बर्दियामा टिपरको ठक्करबाट कारमा सवार दुईको मृत्यु, ३ घाइते
बर्दिया — बर्दियामा बिहीबार दिँउसो सवारी दुर्घटना हुँदा दुई जनाको मृत्यु भएको छ ।
गुलरियाबाट भुरीगाउँतर्फ गइरहेको बा १६ च नम्बरको कारलाई ढोढरीबाट गुलरियातर्फ आइरहेको ना ८ ख ३१४ नम्बरको टिपरले ठक्कर दिँदा दुई जनाको घटनास्थलमै मृत्यु भएको हो ।
हुलाकी सडक अन्तर्गत मधुवन नगरपालिका माचर चोकमा दुर्घटना हुँदा कारमा सवार गुलरिया नपा—४ का २३ वर्षीय सुरेन्द्र गोडिया र भिमदत्त नगरपालिका वडा नम्बर नखुलेको १८ वर्षीय निधि सुनारको मृत्यु भएको जिल्ला प्रहरी कार्यालयका प्रहरी निरीक्षक सुशिल थापाले बताए ।
यस्तै, कारमा सवार चालक गुलरिया—४ का मनोज लोनिया, भिमदत्त नगरपालिकी कमला सुनार र सोही ठाउँकी कृतिका सुनार गम्भीर घाइते भएका छन् ।
उनीहरुलाई उपचारका लागि नेपालगञ्ज लगिएको प्रहरी निरीक्षक थापाले जनाए । टिपर चालक कोहलपुर—६ रझेनाका रमेश थारुलाई प्रहरीले नियन्त्रणमा लिएको छ । घटनास्थल सदरमुकाम गुलरियाबाट करिब २० किमी पश्चिममा पर्दछ ।
प्रकाशित : मंसिर १८, २०७७ १७:०८