समीरले जिते स्वर्ण

कमलादीस्थित प्रज्ञा भवनमा शुक्रबार सुरु च्याम्पियनसिपको पहिलो दिन भएको उक्त तौलमा समीरले भारतका दिनेश काम्बली र आफ्नै देशका प्रज्ज्वलमान शाक्यलाई पछाडि पारेका थिए । दिनेशले रजत र प्रज्वलले कांस्य जिते । समूह विजेता रहेकाले समीरले ओभरअलमा पनि प्रतिस्पर्धा गर्नेछन् ।

शुक्रबार ६ स्पर्धामा प्रतिस्पर्धा गराइएको थियो । नेपाली खेलाडीले १ स्वर्ण, ४ रजत र ३ कांस्य पदक जितेका छन् । पुरुष ५५ केजीमा नेपालका किसनदास महर्जनले कांस्य जिते । माल्दिभ्सका मोहम्मद मुसाले स्वर्ण र भारतका मुर्गन रामामूर्तिले रजत जितेका थिए । ६० केजीमा नेपालका कमल भण्डारी रजत जित्न सफल भए । भारतका दीपु दत्तले स्वर्ण र अफगानिस्तानका मोहम्मद कसिम हुसैनले कांस्य जिते ।

नेपाल शारीरिक सुगठन तथा फिटनेस संघद्वारा आयोजित प्रतियोगिताको पुरुष ७० केजीमा नेपालका रमेश कार्कीले रजत जिते । यस तौलमा अफगानिस्तानका खेलाडीद्वय अब्दुल सामी हैदारीले स्वर्ण र इमरान अलीले कांस्य जिते । महिला एथलेटिक फिजिकमा नेपालले दुई पदक जित्यो । रजनी श्रेष्ठले रजत र सुजिता मानन्धरले कांस्य जितेका हुन् ।

भारतकी निशा भोयरले स्वर्ण जितिन् । पुरुष फिटनेस फिजिकमा नेपालका राजु राईले रजत जिते । अफगानिस्तानका हमिदुल्लाह खुशदिलले स्वर्ण र सलिम साह अनवारीले कांस्य जितेका थिए । प्रतियोगिताका अन्य १२ इभेन्टका खेल शनिबार हुनेछ ।