत्त्वपूर्ण पक्ष म मेरो परिवारसँगै हुनेछु । अर्को दुई वर्ष उच्चस्तरको फुटबल खेल्ने भएकोमा म धेरै खुसी छु ।’

गत सिजन सिरी ‘ए’ मा १६ औं स्थानमा रहे पनि फिओरेन्टिनाले यसपालि ऐतिहासिक सफलता हात पार्ने महत्त्वाकांक्षा राखेको छ । क्लबका नयाँ मालिक इटालियन–अमेरिकी मिडिया व्यवसायी रोको कोमिसोका लागि रिबेरी पहिलो ठूलो अनुबन्ध हो । ‘भोलि उनलाई पूरा सहरसामु प्रस्तुत गर्नेछौं । हामी आर्टेमियो फ्रान्ची रंगशाला खोल्नेछौं, जहाँ उनलाई सबैले स्वागत गर्न सक्छन् । हामीले रंगशाला भरिने अपेक्षा गरेका छौं, जसका लागि च्याम्पियन (रिबेरी) योग्य छन्,’ कोमिसोका प्रतिनिधि जोए बारोनले भने ।

युवा वर्चस्व र प्रतिभावान फेडेरिको चिएसा, डुसान भ्लाहोभिच र निकोला मिलेन्कोभिचहितको महत्त्वाकांक्षी टिमका लागि रिबेरीको अनुभव महत्त्वपूर्ण हुनसक्छ । ‘फ्रान्क नेता हुन्,’ टोनीले भने, ‘जसले उनलाई बुझेका छैनन्, उनलाई निश्चित व्यवहारले आबद्ध गर्छन् । उनी लकर रूममा मित्रवत् छन् र युवालाई सहयोग गर्छन् ।’

रिबेरीले पहिलो खेल शनिबार गत वर्षको उपविजेता नेपोलीविरुद्ध खेल्न सक्छन् । फिओरेन्टिनाले सिरी ‘ए’ को उपाधि सन् १९५६ र १९६९ मा जितेको थियो ।

प्रकाशित : भाद्र ५, २०७६ ०७:३८
प्रतिक्रिया
पठाउनुहोस्

नयाँ शैली पस्कँदै युभेन्ट्स

एएफपी

मिलान — युभेन्ट्सले सिरी ए को नयाँ सिजन अबको सप्ताहन्त सुरु गर्दै छ, नयाँ प्रशिक्षक माउरिजियो सारीको नेतृत्वमा । लगातारको लिग च्याम्पियन युभेन्ट्सले फेरि एकपल्ट उपाधि जित्ने उद्देश्य राखेको छ ।

युभेन्ट्सका फ्रेन्च मिडफिल्डर एडरिन राबोट । तस्बिर : एएफपी

यसका लागि टोलीले जोखिम उठाएको छ, भेट्रान प्रशिक्षक सारीमाथि । नौपल्ट लगातार उपाधि जित्ने अभियानमा रहेको युभेन्ट्सले शनिबार पार्माको सामना गर्नेछ । त्यस दिन बेन्चमा सारी भने हुने छैनन्, किनभने ६० वर्षीय प्रशिक्षकलाई निमोनिया भएको छ ।
इंग्लिस प्रिमियर लिग क्लब चेल्सीमा एक वर्ष बिताएयता उनी फेरि इटाली फर्केका छन् । उनको चेल्सी बसाइ संघर्षपूर्ण रह्यो ।

त्यसअगाडि उनले नेपोलीमा तीन वर्ष बिताएका थिए । उनलाई भित्र्याएर युभेन्ट्सले आफ्नो परम्परा तोड्ने प्रयास गरेको छ । यसअघि क्लबलाई पाँच लिग उपाधि दिलाउने मासिमिलियानो एलेग्री जहाँ स्वच्छ र सफा छविका छन्, त्यहीं सारी लगातार चुरोट खाइरहनुपर्ने परम्पराबाट टाढा छन् । उनी सुट पाइन्टमा देखिँदैनन् ।

