'आर्चरसँग सचेत रहनू’

स्टिभ स्मिथले तेस्रो  टेस्ट गुमाउने
(एएफपी)

लन्डन — इंग्ल्यान्डका बेन स्टोक्सले एसेज शृंखलाको बाँकी टेस्टमा जोफ्रा आर्चरबाट अझै बाउन्सर बर्सिने भन्दै अस्ट्रेलियालाई सचेत रहन चेतावनी दिएका छन् । आइतबार लर्ड्समा बराबरीमा सम्पन्न टेस्टमा ‘डेब्यु’ गरेका विश्वकप विजयी बलर आर्चरले बाउन्सरको वर्षा नै गरेका थिए । 

‘यो खेलको एउटा हिस्सा हो र जोफ्राको खेल पनि । उनी आक्रामक रूपमा प्रस्तुत हुन्छन् र ब्याट्सम्यानलाई सहज हुन दिँदैनन्,’ स्टोक्सले भने । टेस्टमा कुल ५ विकेट लिएका आर्चरले शर्ट पिच बलहरू फाल्दै अस्ट्रेलियाका ब्याट्सम्यानलाई निकै अप्ठ्यारोमा पारेका थिए । आर्चरले ९१.६ प्रतिमाइल घण्टाको गतिमा गरेको बलले स्टिभ स्मिथको गर्दनमा लागेको थियो, जसका कारण ‘कनकसन’ भएका स्टार स्मिथ मैदानमा आउन असमर्थ रहेका थिए ।

‘जब कसैलाई बलले त्यसरी गहिरो गरेर लाग्छ, चिन्ता त अवश्य हुन्छ । तर फेरि अर्को बल सुरु गर्दा यस्तै बल फाल्छु भन्ने विचार आउँछ,’ आफैं पनि सिम बलर रहेका स्टोक्सले भने । स्मिथको स्थानमा मार्नुस लाबुसचेन्नीले लिँदै अन्तर्राष्ट्रिय क्रिकेटको पहिलो ‘कनकसन सब्स्टिच्युट’ खेलाडी बन्दै इतिहास रचेका थिए । उनलाई पनि आर्चरले दोस्रो बलमै हेल्मेटमा प्रहार गरेका थिए । ती सबै बल क्रिकेटका नियमअनुरुप नै थिए, जसमा तीव्र बलरहरू पनि रमाउने गर्छन् । त्यसैले स्टोक्स मान्छन् लिड्समा बिहीबार सुरु हुने टेस्टमा आर्चरले आफ्नो शैली परिवर्तन गर्नुपर्ने कुनै कारण छैन ।

यता स्मिथले तेस्रो टेस्ट गुमाउने भएको क्रिकेट अस्ट्रेलियाले मंगलबार जनाएको छ । ३० वर्षे स्मिथले पहिलो टेस्टको दुवै इनिङ्समा शतक बनाएका थिए । दोस्रो टेस्टको पहिलो इनिङ्समा ९२ रन बनाउनेक्रममा उनलाई आर्चरको बलले गर्धनमा लागेको थियो । पहिलो टेस्टको दुई इनिङ्समा स्मिथले १४४ र १४२ रन बनाएका थिए ।

‘मंगलबारको अभ्याससत्रमा उत्रिन नसकेपछि स्टिभ स्मिथले तेस्रो टेस्ट गुमाउने भएको प्रशिक्षक जस्टिन ल्याङ्गरले बताएका छन्,’ क्रिकेट अस्ट्रेलियाले आफ्नो वेबसाइटमा जनाएको छ । स्मिथले खेल्न नसक्नु अस्ट्रेलियाको धक्का हो । अर्का अनुभवी ब्याट्सम्यान डेविड वार्नरले चार इनिङ्समा केवल १८ रनमात्र बनाउन सकेका छन् । तर स्मिथको स्थान लिँदै ‘कनकसन सब्स्टिच्युट’ लाबुसचेन्नीले अर्धशतक बनाउँदै टेस्ट जोगाउन मदत गरी अस्ट्रेलियालाई आशा देखाएका छन् ।

