बाँके प्रहरीको हिरासतमा रहेका थुनुवा मृत फेला
नेपालगन्ज — जिल्ला प्रहरी कार्यालय बाँकेको हिरासतमा रहेका एक थुनुवा शुक्रबार बिहान मृत फेला परेका छन् । शौचालयमा पासो लगाएर झुन्डिएको अवस्थामा उनको शव भेटिएको हो ।
डुडुवा गाउँपालिका–३ का २४ वर्षीय बाबुलाल रैदास हिरासत कक्षको शौचालयको झ्यालको डन्डीमा टाउकोमा बाँधेको कपडाले पासो लगाको अवस्थामा मृत भेटिएको डीएसपी सुवास खड्काले बताए ।
वनकट्टीमा भएको बालक अपहरण तथा हत्याकाण्डका अभियुक्तमध्येका एक उनी अभद्र व्यवहार मुद्दामा कात्तिक १४ देखि हिरासतमा थिए । डीएसपी खड्काका अनुसार रैदासमाथि कर्तव्य ज्यान मुद्दामा समेत अदालतबाट म्याद थपेर अनुसन्धान भइरहेको थियो ।
तत्कालीन भूमिगत समूह तराई जनतान्त्रिक मुक्ति मोर्चा (ज्वाला सिंह) समूहमा आबद्ध रहेर रैदासले विभिन्न आपराधिक क्रियाकलाप गर्दै आएका थिए । उनी यसअघि पनि हातहतियार तथा खरखजना मुद्दामा ८ वर्ष जेल सजाय पाएका व्यक्ति भएको प्रहरीले जनाएको छ ।
प्रकाशित : मंसिर ५, २०७७ ११:१६