घरेलु फुटबलमा लगातार सफल रहे पनि क्लबमाथि आरोप छ, टिमले रक्षात्मक खेलमा बढी जोड दिन्छ । त्यसैले क्लब मालिकको इच्छा हो, टिमले आक्रामक फुटबल खेलोस्, जसलाई हेरेर दर्शक मख्ख परोस् । त्यसको अभावमा युभेन्ट्सका समर्थक इटालीमै कम भइरहेको पनि बताइएको थियो । त्यसैले विश्वास गरिएको छ, सारी आएयता युभेन्ट्सले आक्रामक फुटबल खेल्नेछ, जसले समर्थकलाई लोभ्याउने छ, भलै उनले चेल्सीका लागि एउटै उपाधि जितेका छन्, गत सिजनको युरोपा लिग ।

प्रशिक्षक माउरिजियो सारी। तस्बिर : एएफपी

गोलरक्षक जियानलुइजी बुफोन फेरि एकपल्ट टुरिन फर्केका छन् पेरिस सेन्ट जर्मेनबाट । उनलाई के विश्वास छ भने टिमको खेल्ने शैली परिवर्तत हुँदा त्यसले पक्कै पनि फाइदा गर्नेछ । ‘युरोपेली च्याम्पियन्स लिग जित्ने उद्देश्यमा छ युभेन्ट्स । त्यसैले नयाँ शैली अपनाउँदा राम्रो हुनेछ,’ ४१ वर्षीय बुफोनले भने, ‘सारीको फुटबल शैली नयाँ छ, उनी खासमै जोमिख उठाउन चाहँदैनन् । न त यो क्रान्तिकारी नै छ, त्यसैले टिममा सबै नयाँ हुनेछ ।’

यस सिजन युभेन्ट्सलाई दुई क्लबले चुनौती पेस गर्नेछ, कार्लो एन्सेलोट्टीको नेपोली र एन्टोनियो कोन्टेको इन्टर मिलान । तर सारीको अबको युभेन्ट्सको उद्देश्य ३६ औं पल्ट लिग जित्ने त हुने नै छ । त्यो भन्दा पनि मुख्य लक्ष्य हुनेछ सन् १९९६ यता च्याम्पियन्स लिग जित्ने । यसका लागि सारीको मुख्य खेलाडी हुनेछ क्रिस्टियानो रोनाल्डो । सारी मान्छन्, रोनाल्डो खेलमा एक्लै फरक पार्न सक्ने खेलाडी हुन् । डच स्टार म्याथिज डी लिग्टले डिफेन्स सम्हाल्ने छन् ।

उनलाई साथ दिने छन्, भेट्रान जियोर्जियो चिलिनी र लियोनार्दो बुनुची । गत सिजन युभेन्ट्स डी लिग्टकै अयाक्सको हातबाट पराजित हुँदै युभेन्ट्स च्याम्पियन्स लिगबाट बाहिरिएको थियो । यसै सिजनका लागि भनेर युभेन्ट्सले पीएसजीका एडरिन राबोट र आर्सनलका पूर्व स्टार आरोन राम्सीलाई भित्र्याएको छ । दुवैका लागि क्लब मोटो रकम पारिश्रमिक तिर्न तयार भएको छ । दुवै खेलाडी टिमले स्थानान्तरणमा नि:शुल्क पाएको थियो ।

युभेन्ट्सका खेलकुद निर्देशक फाबियो पाराटिसी पनि मान्छन्, सारी आएयता युभेन्ट्सले फरक ढंगले खेल्नेछ । उनले भनेका छन्, ‘सारी आएयता हामी खुसी छौं । डी लिग्ट आएपछि टिम अझ बलियो भएको छ । अब हाम्रो टिमको सबै क्षेत्र बलियो छ र गज्जबको टिम बनेको छ ।’ ब्राजिली लेफ्ट ब्याक एलेक्स सान्द्रो मान्छन्, सारी आएयता देखिने गरेर टिममा परिवर्तन आउन थालेको छ । ‘हामी सबै लिग कहिले सुरु भनेर पर्खिरहेका छौं,’ उनले भने ।

प्रकाशित : भाद्र ५, २०७६ ०७:३८
पूरा पढ्नुहोस्
प्रतिक्रिया
पठाउनुहोस्