इंग्ल्यान्ड पाँच टेस्टको शृंखलामा १–० ले पछाडि रहे पनि आर्चरको अत्तिरिक्त तीव्र गतिको बलिङले पुनरागमन गर्ने आशा स्टोक्सको छ । एजबास्टनको पहिलो टेस्टमा २ सय ५१ रनले पराजित भएपछि इंग्ल्यान्ड शृंखलामा पछाडि परेको थियो । ‘सबै जोफ्राको लयअनुसार मिलेको छ, त्यसैले बाउन्सर बल कतिखेर आउँछ भन्ने थाहा पाउन कठिन हुन्छ,’ स्टोक्सले भने । लर्ड्सको दोस्रो टेस्टमा इंग्ल्यान्डका बलरले फालेको बलले १२ पटक अस्ट्रेलियाका ब्याट्सम्यानलाई हेल्मेटमा लागेको थियो, त्यसमा ११ पटक आर्चरकै बलिङमा थियो ।

‘उनले हाम्रो तीव्र गतिको बलिङ आक्रामणमा नयाँ आयाम दिएका छन् । उनले पहिलो इनिङ्समा २९ ओभर बलिङ गरेका थिए, त्यसमा अन्तिम आठ ओभरको स्पेलको तीव्र गतिको बलिङ उत्कृष्टमध्ये एक थियो । मैले खेल्न लागेपछि पहिलोपल्ट यस्तो स्पेलको बलिङ देखें,’ स्टोक्सले भने, ‘अस्ट्रेलियाका मिचेल जोन्सनले पनि विगतमा यस्तै बलिङ गरेकै हुन्, विशेष गरी २०१३ मा । जोफ्राले यसलाई अझ सजिलो जस्तो बनाइदिएका हुन् । मलाई उनको बलको सामना गर्नुभन्दा आफ्नै टोलीमा परेकोमा राम्रो लाग्छ । उनी असाधरण प्रतिभा हुन् ।’

प्रकाशित : भाद्र ४, २०७६ ०९:४६
प्रतिक्रिया
पठाउनुहोस्

टनकपुर ब्यारेज खुलाउन माग

भवानी भट्ट

(कञ्चनपुर) — नेपाल–भारत सीमा क्षेत्रका स्थानीयले सवारी साधन आवागमनका लागि टनकपुर ब्यारेज खुला गर्न माग गरेका छन् । धार्मिक तथा व्यापारिक महत्त्वको टनकपुर नाका खोल्नका लागि स्थानीयले दुवै देशका जनप्रतिनिधिहरूलाई दबाबसमेत दिए ।

‘सीमा वारिपारिका ब्रह्मदेव र टनकपुर धार्मिक रूपमा पनि अन्तर्सम्बन्धित छन्,’ मंगलबार भीमदत्त नगरपालिका ९ मा आयोजित कार्यक्रममा दुवैतर्फका विधायकहरूसँग स्थानीय केशव भट्टले भने, ‘यता सिद्धनाथ बाबाको दर्शन नगरे उता पूर्णागिरिको दर्शन गरेको अर्थ रहँदैन । त्यसैले नाका सञ्चालनमा ल्याइहाल्नुपर्छ ।’

