चक्कु प्रहारबाट प्रहरी हवल्दार घाइते
काठमाडौँ — होटलमा खाजा खाने क्रममा विवाद हुँदा चक्कु प्रहारबाट घोराहीमा प्रहरी हवल्दार घाइते भएका छन् ।
घोराही-१५ आदर्शटोल स्थित सुर्खेती होटलकी सञ्चालिका ४० वर्षीया ईन्द्रा थापाले जिल्ला प्रहरी कार्यालयमा कार्यरत प्रहरी हवल्दार खड्कबहादुर खत्रीलाई चक्कु प्रहार गरेको जिल्ला प्रहरी प्रवक्ता डीएसपी सुमित खड्काले बताएका छन् ।
शनिबार बेलुका होटलमा खाजा खाने क्रममा विवाद् भएपछि थापाले खत्रीलाई चक्कु प्रहार गरेकी थिइन् । हवल्दार खत्रीको राप्ती स्वास्थ्य विज्ञान प्रतिष्ठान घोराहीमा उपचार भएर अहिले अवस्था सामान्य रहेको डीएसपी खड्काले जानकारी दिए । चक्कु प्रहार गर्ने होटल सञ्चालिका थापालाई प्रहरीले नियन्त्रणमा लिइ अनुसन्धान गरिरहेको छ ।
यसैबीच जुवा खेलेको अभियोगमा घोराहीमा पाँच जना पक्राउ परेका छन् । घोराही उपमहानगरपालिका-१५ पाठकचोकस्थित याम बहादुर थापाको घरमा जुवा खेलिरहेको अवस्थामा शनिबार बेलुका थापासहित पाँच जनालाई पक्राउ गरिएको पाँच नम्बर प्रदेश प्रहरी कार्यालय तुलसीपुरले जनाएको छ ।
प्रहरीले उनीहरुको साथबाट ताससहित नगद ३० हजार ३ सय ९५ रुपैयाँ पनि बरामद गरेको छ ।
प्रकाशित : भाद्र २८, २०७७ १५:१७