फुटसल प्रशिक्षकहरू असन्तुष्ट

कान्तिपुर संवाददाता

काठमाडौँ — पूर्व प्रशिक्षक राकेश श्रेष्ठसहित ९ जनाले राष्ट्रिय फुटसल टिमको मुख्य प्रशिक्षक छनोटप्रति असन्तुष्टि व्यक्त गरेका छन् ।

अखिल नेपाल पुलबल संघको फुटसल कमिटीले संकटा क्लबका खेलाडी विष्णु गुरुङलाई राष्ट्रिय फुटसल टिमको प्रशिक्षक नियुक्त गरेकोमा उनीहरूले आपत्ति जनाएका हुन् ।

प्रशिक्षकहरू राकेश श्रेष्ठ, राजेश शाही, सरोज थापा, नरेश श्रेष्ठ, दीपक भुसाल, चेतन घिमिरे, विक्रम महर्जन, पुरुषोत्तम थापा र चक्र तामाङले संयुक्त विज्ञप्ति जारी गरी अनुभवी प्रशिक्षक हुँदाहुँदै विगतमा कुनै फुटसल टिम नहेरेको र ए डिभिजन टिम संकटाका खेलाडीलाई प्रशिक्षक नियुक्ति गर्नुको आधारबारे प्रश्न गरेका छन् ।

यसबारे संकटाका अध्यक्षसमेत रहेका एन्फा महासचिव इन्द्रमान तुलाधरले गत संस्करणको ए डिभिजन लिगमा दोस्रो बनाउन महत्त्वपूर्ण भूमिका निर्वाह गरेवापत पुरस्कार दिएको जवाफ आफूहरूले पाएको विज्ञप्तिमा उल्लेख छ । उनीहरूले टिम घोषणा हुनुभन्दा अगाडि नै प्रशिक्षक नियुक्ति हुनुपर्नेमा प्रक्रिया मिचिएकोमा पनि आपत्ति जनाएका छन् । प्रशिक्षक छान्ने काम एन्फाको प्राविधिक समितिले गर्नुपर्नेमा फुटसल कमिटीले गरेको तथा फुटसल कमिटी संयोजक, एन्फा महासचिव र लिग निर्देशकले मौखिक सहमति उल्लंघन गरेको आरोप पनि उनीहरूले लगाएका छन् ।

राष्ट्रिय टिमको छनोट समितिमा फुटबल र फुटसलको अनुभव नभएका र त्यससम्बन्धी हुनै आधिकारिक प्रमाणपत्र नभएका प्रकाश परियारलाई राखिएकोप्रति विज्ञप्तिमा आक्रोश प्रकट गरिएको छ । छनोट समितिले सिफारिस गरेका ३२ खेलाडी भए पनि ५ जनाको नाम आफूखुसी थपिएकोमा उनीहरूले विधि मिचिएको दाबी गरेका छन् । सबै नियुक्ति खारेज हुनुपर्ने माग उनीहरूको छ ।

प्रकाशित : भाद्र ४, २०७६ ०९:४९
प्रतिक्रिया
पठाउनुहोस्

युनाइटेड रोकियो

(एएफपी)

वोल्भरह्याम्पटन — पाउल पोग्बाले पेनाल्टी गुमाएपछि म्यानचेस्टर युनाइटेड सोमबार इंग्लिस प्रिमियर लिगमा वोल्भससँग १–१ को बराबरीमा रोकिएको छ । मोलिनक्स स्टेडियममा पोग्बाको पेनाल्टीलाई वोल्भसको गोलरक्षक रुई पेट्रिसियोले बचाएका थिए ।

एन्थोनी मार्सियलको गोलमा ओले गनर सोल्सायरको टोलीले पहिलो हाफमा अग्रता लिएको थियो । खेल अधिकांश समय आफ्नो अधिनमा राख्यो । मार्सियलको प्रिमियर लिगमा यो दोस्रो गोल थियो । रुबेन नेभेसले उत्कृष्ट गोल गर्दै वोल्भसलाई ५५ औं मिनेटमा बराबरीमा ल्याए ।

पोग्बालाई पेनाल्टी हान्ने दिने निर्णय निकै कौतूहलपूर्ण थियो । ६९ औं मिनेटमा उनले पेनाल्टी गुमाउँदा युनाइटेडले त्यसको मूल्य चुकाउनुपर्‍यो । युनाइटेडबाट मार्कस रासफोर्डले पछिल्लो समय पेनाल्टी प्रहार गर्दै आएका थिए । गत साता युनाइटेडले चेल्सीमाथि ४–० को जित हात पार्दा पनि रासफोर्डले नै पेनाल्टीमा गोल गरेका थिए । गत सिजनमा उनले नै च्याम्पियन्स लिगको अन्तिम १६ मा पेरिस सेन्ट जर्मेनमाथि पनि स्मरणीय पेनाल्टी गोल गरेका थिए ।

पोग्बाले गत सिजन सुरुयता प्रिमियर लिगमा चारपल्ट पेनाल्टी गोल गर्नबाट चुकाइसकेका छन् । जित हात पारेको भए युनाइटेड शीर्षस्थानमा जाने थियो । तर बराबरीको नतिजाले टोली चौथो स्थानमा खुम्चिएको छ । प्रिमियर लिग उपाधिका लागि सोल्सायरको टोलीले धेरै कार्य गर्न बाँकी रहेको देखाएको छ । सोल्सायरले वोल्भससँग उतारेको टोलीको औसत उमेर साढे २४ वर्षको थियो, जुन २०१६–१७ यताको सबैभन्दा कम उमेरको टोली हो ।

डानियल जेम्सले पहिलोपल्ट प्लेइङमा खेल्न पाए । सिजनको सुरुआतमा स्वान्सीबाट आएका २१ वर्षे जेम्सले चेल्सीविरुद्ध वैकल्पिक खेलाडीका रूपमा खेल्दै गोल गरेका थिए । चिलीका फरवार्ड एलेक्सिस सान्चेजलाई भने युनाइटेडले कुनै स्थान दिएको थिएन । उनलाई लोनमा लिन इन्टर मिलानले प्रयास गरिरहेको छ ।

प्रकाशित : भाद्र ४, २०७६ ०९:४७
पूरा पढ्नुहोस्
प्रतिक्रिया
पठाउनुहोस्