उदयपुर गोल्डकप : रूपन्देही सेमिफाइनलमा

असार ३, २०७६कान्तिपुर संवाददाता

(उदयपुर) — उदयपुरमा जारी उदयपुर गोल्डकप फुटबलको छैटौ संस्करमा मंगलबार गोर्खा ब्वाइज क्लब रूपन्देही विजयी भएको छ । थारुहट रंगशाला गाईघाटमा भएको खेलमा रूपन्देहीले सिएमसी क्लब संकटालाई २–१ ले पन्छायो ।

खेलको दोस्रो हाफको छैटौं मिनेटमा रूपन्देहीका फोफाना फोडेले गोल गरेर टोलीलाई अग्रता दिलाए । त्यसपछि २० औं मिनेटमा डेविलले थप्दै संकटामाथि थप दबाबमा कायम राखे । प्रतिस्पर्धामक खेलमा संकटाले लयमा समाउन कठिन भएको थियो । इन्ज्युरी समयमा संकटाले गोल फर्काएको थियो । तर थप ४ मिनेटमा संकटाका अमित तामाङले गरेको गोल सान्त्वनामा परिणत भयो । म्यान अफ द म्याच फोफाना घोषित भए ।