उपचार नपाउँदा सर्पले डसेका युवाको मृत्यु- प्रदेश ५ - कान्तिपुर समाचार

उपचार नपाउँदा सर्पले डसेका युवाको मृत्यु

वीरेन्द्र केसी

अर्घाखाँची — समयमै उपचार नपाउँदा सर्पले डसेका शीतगंगा नगरपालिका–५ जुकेनाका एक युवाको मृत्यु भएको छ । शनिबार राति सर्पले डसेका ३५ वर्षीय यमबहादुर बेल्वासेलाई उपचारका लागि आइतबार बुटवल लैजाँदै गर्दा बाटोमै निधन भएको हो ।

घरमा सुतिरहेको बेला सर्पले डसेका उनलाई आइतबार बिहान कपिलवस्तुको गोरुसिंगेस्थित सर्पदंश उपचार केन्द्रमा पुर्‍याइएको थियो । बिरामीको अवस्था गम्भीर भएकाले थप उपचारका लागि बुटवल प्रादेशिक अस्पतालमा लैजाँदै गर्दा बाटोमै मृत्यु भएको प्रहरीले जनाएको छ ।

बर्खाको कारण पहिरोले सडक अवरुद्ध भएको र समयमै एम्बुलेन्स नपाउँदा बेल्वासेलाई छिटो अस्पताल पुर्‍याउन नसकिएको शीनगंगा नगरपालिका–५ वडाध्यक्ष कमल पौडेलले बताए । बेल्वासेको घर जुकेनादेखि सन्धिखर्क–गोरुसिंगे सडक खण्डको ठाडा आइपुग्न करिब डेढ घन्टा समय लाग्छ । उनलाई स्थानीयले घन्टौं बोकेर गाडी चल्ने बाटोसम्म ल्याएका थिए । बेल्वासेको घर एक्लो ठाउँमा भएकाले गाउँलेलाई ढिला गरी खबर भएको थियो । प्रहरीका अनुसार सर्पले टोकेको १६ घन्टापछि मात्रै उनलाई गोरुसिंगे सर्पदंश उपचार केन्द्र पुर्‍याइएको थियो ।



प्रकाशित : भाद्र १४, २०७७ १७:१७
प्रतिक्रिया
पठाउनुहोस्

होटललाई आइसोलेसन बनाइने

मकर श्रेष्ठ

काठमाडौँ — स्वास्थ्य तथा जनसंख्या मन्त्रालयले उपत्यकाभित्रका होटललाई आइसोलेसन सेन्टर बनाउने भएको छ ।

उपत्यकामा संक्रमितको संख्या दैनिक ४ सय भन्दा बढी भएपछि होटललाई आइसोलेसन सेन्टरको रुपमा प्रयोग गर्न लागिएको हो ।

स्वास्थ्य सेवा विभागले उपत्यकाभित्रका होटललाई आइसोलेसन बनाउन सूचीकृत गर्ने स्वास्थ्य मन्त्रालयका प्रवक्ता डा.जागेश्वर गौतमले बताए । मन्त्रालयले तोकेका आइसोलेसन केन्द्रहरुमा बेड अभाव भएमा होटल प्रयोग गर्न लागिएको उनले बताए ।

एक जना व्यक्ति बराबर दुई हजार रुपैयाँ भुक्तानी गरेर विभागले संक्रमितलाई राख्‍ने व्यवस्था गर्न लागेको उनले बताए । त्यस्तै, संक्रमित व्यक्तिहरु आफ्‍नै खर्चमा विभागले व्यवस्था गरेको होटल वा अन्य होटलमा बस्न चाहेमा स्वीकृत दिने उनले बताए ।

उपत्यका बाहिर हरेक प्रदेशको समाजिक विकास मन्त्रालय मार्फत होटल चयनको निर्णय भएको मन्त्रालयले जनाएको छ । होटल आइसोलेसन सम्बन्धि छुट्टै निर्देशिका जारी गर्ने मन्त्रालयले जनायो ।

प्रकाशित : भाद्र १४, २०७७ १७:०७
पूरा पढ्नुहोस्
प्रतिक्रिया
पठाउनुहोस्
x
×