साफ महिला च्याम्पियनसिपमा नेपाल र बंगलादेश सेमिफाइनलमा
(विराटनगर) — बंगलादेशले पाँचौं साफ वुमेन्स च्याम्पियनसिपमा बिहीबार भुटानलाई २—० ले पराजित गरेको छ । यससँगै तीन टिम रहेको समूह ‘ए’बाट एक खेल बाँकी छँदै नेपाल र बंगलादेश सेमिफाइनल प्रवेश गरेका छन् । सहिद मैदानमा भएको खेलमा बंगलादेशले दुवै गोल दोस्रो हाफमा गरेको थियो ।
मौसुमी जाहनले ४७ औं मिनेटमा गोल गर्दै बंगलादेशलाई अग्रता दिलाएकी थिइन् । कप्तान सबिना खातुनले ८५ औं मिनेटमा गोल गर्दै बंगलादेशको जित पक्का गरेकी थिइन् । लगातार दोस्रो हारसँगै भुटान साफ वुमेन्स च्याम्पियनसिप २०१९ बाट बाहिरियो । भुटानले साफ महिलाको इतिहासमा हालसम्म कुनै पनि खेल जितेको छैन । पाँचौं संस्करणको उद्घाटन खेलमा नेपालले मंगलबार भुटानमाथि ३—० को जित हात पारेको थियो ।
समूह ए को अन्तिम खेलमा शनिबार नेपाल र बंगलादेश भिड्नेछन् । सुरुको तीनपल्टको उपविजेता नेपाल र चौथो साफको फाइनल खेलेको बंगलादेशवीचको खेलले समूह विजेताको टुंगो लगाउनेछ ।
च्याम्पियनसिपअन्तर्गत् समूह बी मा रहेका श्रीलंका र माल्दिभ्सवीच शुक्रबार प्रतिस्पर्धा हुनेछ ।
