फिलिपिन्सविरुद्ध जित

कान्तिपुर संवाददाता

काठमाडौँ — इन्डोर हक्की एसिया कपमा बुधबार नेपाली महिला टोलीले फिलिपिन्सलाई ३–२ गोलले पराजित गरेको छ । 

थाइल्यान्डको चोनबुरीमा भइरहेको प्रतियोगितामा नेपालको जितमा देविका बिकले दुई र निलिमा पाण्डेले एक गोल गरेका थिए । नेपाली महिला हक्कीले एसियाली टिमविरुद्ध पहिलो जित हात पारेको हो ।

गोलरक्षक कुश्मा राना मगरको कप्तानीमा रहेको नेपाली टोलीबाट सरिता मेचे, सीतामाया बल, उमा गुरुङ, अन्जना चन्द, विन्दु विष्ट, गुडिया सोनार, सरस्वती तामाङ, कमला पुन, निलिमा, देविका र समिक्षा पुनले खेलेका थिए ।

पहिलो दुई दिन नेपाली टोली उज्वेकिस्तानसँग ९–० र काजकिस्तानसँग ८–० ले पराजित भएको थियो । समूह ‘ए’ मा रहेको नेपालले लिगको अन्तिम खेलमा बिहीबार इरानसँग खेल्नेछ ।

पुरुषतर्फ नेपालले खेलेका तीनवटै खेलमा पराजय भोगेको छ । पहिलो खेलमा उज्वेकिस्तानसँग १३–२ ले पराजित नेपालले काजकिस्तानसँगको खेल १२–१ ले र सिंगापुरसँगको खेल १५–१ ले गुमाएको थियो । समूह ‘बी’ मा रहेको नेपालले अन्तिम खेलमा चाइनिज ताइपेईसँग खेल्नेछ ।

प्रकाशित : श्रावण २, २०७६ ०८:०९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

विश्वकप एसियाली छनाेट : दुई कोरियाको भिडन्त

एएफपी

क्वालालम्पुर — राजनीतिक रूपमा तनावपूर्ण सम्बन्ध रहेको उत्तर र दक्षिण कोरिया विश्वकप छनोटको एउटै समूहमा परेका छन् । बुधबार भएको ‘ड्र’ मा चिरपरिचित प्रतिद्वन्द्वी इरान र इराकबीच पनि समूहमै प्रतिस्पर्धा हुने भएको छ ।

ठूला टिमहरू इरान, जापान, दक्षिण कोरिया, अस्ट्रेलिया र साउदी अरेबियाले रुसमा २०१८ मा भएको विश्वकप खेलेका थिए । ती टिमहरू २०२२ मा कतारमा हुने प्रतियोगिताको एसियाली छनोटमा बेग्लाबेग्लै समूहमा रहेका छन् ।

दोस्रोपल्ट विश्वकपमा छनोट हुने प्रयासमा रहेको चीन केही सहज मानिएका र वरीयतामा तल रहेका युद्धग्रस्त सिरिया र सानो देश ग्वामसँगै परेको छ । वरीयतामा ७३ औं स्थानमा रहेको चीनलाई विश्वकप आयोजना गर्ने र जित्ने फुटबलप्रेमी राष्ट्रपति सी जिनपिङले महत्त्वाकांक्षा राखेका छन् ।

दक्षिण कोरिया एसियाको उत्कृष्टमध्ये एक टिम हो र उसले उत्तर कोरियालाई सजिलै हराउन सक्छ । तर कोरिया विभाजनको तिक्ततापूर्ण सम्बन्ध रहेको अवस्थामा दुई छिमेकीबीच खेल हुनेछ । छनोटमा दुवैले एकअर्काविरुद्ध दुईपल्ट खेल्नेछन् सेप्टेम्बर र जुनमा ।

एसियाली फुटबल महासंघ (एएफसी) को मुख्यालय क्वालालम्पुरमा भएको ‘ड्र’ पछि दक्षिण कोरियाका प्रशिक्षक पाउलो बेन्टोले उत्तर कोरियाविरुद्धको खेल ‘विशेष नहुने’ बताएका छन् । ‘हाम्रा लागि यो खेल हो । लक्ष्य छनोट हुने हो,’ उनले भने, ‘जब उत्तर कोरियाविरुद्ध खेल्नेछौं तब हामीले अरु टिमविरुद्ध खेलेजस्तै उसलाई सम्मान गर्नुपर्छ भन्ने सन्देश हाम्रा खेलाडीलाई दिइसकेका छौं ।’

दुई कोरियाले खेलकुदलाई कूटनीतिक रूपमा पनि उपयोग गर्दै आएको छ । सन् २०१८ को विन्टर गेम्समा कोरियाले पहिलोपल्ट संयुक्त रूपमा ओलम्पिक टिम बनाएको थियो । एउटै समूहमा परेपछि इरान र इराकले आफ्नो पुरानो प्रतिद्वन्द्वितालाई फेरि निरन्तरता दिएको छ ।

टिमहरूले राउन्ड रोबिनको आधारमा प्रतिस्पर्धा गर्नेछ । आठ समूहका विजेता तथा उत्कृष्ट चार उपविजेता टिम विश्वकप २०२२ को एसियाली छनोटको अन्तिम चरणमा प्रवेश गर्नेछन् ।

प्रकाशित : श्रावण २, २०७६ ०८:०७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×