ब्रह्मदेव लिंक रोड र नहरलाई ब्यारेजसँग जोडेर निर्वाध रूपमा सवारी आवागमन सहज पार्नुपर्ने माग स्थानीयको छ । विगतमा टनकपुर ब्यारेजलाई एसियन हाइवेसँग जोड्ने सपनासमेत बाँडिएको र अहिले सवारी साधन आवागमनसम्म हुन नसक्नु निराशाजनक भएको भट्टले बताए ।
सीमावर्ती बजार ब्रह्मदेव नजिक टनकपुर ब्यारेज बनेको दुई दशक बितिसकेको छ । महाकाली सन्धिअनुसार टनकपुर ब्यारेजदेखि महेन्द्रनगरसम्म लिंक रोड र सिँचाइका लागि नहर निर्माण भारतीय पक्षले गर्नुपर्ने थियो । यसतर्फ भारतले वास्ता गरेन । सीमासम्मै नहर र लिंक रोड नेपाल आफैंले निर्माण गरिसकेको छ । ब्यारेजदेखि नेपाल–भारत सीमासम्म पर्ने भारतीय भूभागमा भने अझै सडक र नहर निर्माण हुन सकेको छैन । महाकाली सन्धिमा टनकपुर ब्यारेजबाट नेपालले सिँचाइका लागि १ हजार क्युसेक पानी पाउने व्यवस्था छ । जसका लागि नेपालतर्फ नहर निर्माणको काम धमाधम भइरहेको छ । भारतीय पक्षले भने आफ्नो भूभागमा पर्ने १२ सय मिटर क्षेत्रमा नहर निर्माणको सुरसारै गरेको छैन ।

भीमदत्त नगरपालिकाको भासीदेखि सीमासम्मै लिंक रोड निर्माणको काम भने अन्तिम चरणमा पुगेको छ । भारततर्फ भने नहरझैं सडक निर्माणको कामले पनि गति लिन नसकेको स्थानीयले बताए । ‘नहर र सडक निर्माणसँगै टनकपुर ब्यारेज आवागमनका लागि पनि खुला हुनु आवश्यक छ,’ कञ्चनपुर उद्योग वाणिज्य संघका अध्यक्ष जंगबहादुर मल्लले भने, ‘ब्रह्मदेव र टनकपुर बजारलाई जोड्नसमेत यो अनिवार्य छ ।’ उनले सीमामा नेपालीहरूमाथि हुने दुर्व्यवहार रोक्न पनि भारतीय पक्षले चासो दिनुपर्ने बताए ।

उत्तराखण्डको चम्पावतमा पर्ने पूर्णागिरि मन्दिर र ब्रह्मदेवको सिद्धबाबा मन्दिर एकअर्काका परिपूरक मानिन्छन् । पूर्णागिरि पुगेपछि सिद्धबाबाको दर्शन गर्नैपर्ने धार्मिक मान्यता छ । धार्मिक रूपमा समेत वारिपारिको ठूलो महत्त्व भएकाले त्यसलाई जोड्ने सेतु (टनकपुर ब्यारेज) सञ्चालन हुनुपर्ने स्थानीयले बताए । भारतीय पक्षले भने सवारी साधन सञ्चालनका लागि पुलका संरचना कमजोर भएकाले खुला गर्न आलटाल गर्दै आएको छ ।

भारत उत्तराखण्डको चम्पावत जिल्लाका विधायक कैलाशचन्द्र गहतोडीले टनकपुर ब्यारेजसम्म सडक र नहर निर्माणका लागि यसै वर्ष टेन्डर हुन सक्ने बताए । उनले पुल खुलाउने विषयमा पनि आफूले सक्दो पहल गर्ने आश्वासन दिए । ‘नहर निर्माणका लागि यसै वर्ष टेन्डर हुने कुरा सुनिएको छ,’ उनले भने, ‘नहरसँगै सडक निर्माणको काम पनि अघि बढाइनेछ ।’

उनले टनकपुर ब्यारेज खुलाउन सके ब्रह्मदेवका लागि मात्रै नभई चम्पावतका लागि समेत फाइदाजनक हुने बताए । सुदूरपश्चिम प्रदेशका उद्योग, वन वातावरण तथा पर्यटन राज्यमन्त्री प्रकाश रावलले प्रदेश सरकारले यस विषयमा संघीय सरकारलाई आग्रह गर्ने बताए ।

प्रकाशित : भाद्र ४, २०७६ ०९:४३
पूरा पढ्नुहोस्
प्रतिक्रिया
पठाउनुहोस्