वर्षा रोकिएपछि पाल्पाको फोक्सिङकोट पहिरोमा पुरिएकाको खोजी सुरु - प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

वर्षा रोकिएपछि पाल्पाको फोक्सिङकोट पहिरोमा पुरिएकाको खोजी सुरु 

माधव अर्याल

पाल्पा — पाल्पाको रम्भा गाउँपालिका–२, फोक्सिङकोट बेलौजामा पहिरोमा पुरिएकाको खोजी कार्य शुक्रबार बिहानदेखि सुरु भएको छ । प्रहरी नायब उपरीक्षक मदन गिरीको नेतृत्वमा जनपद प्रहरी र सशस्त्र प्रहरी, स्थानीय बासिन्दाले खोजी कार्य सुरु गरेका हुन् । 

आर्यभन्ज्याङ–रामपुर सडक अवरुद्ध हुनुका साथै भित्री कच्ची सडकमा पहिरो खसेकाले बिहीबार उद्धारमा समस्या भएको थियो । उद्धार गर्न गएको टोली नै बीच बाटोमा रोकिएको थियो । शुक्रबार वर्षा रोकिएकाले हिँडेरै उद्धार टोली घटनास्थल पुगेको प्रमुख जिल्ला अधिकारी रमेश न्यौपानेले बताए । ताँहुबाट फोक्सिङकोट जाने सडकमा खसेको पहिरो पन्छाउन भने अझै सकिएको छैन । दुई घण्टा हिँडेर टोली घटनास्थलमा पुगेर स्थानीयको सहयोगमा खोजी कार्य जारी राखेको उनले बताए ।

वडाध्यक्ष उमानसिंह सारुका अनुसार प्रहरी र सशस्त्र प्रहरीको टोलीले पहिरोले पुरिएको स्थानमा बेपत्ताको खोजी जारी राखेको छ ।

पहिरोमा पुरिएर ६० वर्षीय हुमबहादुर गाहा, ५० वर्षीया धनीसरा गाहा, १७ वर्षीया कृष्णामाया गाहा (छोरी) आठ वर्षीया लक्ष्मी गाहा (छोराको छोरी नातिनी) र १४ वर्षीय खुमीसरा गाहा (छोरीको छोरी) बेपत्ता छन् । बेलौजामा ३ घर पहिरोले पुरिएको छ भने १७ घर जोखिममा रहेको गाउँपालिका अध्यक्ष विष्णुप्रसाद भण्डारीले जानकारी दिएका छन् ।

प्रकाशित : आश्विन ९, २०७७ ०९:४४
प्रतिक्रिया
पठाउनुहोस्

लकडाउन अवधिको शुल्क मिनाहा गर्दै कमलामाईका निजी विद्यालय

राजकुमार कार्की

सिन्धुली — सदरमुकाम सिन्धुलीमाडीका निजी विद्यालयहरूले विद्यार्थीलाई लकडाउन अवधिको शुल्क मिनाहा गर्न थालेका छन् । उनीहरूले नयाँ शैक्षिक सत्रको सुरुको पाँच महिनाको शुल्क नलिने भएका हुन् । यहाँका सिद्धस्थली, न्यू सिद्धस्थली, आधुनिक, सिद्धबाबा, न्यू इंग्लिस, सूर्योदयलगायत एक दर्जनजति बोर्डिङ स्कुलले शुल्क छुट दिने जनाएका छन् ।

सदरमुकाममा रहेको भगवती अंग्रेजी माविले भदौ मसान्तसम्मको शुल्क मिनाहा गरेको छ । लकडाउनपछि अनलाइन कक्षा चलाए पनि अभिभावकको चाहनाबमोजिम शुल्क मिनाहा गरेको विद्यालय सञ्चालक रमाकान्त सुवेदीले बताए ।

सरकारले लकडाउन अवधिको शुल्क निर्धारणको जिम्मा सम्बद्ध स्थानीय तहहरूलाई दिएको छ । अभिभावक भेलामा गर्दा चार महिनाको शुल्क मिनाहा हुनुपर्ने माग उठे पनि एक महिनासमेत थपेर पाँच महिनाका छुट दिने निर्णय भएको भगवती माविले जनाएको छ ।

‘अनलाइन कक्षा भइरहेको थियो, तैपनि केही छुट देलान् भनेर भेलामा कुरा उठाएको, सबै शुल्क पो मिनाहा गरिदिए,’ अभिभावक गोविन्द कोइरालाले भने, ‘यो शुल्क मिनाहले हामी अभिभावकलाई धेरै सहयोग भएको छ ।’ अनलाइन कक्षामा चाहिने ल्यापटप, मोबाइल, नेटलगायत सामग्रीमा गरेको खर्च शुल्क मिनाहले परिपूर्ति भएको उनको भनाइ छ ।

कमलामाई नगरपालिकाका प्रमुख खड्गबहादुर खत्रीले विद्यालयले अभिभावकलाई यसरी छुट दिँदा सकारात्मक सन्देश जाने बताए । ‘सकिन्छ भने सबै शुल्क छुट दिन, अन्यथा अभिभावकको चाहनाअनुसार गर्न अनुरोध गरेका थियौं,’ उनले भने, ‘निजी विद्यालयले त्यसलाई कार्यान्वयन गरेको सन्देश आइरहेको छ ।’ सदरमुकाममा मात्रै दुई दर्जनभन्दा बढी निजी विद्यालय छन् । तीमध्ये केही बोर्डिङले महामारी नसकिएको भन्दै थप छुट गर्ने सामाजिक सञ्जालमार्फत पनि उल्लेख गरिरहेका छन् ।

प्रकाशित : आश्विन ९, २०७७ ०९:४४
पूरा पढ्नुहोस्
प्रतिक्रिया
पठाउनुहोस्
×