नेपाल सिंगापुरसँग पराजित, ग्लोबल छनोटमा पुग्न असफल

विश्व ट्वान्टी–२० एसिया छनोट
कान्तिपुर संवाददाता

काठमाडौँ — नेपाल विश्व ट्वान्टी–२० एसिया छनोटको निर्णायक खेलमा सिंगापुरसँग पराजित भएको छ । आइतबार ८२ रनको फराकिलो हारपछि नेपाल ग्लोबल छनोटमा पुग्न असफल भएको हो ।

इन्डियन एसोसिएसन ओभल मैदानमा टस जितेको सिंगापुरले निर्धारित २० ओभरमा ६ विकेट गुमाई १ सय ९२ रनको विशाल स्कोर बनायो। जबाफमा आएको नेपाल १५ ओभरमा १ सय ९ रनमै अलआउट भयो।

राउन्ड रोबिनका पुरै ४ खेलको समाप्तीमा सिंगापुरले ७ अंक बटुलि विजेता बन्यो। पाँच राष्ट्र सहभागि प्रतियोगिताको विजेता राष्ट्र अक्टोबर–नोभेम्बरमा युएईमा हुने विश्व ट्वान्टी–२० ग्लोबल छनोटमा पुग्ने प्रावधान अनुरुप सिंगापुरले पहिलो पटक ग्लोबल छनोटमा खेल्ने छ।

दुई खेलमात्र जितेको नेपाल ४ अंकसहित तेस्रो स्थानमा रहयो। नेपाल पहिलो खेलमै कतारसँग ४ विकेटको स्तब्ध हार बेहोरेको थियो। ४ नै अंक भए पनि नेपाललाई रन रेटमा उछिन्दै कतार दोस्रो स्थानमा रहयो।

अस्ट्रेलियाको बिग बासमा पर्थ स्क्रोचर्सबाट खेल्न टिम डेबिडले ४३ बलमा ७७ रन बनाएपछि घरेलु टोली सिंगापुरले विशाल स्कोर बनायो। उनले ८ चौका र ३ छक्का प्रहार गरे। उनले रोहन रंगराजनसँग दोस्रो विकेटमा ८९ रनको साझेदारी गरे। रंगराजनले ३३ बलमा ४९ रन बनाउदा ३ चौका र ४ छक्का प्रहार गरे। त्यस्तै मनप्रित सिंहले २७ बलमा २ चौका र ३ छक्का प्रहार गरी ४२ रन बनाए।

नेपालका अविनाश बोहराले ४ ओभरमा ३५ रन खर्चेर ४ विकेट लिए। करण केसीले ३ ओभरमा २६ रन खर्चेर २ विकेट लिए। स्पिनर वसन्त रेग्मीले ४ ओभरमा ५४ रन खर्चन पुगेका थिए।

कप्तान पारस खड्का र ज्ञानेन्द्र मल्लले ३ ओभरमा २७ रन जोडी नेपाललाई राम्रै सुरुआत दिलाएका थिए। चौथो ओभरको पहिलो बलमै पारस १२ रनमा आउट भए। पावर प्लेको अन्तिम ओभरमा ज्ञानेन्द्र मल्लले २ छक्का र २ चौका सहित २० रन प्रहार गरे। आठौं ओभरमा ज्ञानेन्द्र २१ बलमा ३९ रन बनाई आउट भए। उनले चार चौको ३ छक्का प्रहार गरे।

शरद भेषावकर ७, दीपेन्द्रसिंह ऐरी २३, रोहित पौडेल ५, विनोद भण्डारी ९, करण शुन्य, सोमपाल कामी ११ रनमा आउट भए। सिंगापुरका सेलाडोर विजयकुमारले ४ ओभरमा २५ रन खर्चेर ४ र विनोद भास्करनले २ विकेट लिए।

तस्बिर सौजन्य : कौशल अधिकारी/क्रिकेटिङ नेपाल

प्रकाशित : श्रावण १२, २०७६ १०:२४
प्रतिक्रिया
पठाउनुहोस्

अज्ञात समूहद्वारा वडा कार्यालयमा आगजनी

रासस

डोटी — शिखर नगरपालिका–७ बैरकोटमा रहेको पक्की भवन भएको वडा कार्यालयमा शनिबार राति अज्ञात समूहले आगजनी गरेका छन् । 

प्रतिकात्मक तस्बिर

जिल्ला प्रहरी कार्यालय डोटीका प्रहरी प्रमुख तथा प्रहरी उपरीक्षक विद्यानन्द माझीले दिएकाे जानकारीअनुसार अज्ञात समूहले राति करिब १ बजेको समयमा उक्त वडा कार्यालयमा आगजनी गरेको हो।

आगजनीबाट वडा कार्यालयमा भएका फर्निचर, काजगात तथा अन्य सरसामान जलेर नष्ट भएको छ। आगजनी किन, कस्ले गर्‌यो भन्ने विषयमा अनुसन्धान भइरहेको प्रहरी उपरीक्षक माझीले बताए। उनले भने, 'घटनास्थलमा प्रहरी टोली परिचालन भएको छ, किन र कसले आगजनी गर्‌यो अनुसन्धानपछि मात्रै भन्न सकिन्छ।'

आगजनीबाट उक्त वडा कार्यालयका वडाध्यक्ष तथा वडासचिवको कोठामा भएका सम्पूर्ण सामान जलेर नष्ट भएको वडाध्यक्ष नरबहादुर बलायरले बताए।नेत्रविक्रम चन्द समूहका कार्यकर्ताले आगजनी गरेको हुनसक्ने डोटी प्रहरीको अनुमान रहेको छ। अज्ञात समूहको आगजनीपछि उक्त क्षेत्रमा अहिले जिल्ला प्रहरी कार्यालय डोटीसहित नजिकको प्रहरी चौकीबाट ठूलो सङ्ख्यामा प्रहरी टोली परिचालन भएको बताइएको छ।

जिल्लामा उक्त वडा कार्यालयसहित अज्ञात समूहले बडीकेदार, जोरायल गरी तीन स्थानीय तहका वडा कार्यालयमा आगजनी गरिसकेको छ।

प्रकाशित : श्रावण १२, २०७६ १०:१८
पूरा पढ्नुहोस्
प्रतिक्रिया
पठाउनुहोस्